Mt 13

A yab'xil jun win tzicm 'in̈at

(Mr 4.1-9; Lc 8.4-8)

1A 'a jun c'u cha, 'ix 'elt Jesús 'a yol n̈a, 'ix 'at 'em wocn 'a sti a mar. 2Til wal 'anma xc'och 'a 'aj 'ayc' cha. Yuj cha, x'och 'a yol jun barco, ata x'em wocan. Ax eb' 'anma', xcan eb' 'a sti a'. 3Til wal jun tzo'n̈ 'ab'x 'ix yal 'a eb'. 'Ix yaln 'ixtic:

—'Ay jun winc x'at tzicj 'in̈at. 4Yic wan stzicni, stz'itj can 'at jun tzo'n̈ 'a yol b'e. Ax no ch'ic 'ix 'ec' si'noc. 5'Ay jun tzo'n̈ xo xc'ochcn 'a yib'n̈ samq'ue'en, 'a 'aj jab' wal slumal. Yajn̈ej xpaq'ui, yujto jab' wal slumal cha. 6Ax yic 'ix q'uel c'u, yajn̈ej xtacj cha'an̈, yujto may wal sch'an̈l yib'. 7'Ay jun tzo'n̈ xo xc'ochcn 'a scal c'ultac, ax te c'ultc cha, xwach' q'uib' te', ton̈j 'ix satl jun tzo'n̈ 'in̈t chi 'a scal te'. 8Palta 'ay jun tzo'n̈ xo x'emcn 'a 'aj caw 'ay syaxil lu'um. A jun tzo'n̈ cha, xyac' sjolom. 'Ay xyac' sat 'a jun ciente, 'ay xyac' 'a sesenta, 'ay xyac' 'a treinta. 9A jun tzo'n̈ tzeyab' tic, nac wal si'mb'il, xchi 'a eb'.

A yopiso jun tzo'n̈ 'ab'x ya snachji

(Mr 4.10-12; Lc 8.9-10)

10Ax eb' scuywum Jesús, xjaw eb' 'a stz'ey, 'ix sc'anb'n eb' 'ixtc 'a 'a: ¿Tasm yuj an̈j jun tzo'n̈ 'ab'x ya snachj tic tzal 'a eb' 'anma'? xchi eb' 'a 'a. 11Yuj cha, xyaln 'a eb' 'ixtic: An̈j 'ayx tzch'ox Dios jun tzo'n̈ tas mant 'a mach 'ojtnac, sec tznachj 'el eyu'uj, chajtl tzex 'aj eyoch 'a yol sc'ab'. Palta ax 'a eb' 'anma', matz ch'ox 'a eb'. 12Yujto a eb' tznib'j tznachj 'el yu'uj, 'oj wach' nachjc 'el yuj eb'. Ax eb' matz nib'j nachjc 'el jun tzo'n̈ tic yu'uj, 'oj wach' 'ijxc 'ec' 'a eb'. 13Yuj cha, an̈j jun tzo'n̈ 'ab'x ya snachj tic tzwal 'a eb'.

Yujto wach'xam tzyil eb' junc tas, ton̈j tzcann̈j eb' 'ixta'. 'Icha to may tas tzyil eb'. An̈jtona', wach'xam tzyab' eb', palta matz nachj xon 'el yuj eb'.

14Yuj eb' 'anma cha, tz'el'ch tas yaljnac can win Isaías, yic yaln can 'ixtic:

Tzcob' eyab' tas tzalxi, palta matz nachj 'el eyu'uj, tzcob' eyila', palta matz eyojquej 'eli tas jun cha, xa chi 'a eb'.

15Yujto a eb' 'anma tic, tox xpitb' 'el eb'. 'Icha to macn schicn eb', 'icha to tzmutz' eb' sat, sec wach' matz yil eb', matz yab' pax eb'. Yuj cha, matz nachj 'el yuj eb', matz jel eb' snab'en, matz colchj eb' wu'uj, xchi Dios, xchi Isaías.

16Palta ax xo tic, caw wach' eyico', yujto tzeyila, tzeyab'n paxi. 17Wal yel tzwal 'ayex, til wal eb' schecb' Dios pecti', yet' jun tzo'n̈ xo eb' caw tojl sb'eyb'al, snib'jnac eb' yil jun tzeyil tic, palta ma'ix yil eb'. Snib'jnac pax eb' yab' jun tzo'n̈ tzeyab' tic, palta ma'ix yab' eb'.

A tzyal 'el'ch yab'xil win tzicm 'in̈at

(Mr 4.13-20; Lc 8.11-15)

18'A'c 'och e chicn 'ayin, 'oj wal 'ayex, tas tzyal 'el'ch yab'xil win tzicm 'in̈at. 19A jun tzo'n̈ 'in̈t stz'itj can 'at 'a yol b'e, tzyal 'el'chi, 'ay eb' 'anma tz'ab'n spaxti Dios, chajtl tz'aj eb' yoch 'a yol sc'ab', palta matz nachj 'el yuj eb'. Ax win diablo tzc'och 'a eb', tzyi'n 'el win spaxti Dios 'a snab'en eb'. 20Ax jun tzo'n̈ 'in̈t xc'ochcn 'a yib'n̈ q'ue'en, tzyal 'el'chi, 'ay jun tzo'n̈ xo 'anma tz'ab'n spaxti Dios, caw tzaljc'ojlal tzcob' scha eb', 21palta may ste'nal eb', matz b'ey wal tiempo yuj eb'. Yujto a yic tzjaw yailal, mto tz'ajx 'och 'a yib'n̈ eb' yuj spaxti Dios, yajn̈ej tzjuw 'el snab'en eb'. 22Ax jun tzo'n̈ xo 'in̈t x'emcn 'a scal c'ultac, tzyal 'el'chi, 'ay jun tzo'n̈ xo eb' tz'ab'n spaxti Dios. Palta an̈j jun tzo'n̈ yic yolyib'n̈q'uinl tic tzna eb', tzjuw snab'en eb' yuj snib'n 'och sb'a ricoal. Yuj jun tzo'n̈ cha, man̈x 'a yel'ch spaxti Dios 'a eb'. Lajn tz'aj eb' 'icha 'ixm trigo may xon jac sjolm tzyac'a. 23Palta ax jun tzo'n̈ 'in̈t x'emcn 'a 'aj 'ay syaxil lu'um, tzyal 'el'chi, 'ay jun tzo'n̈ xo eb' tz'ab'n spaxti Dios, tznachj 'el yuj eb'. A eb' cha, lajn eb' 'icha jun tzo'n̈ trigo niwn sat tzyac'a. 'Ay eb' tzyac' sat 'a jun ciente, 'ay pax eb' tzyac' sat 'a sesenta yet' 'a treinta, xchi Jesús.

A yab'xil te 'ac trigo

24'Ix yaln Jesús junx 'ab'x tic 'a eb' scuywum:

—'Oj wal 'ayex chajtl 'oj 'aj eb' 'anma yic 'oj wach' 'och jun 'aj satchan̈ yajlil. Q'uinloc 'ay junc winc stzic 'ejm yin̈t caw wach' 'a slu'um. 25Ax 'a junc 'ac'wal, waync winac, xc'och jun 'ajc'ojl yajch 'a win 'a jun slum cha, xit' stzicnc can 'ejm jun tzo'n̈ 'ac trigo 'a scal strigo win cha. 26Ax yic wan xo spoj 'ixm trigo cha, xcheclji to caw 'ay te 'ac trigo 'a scal. 27Yuj cha, ax eb' smoso win 'aj lum chi xit' alnc 'a 'ixtic: Caw wach' jun tzo'n̈ 'in̈t trigo a tzicjnac 'ejm 'a lum a lu'um, palta ¿'ajm xcot pax jun tzo'n̈ 'ac trigo xpac' 'a scal? xchi eb'. 28Tecn a junc 'ajc'ojl yajch 'ayin, a xit' tzicnc 'ejm jun tzo'n̈ chi 'a scal, xchi win 'a eb'. ¿Tzam a nib'j tz'at qui to'l eb' te 'ac trigo chi 'on̈? xchi eb'. 29Ma'ay, yujto a yic tzto'x q'uet jun tzo'n̈ 'ac trigo cha, tzq'uet pax 'ixm trigo chi yet'oc. 30Can cab'n̈ej 'ixta', masnto 'oj polxc 'el 'ixm trigo cha. Atta 'oj wal 'a eb' in majan, to tzto'cn 'el eb' te 'ac trigo cha. Junjn yuchn̈ 'oj yutc eb' spixni, ax sn̈usn eb'. 'Oj lajwc cha, ax spoln 'el eb' 'ixm trigo chi b'i'an, ax smoln eb' 'a yet'ul, xchi win 'a eb', xchi Jesucristo.

A yab'xil te rechiwo

(Mr 4.30-32; Lc 13.18-19)

31Xlajw cha, xyaln pax Jesús junx 'ab'x tic:

—'Oj wal 'ayex chajtl tz'aj sq'uib' sb'isl eb' 'anma tz'och 'a yol sc'ab' Dios 'aj satcha'an̈. Lajn tz'aj sq'uib' 'icha sq'uib' junc 'in̈t rechiwo tzyawj junc winc 'a slu'um. 32Yujto a jun 'in̈t cha, yel xo yune 'a yib'n̈ smasnil jun tzo'n̈ xo 'in̈at. Palta a yic tzq'uib'i, yel xo niwquil tz'aj 'a yib'n̈ jun tzo'n̈ xo te te tz'awx 'a junjn ab'il. Lajn tz'aj 'icha jun tzo'n̈ niwc te', ax no ch'ic, tzc'och no 'a sc'ab' te', tzway no ta', xchi Jesús.

A yab'xil yich pan

(Lc 13.20-21)

33'Ix yaln pax Jesús junx 'ab'x tic 'a eb':

'Oj walx 'ayex chajtl tz'aj sq'uib' sb'isl eb' 'anma tz'och 'a yol sc'ab' Dios 'aj satcha'an̈. Lajn tz'aj sq'uib' 'icha jab' yich pan tzya'ch junc 'ix 'ix 'a scal junc arroba harina. Yuj jab' yich pan cha, c'uxn tzpajb' 'ixm smasnil, xchi Jesús.

'Ab'xn̈ej yaljnac Jesús

(Mr 4.33-34)

34Yic xyaln 'el Jesús 'a scal eb' 'anma cha, an̈j jun tzo'n̈ 'ab'x caw ya snachj 'el xyal 'a eb'. Cojxn jun tzo'n̈ 'ab'x chi 'ix sc'anlb'ej, yic xyaln 'el 'a eb'. 35'Ixta xyutj yaln 'a eb', sec tz'el'ch tas stz'ib'jnac can jun schecb' Dios 'a pecti', yic yaln can 'ixtic:

A jun tzo'n̈ 'ab'x ya snachj 'eli, a 'oj wal 'a eb' 'anma'. 'Oj wal jun tzo'n̈ paxti to caw niwn yel'ch 'ayex; atn jun tzo'n̈ tas to c'ub'b'il 'el 'a yictax sb'on Dios yolyib'n̈q'uinl tic, xchi.

A tzyal 'el'ch yab'xil te 'ac trigo

36'Ix yaln can sb'a Jesús 'a eb' 'anma cha, 'ix 'ochx 'a yol n̈a. 'Ix 'och pax eb' scuywum yet'oc. Xyaln eb' 'ixtc 'a 'a:

—A yab'xil te 'ac trigo 'ix ala, al 'ayn̈ on̈ tas wal tzyal 'el'chi, xchi eb' 'a 'a. 37Yuj cha, xyaln 'a eb' 'ixtic:

—A jun tzicm 'in̈t caw wach', tzyal 'el'chi, an ton 'Ochnc in 'Anmal tic. 38Ax jun lum cha, tzyal 'el'chi atn yolyib'n̈q'uinl tic. A jun tzo'n̈ wach' 'in̈t cha, atn eb' 'anma 'ayx 'och 'a yol sc'ab' Dios. Ax jun tzo'n̈ 'ac trigo cha, atn eb' yic win diablo. 39A jun 'ajc'ojl yajch 'a win 'aj lum cha, atn win diablo cha. A jun tiempoal yic 'oj polxc 'el 'ixm trigo cha, tzyal 'el'chi, atn yic 'oj lajwc 'ec' yolyib'n̈q'uinl tic. Ax eb' polm trigo cha, atn eb' ángel. 40'Icha sto'x 'el jun tzo'n̈ 'ac trigo cha, tzn̈usx tz'a'oc, 'ixta 'oj 'aj eb' 'anma', yic 'oj lajwc 'ec' yolyib'n̈q'uinl tic. 41An 'Ochnc in 'Anmal tic, 'oj in chec cot eb' wángel. C'uxn 'oj 'ec' smolb'tzoc eb' jun tzo'n̈ eb' tz'a'n juwc 'el snab'en eb' yit 'anma'il, yet' jun tzo'n̈ xo eb' tzb'on maysch'olnil. C'uxn 'oj 'ijxc 'el eb' 'a 'aj 'oj woch Yajlil. 42Ax sjulx can 'at eb' 'a yol jun 'icha jorna 'aj 'aych c'ac'. Caw 'oj 'oc' eb' ta', 'oj juch'ch'oc ye eb' yoq'ui. 43Ax eb' tojl sb'eyb'al, 'icha wal yilx c'u, 'ixta 'oj 'aj yilx eb' 'a yol sc'ab' qui Mam Dios. A wal jun tzo'n̈ tzeyab' tic, nac wal si'mb'il.

A jun tas mucb'il chan̈ stojol

44A eb' tz'och 'a yol sc'ab' Dios 'aj satcha'an̈, lajn 'icha junc tas caw wach', caw chan̈ stojol, mucb'il 'a yol lu'um. A yic tzchax yuj junc winac, yajn̈ej tzmucn can paxi, caw tzalj yet'oc. Yuj cha, tzchon̈n 'el smasnil tas 'ay 'a 'a, tzmann yico'oc jun lum cha.

A yab'xil jun q'uen perla

45A eb' tz'och 'a yol sc'ab' Dios 'aj satcha'an̈, lajn eb' 'icha junc chon̈wjum, tz'ec' sayc' jun tzo'n̈ q'uen ton̈ caw chan̈ stojol, perla sb'i. 46Q'uinloc 'ay junc caw wach' tzchax yu'uj, caw chan̈ stojol. To 'ixta', tzchon̈l smasnil tas 'ay 'a 'a, tzmann yico'oc jun perla cha.

A yab'xil jun yamlab' chay

47'Oj wal junx 'ab'x tic 'ayex, chajtl 'oj 'aj eb' 'anma yic 'oj wach' 'och Dios 'aj satcha'an̈ yajlil. Q'uinloc 'ay junc chim yamlab' chay, tz'ajx 'ejm 'a yojl a a', til wal junjn c'aj no chay chi tzcan 'a yojl ch'an̈. 48Ax yic tzb'ut'j ch'an̈, tzyi'n q'uet eb' yamn chay cha, tzyi'n 'el eb' 'a sti a', ata tz'em wocn eb', tzsi'n 'el eb' no wach', tzmoln eb' no 'a yol xu'uc, ax no maysch'olnil, tzxutcn 'el eb'. 49'Ixta 'oj 'aj eb' 'anma', yic 'oj lajwc 'ec' yolyib'n̈q'uinl tic, 'oj cot eb' ángel wul yi'l eb' maysch'olnil 'a scal eb' wach'. 50Ax sjulx can 'at eb' 'a yol jun 'icha jorna 'aj 'aych c'ac'. Caw 'oj 'oc' eb' ta', 'oj juch'ch'oc ye eb' yoq'ui, xchi Jesucristo.

A yopiso eb' scuywum Jesús

51Xlajw cha, 'ix sc'anb'n 'ixtc 'a eb' scuywum:

—¿Tzam nachj 'el jun tzo'n̈ tic smasnil eyu'uj? xchi 'a eb'.

—N', xnachj 'el cuj on̈ Mamin, xchi eb' 'a 'a.

52—Ax tic, cuyb'ilx xo, chajtl tz'aj eb' 'anma yoch 'a yol sc'ab' Dios 'aj satcha'an̈. Yuj cha, tztac' eya'n cuyxoc jun tzo'n̈ 'ac' cuynb'il yet' jun tzo'n̈ 'icham, xchi 'a eb'.

'Ayc' Jesús 'a Nazaret

(Mr 6.1-6; Lc 4.16-30)

53Yic xlajw yaln Jesús jun tzon̈ 'ab'x tic, 'ix 'atx 'a jun lugar cha. 54'Ix c'ochx 'a schon̈ab'. 'Ix 'och 'a yol capiya. Ata xcuywj 'a eb'. Ax eb' 'anma cha, ton̈j sat sc'ojl eb' yu'uj, 'ix laj yalnc eb' 'ixtic:

—A jun winc tic, ¿'ajm 'ix scuy sjelnal tic? ¿Tas tzyutj win sb'on jun tzo'n̈ milagro tic? 55A jun tic, 'in yunnal win josmte', ax snun, atn María. Cojquec pax eb' yu'tac, atn Jacobo, José, Simón, yet' Judas. 56An̈jtona pax eb' yanab', 'ayc' eb' 'a qui calec. Yuj cha, ¿'ajm xcob' yic' win jun sjelnal tic? xchi eb'.

57Yuj cha, ton̈j 'ix somchj 'el snab'en eb' yu'uj. Palta xyaln 'ixtc 'a eb':

—A eb' schecb' Dios, 'ay yel'ch eb' 'a sat eb' 'anma smasnil. Palta ax 'a sat eb' yit chon̈ab', yet' 'a sat eb' jun yaj yet' 'a yol yatut, may yel'ch 'a eb', xchi Jesucristo.

58Jayen̈ej milagro sb'o 'a schon̈b' cha, yujto ma'ix ya'ch eb' 'anma chi sc'ojl 'a 'a.

Currently Selected:

Mt 13: CSS

Highlight

Copy