Mt 14

A schaml Juan Bautista

(Mr 6.14-29; Lc 9.7-9)

1A 'a jun tiempoal cha, xyab' win rey Herodes speclal Jesús. 2Yuj cha, xyaln win 'ixtc 'a eb' tz'a'n servil:

—A jun cha, atn win Juan Bautista xpitzw pax 'a scal eb' chamnac. Yuj cha, 'ay spoder sb'on jun tzo'n̈ milagro cha, xchi winac.

3-4'Ixta xyutj win yalni, yujto chamnc xo Juan chi yu'uj. 'Ixtc 'ajnc scham yu'uj. 'Ay jun yu'tac Herodes cha, Felipe sb'i. Herodías sb'i 'ix yistl Felipe cha. Ax win Herodes chi xmontn 'el 'ix yistl Felipe cha. Ax Juan x'at alnc 'ixtc 'a win Herodes cha:

—Caw may sleyl tza montj 'el jun 'ix tic, xchi 'a winac.

Yuj cha, xya'n 'ix Herodías chi sc'ojloc win Herodes cha. 'Ix ya'n win yamchjoc Juan cha, 'ix 'och 'a preso, x'och q'uen cadena 'a 'a.

5'Ix snib'j win smil cham Juan cha, palta xiw yuj eb' 'anma'. Yujto xnachj 'el yuj eb' 'anma chi smasnil, to a Dios 'ay schecb' 'a Juan cha. 6Ax yic x'och jun q'uin̈ yic yab'lil win Herodes cha, 'ix yawtn cot jun tzo'n̈ winac. Ax 'ix yune 'ix Herodías cha, xc'och 'ix 'a yojltac ewinac, 'ix ya'n 'ix chan̈al. Caw wach' yec' 'ix xyil win Herodes cha. 7Yuj cha, xya'n win sti', slocn win sb'i Dios, xyaln win 'ixtic:

—Tzann̈j junc tas 'oj a c'an 'ayin, 'oj wa'n̈j 'ayach, xchi win 'a 'ix. 8Ax snun 'ix chi 'ix aln 'a 'a, to tzc'an 'ix sjolm Juan Bautista 'a yol junc plato.

9A yic xyab'n win rey chi jun cha, caw xcus winac. Palta tox 'ix sloc win sb'i Dios, 'ix yab' pax ewin 'ayc' yet' win cha. Yuj cha, xyaln winac to tz'ajx 'a 'ix. 10'Ix yaln win Herodes cha, to tz'at tzu'xc 'el sjolm Juan 'a yol preso. 11Tzlajw cha, tz'ijx cot 'a yol junc plato. 'Ixta xyutj eb', xya'n eb' sjolm Juan chi 'a 'ix, ax 'ix x'a'n 'a snun cha.

12Ax yic xyab'n eb' scuywum Juan cha, 'ix 'at yi'nc eb' sniwnal, x'at smucnc can eb'. Xlajw cha, x'at yalnoc eb' 'a Jesús tas x'aj Juan chi schami.

Ya'jnac wa Jesús o'e mil winac

(Mr 6.30-44; Lc 9.10-17; Jn 6.1-14)

13Yic 'ix yab'n Jesús jun cha, 'ix 'och 'a yol jun barco yet' eb' scuywum. 'Ix 'at eb' 'a 'aj 'ayc' eb' cha, sch'ocj xoj eb' x'at 'a jun lugar 'aj may 'anma'. Palta xyab'n eb' 'anma cha to tz'at eb', yuj cha, xlaj 'elt eb' 'a junjn chon̈ab', 'ix laj 'at eb' 'a yoc, sec tzc'och eb' 'a 'aj tzc'och Jesús. 14Ax yic 'ix 'elt Jesús 'a yojl te barco cha, 'ix yilni til wal eb' 'anma 'ayx 'ec' pax ta'. Yuj cha, x'o'ch sc'ojl 'a eb', 'ix ya'n b'oxc sc'ojl jun tzo'n̈ eb' ya'ay x'ijx cot 'a 'a. 15Ax 'a yemc'ual, 'ix jaw eb' scuywum 'a stz'ey. 'Ix yaln eb' 'ixtc 'a 'a:

—'Ilto, wan s'at c'u, palta a 'a jun lugar tic caw cusltac. Yuj cha, tecn wach' tza checb't eb' 'anma tic 'a jun tzo'n̈ aldea 'a la'n tic, sec wach' 'oj sman wa sb'a eb' ta', xchi eb'.

16—Man̈ yowlaloc tz'at sman wa sb'a eb', ax 'oj eyac' wa eb', xchi Jesús 'a eb' scuywum cha.

17—Palta cojn wal o'e pan quet' on̈, yet' chac'otn̈ chay, xchi eb' 'a 'a.

18—'Ijec cot jun tzo'n̈ chi 'ayin, xchi 'a eb'.

19Xlajw cha, xyaln 'a eb' 'anma', to tz'em wocn eb' 'a jun 'a'lic 'aj 'ayc' cha. 'Ix syamn chan̈ o'e pan yet' chac'otn̈ chay cha. 'Ix q'ue q'ueln 'a satcha'an̈, xya'n yuj diosal yu'uj. Sch'iyn 'ixm pan cha. Xlajw cha, xya'n 'a eb' scuywum. Ax eb' x'a'n 'ec' 'a eb' 'anma cha. 20'Ix wa eb' smasnil, 'ix b'ut'j eb'. Yic xlajw swa eb', 'ix b'ut'j can pax lajchwe xuc xyac' sobra scan yuj eb'. 21O'e mil eb' winc 'ix wa'i, ax eb' 'ix 'ix yet' eb' 'unin, ma'ix 'och eb' sb'isloc.

B'eync Jesús 'a yib'n̈ a mar

(Mr 6.45-52; Jn 6.16-21)

22Xlajw xoj cha, xyaln Jesús 'a eb' scuywum, to tz'ochx eb' 'a yojl te barco cha, sec tzb'ab'l c'axw can pax 'ec' eb' 'a a a cha. Ax Jesús 'ix can to yic tzyaln can sb'a 'a eb' 'anma cha. 23Xlajw yaln can sb'a 'a eb', 'ix 'at 'a jun tzalan, yic tzleslwi ta sch'ocoj. A 'a jun 'ac'wl cha, sch'ocj 'ayc' ta'. 24Ax eb' scuywum wan ye'ch eb' yet' te barco 'a spacl snan̈l a'. Palta caw 'ijn tzpilch'j te yuj a', yujto caw ow sjaw 'ic' 'a sat eb'. 25Ax yic 'ayt sacb'i, 'ix jaw Jesús 'a stz'ey eb', mun tzb'ey cot yet' yoc 'a yib'n̈ a'. 26Palta a yic xyiln 'at eb' scuywum chi sb'ey 'a yib'n̈ a', caw xiw eb' yu'uj. 'Ix 'el yaw eb' yuj xiwlal, 'ix laj yalnc eb' 'ixtic:

—Lab' jun tzjaw tic, xchi eb'.

27—Te'n tzeyutj e b'a. An Jesús in. Man̈ ex xiwoc, xchi 'a eb'.

28Ax Pedro 'ix aln 'ixtc 'a 'a:

—Mamin, toto yel a 'ach, 'awtj in 'at et'oc, sec tzin b'eyt 'a yib'n̈ a', yic tzin c'och 'ayach, xchi 'a 'a.

29—Cotan̈, xchi 'a Pedro cha.

Yuj cha, x'elt 'a yojl te barco cha. 'Ix b'eyb't 'a yib'n̈ a', yic tzc'och 'a Jesús cha. 30Palta ax 'ix yab'ni caw ow 'ic', 'ix xiwi. Yuj cha, wan 'ijn wal tz'ejm 'a yojl a', 'ix 'awj 'ixtic:

—Mamin, col in, xchi.

31Yajn̈j wal cha, xwul 'och yamnjoc Jesús 'a sc'ab', 'ix yaln 'ixtc 'a 'a:

—Ach tic jab' wal tza'ch a c'ojl 'a Dios. ¿Tas yuj xa chab'c'ojlej a b'a? xchi 'a 'a.

32Ax yic x'och eb' 'a yojl te barco cha, x'och wan jun 'ic' cha. 33A eb' 'ayc' 'a yojl te', 'ix 'em cumn eb' 'a yojltac Jesús, 'ix yaln eb' 'ixtc 'a 'a:

—Wal yel, ach tic Yunnal ach Dios, xchi eb' 'a 'a.

B'oxnc eb' ya'ay 'a Genesaret

(Mr 6.53-56)

34Ax yic xlajw sc'axw 'e't eb' 'a a a cha, 'ix jaw eb' 'a yol yic Genesaret. 35Ax yic xyiln eb' 'anma', chajtlto a Jesús, yuj cha, c'uxn x'ec' yal-l eb' yab'xil 'a jun lugar cha. Yuj cha, 'ix 'ijx cot smasnil eb' ya'ay 'a 'a. 36'Ix sc'ann eb' syam jac sti spichul. Tzann̈j eb' xyamni, 'ix b'ox can sc'ojl eb' yu'uj.

Currently Selected:

Mt 14: CSS

Highlight

Copy