Mt 10

Si'jnac 'el Jesús eb' scuywum

(Mr 3.13-19; Lc 6.12-16)

1Ax Jesús 'ix yawtj cot eb' scuywum slajchwan̈il 'a 'a. 'Ix ya'n 'och yopiso eb' yi'n 'el ewin demonio. 'Ix ya'n pax yopiso eb' ya'n b'oxc sc'ojl eb' 'anma tzann̈j yab'ilal tz'i'ni, yet' tzann̈j yailal.

2Atn sb'i eb' lajchwan̈ schecb' tic: A Simón, tzcuch pax Pedro, yet' jun yu'tac Andrés sb'i; Jacobo yet' jun yu'tac Juan sb'i. A eb' chawn̈ tic, yunnal Zebedeo eb'. 3'Ayc' pax Felipe, Bartolomé, Tomás yet' Mateo, atn jun tecm 'el tumn 'a yic yalan̈, yet' Jacobo yunnal Alfeo, yet' Tadeo. 4'Ayc' pax junx win tzcuch Simón win cananeo yet' pax Judas win 'aj Queriot, atn jun x'a'n 'och Jesús 'a yol sc'ab' chamel.

Schecb't Jesús eb' scuywum

(Mr 6.7-13; Lc 9.1-6)

5Atn eb' lajchwan̈ tic 'ix checx 'at yuj Jesús. Yic mantzac 'at eb', 'ix yaln jun tzo'n̈ checnb'il tic 'a eb' 'ixtic:

—A yic tzex 'ati, man̈ ex 'ec' 'a jun tzo'n̈ slugar eb' man̈ israeloc, yet' 'a jun tzo'n̈ chon̈b' 'a yol yic Samaria. 6An̈j 'a eb' satnc to 'a scal eb' quit israelal, an̈jta tzex 'eq'ui. Yujto 'icha junc calnelu tzsatq'ui, 'ixta 'eb'. 7Tz'at eyal-li, to jab'xoj wal 'oj wach' 'och jun 'aj satchan̈ Yajlil. 8A eb' ya'ay yuj lepra, tz'ec' eyac' b'oxc eb'. Yet' pax jun tzo'n̈ xo eb' ya'ay, tzeyac' b'oxc sc'ojl pax eb'. Tzeya'n pax pitzwc eb' chamnac. An̈jtona', tz'ec' laj eyi'nc pax 'el ewin demonio 'a eb' 'anma'. Xe chaj jun e poder tic 'a nab'an̈ej, yuj cha, 'oj e colwj pax yet' 'a nab'an̈ej jun xo.

9A yic tzex 'ati, may e tumn tzeyi'aj, man̈ eyic' q'uen oro, yet' q'uen plata. Wach'xam junc centavo, may cab' jac tzeyi'aj, 10man̈ eyic' e pa tzex 'ati. Junn̈j e camx tzeya'chi, tzex 'ati. Man̈ eyic' jun mojn̈ocx e xan̈ab'. Man̈ eyic' e c'ococh. Tzwal jun tzo'n̈ tic 'ayex, yujto a eb' tzmunlji, smoj tzchaj eb' tas tzc'uxu.

11A yic tzex laj c'och 'a junjn chon̈ab', 'a junjn aldea, tze say junjnoc mach wach' sb'eyb'al. Ata tzeyac' e posada 'a yatut, masnto tzex 'atxi. 12A yic tzex laj c'och 'a jun n̈a cha, tzeyal 'a eb' 'ajn̈a chi 'ixtic: 'Ay cab' sjunc'ojlal Dios eyet'oc, xe chi 'a eb'. 13Toto smoj eb' 'ixta', 'el'ch cab' 'icha 'oj eyal 'a eb'. Palta toto man̈ smojc eb' 'ixta', matz 'el'ch cab' 'icha 'oj eyal 'a eb' cha. 14Toto matz ex schaj eb', toto matz nib'j eb' tas 'oj eyala', tzex 'elx 'a yol yatut eb', yet' 'a yol schon̈b' eb' cha. Tze ma'cn 'el spoccal eyoc,#Mt 10.14 A yic matz chaj eb' 'anma yab' yab'xil colnb'il, tzma'cn 'el eb' cuywjum spoccal yoc, yuj sch'oxn 'el eb' to man̈ schon̈b'oc Dios eb' 'anma cha. yic tze ch'oxn can 'eli, to man̈x 'a eyaln eyic 'a eb'. 15Wal yel tzwal 'ayex, a yic 'oj jawc jun c'u yic sb'eyc'ojlal Dios, yel xo wal niwn syailal eb' 'oj 'ajxc 'a yib'n̈ eb' 'aj Sodoma yet' eb' 'aj Gomorra.

'Oj 'ajxc 'och 'a yib'n̈ eb' yic Cristo

16'Ab'ec, 'oj ex in checb't 'icha jun tzo'n̈ calnelu tz'at 'a scal no 'oques, 'ixta 'oj eyaji. Yuj cha, caw lista tzeyutj e b'a 'icha junc chan caw jelan, palta caw manso tzeyutj pax e b'a 'icha junc no parama. 17Caw tzeyil wal e b'a, yujto 'ay eb' 'oj eyi'n 'at 'a eb' yajal, 'oj ex smac' eb' 'a yol jun tzo'n̈ scapiya. 18'Oj ex yi't pax eb' 'a yojltac eb' niwc yajal wu'uj. 'Ixta 'oj eyaji, sec 'oj stac' eyaln 'el wab'xil 'a eb' yajl cha, yet' 'a eb' man̈ israeloc. 19Palta a yic 'oj eyajx 'och 'a yol sc'ab' eb' yajl cha, man̈ e na yuj tas 'oj eyala'. Man̈ ex 'och 'il yuj tas 'oj eyutc eyaln 'a eb', yujto a 'a jun rato cha, a Dios 'oj 'a'n nachjc 'el eyu'uj tas 'oj eyala'. 20Man̈oc ex 'oj e paxtini, yujto a Yespíritu qui Mam 'oj majnanc e ti', ax eyalni.

21A 'a jun tiempoal cha, 'ay eb' 'u'tacab'il 'oj ya'ch yu'tac 'a yol sc'ab' chamel. 'Ay pax eb' mamb'il 'ixta 'oj yutc sb'a 'a yunnal. An̈jtona', 'ay pax eb' 'unnab'il 'oj yac' owl yet' smam, ax ya'n 'och eb' smam chi 'a yol sc'ab' chamel. 22Smasnil 'anma 'oj chichnc 'och 'ayx wu'uj. Palta a eb' 'oj 'a'nc techjoc smasnil jun tzo'n̈ cha masnto 'a slajub', 'oj colchjoc eb'. 23A yic tzya'n eb' stul 'ayx 'a junc chon̈b' 'aj 'ayx 'eq'ui, tzex 'at 'elc 'a junc xo chon̈ab'. Wal yel tzwal 'ayex, a yic mantzac ex lajw 'ec' 'a smasnil jun tzo'n̈ schon̈b' eb' quit israelal, ax in japx an 'Ochnc in 'Anmal tic.

24May junc cuywum 'ec'b'al yel'ch 'a yib'n̈ scuymal. An̈jtona', may junc tz'a'w servil 'ec'b'al yel'ch 'a yib'n̈ spatron̈. 25Toto lajn tz'aj 'el'ch junc cuywum yet' scuymal, smoj ton tzalji. 'Ixta pax junc moso yet' spatron̈. An tic, 'icha 'ajn̈a in, ax xo tic, 'icha 'unnab'il ex. 'Ay eb' tzalni to Beelzebú in, yajl waj 'a eb' demonio yaln eb'. Ocxom wal 'ayx ax tic, yel xo wal tu 'oj yal eb' 'ayex.

Yowlal cojn 'a Dios tzon̈ xiwi

(Lc 12.2-7)

26Yuj cha, man̈ ex xiw 'a eb' 'anma'. Jantcn̈ej tas c'ultac yaj ticnec, c'uxn 'oj checljoc 'eli. Yet' jantcn̈ej tas c'ub'b'il 'eli, c'uxn 'oj 'ojcaxc 'eli. 27A jun tzo'n̈ tas tzwal 'ayx 'a c'ultaquil, c'uxn tzeyal-l 'a eb' 'anma'. Yet' jun tzo'n̈ xo tas tzlaj in c'ultac alc 'a e chiquin, c'uxn tzlaj eyal-l 'a yoltc caye. 28Man̈ ex xiw 'a eb' tztac' smiln e niwnal tic, yujto a e pixan matz tac' smiln eb'. Palta a 'a Dios tzex xiwi, yujto a tztac' satn 'el e pixn yet' e niwnal, tz'at 'a infierno yu'uj.

29'Iltec e no cotc ch'ic. A yic tzchon̈x e no', chawn̈ e no 'a centavo, palta may junc e no tzcomm chami toto man̈ 'ichcta tznib'j qui Mam Dios. 30-31Palta ax xo tic, yel xo wal niwn eyel'ch 'a yib'n̈ e no'. An̈jtona xil e jolom, c'uxn b'isb'il yuj Dios. Yuj cha, caw man̈ ex xiwoc.

A eb' matz q'uixw yuj Cristo

(Lc 12.8-9)

32Tzann̈j mach matz q'uixw yaln 'a sat eb' 'anma', to wic eb', an xo tic, 'oj wal eb' wico'oc 'a yojltac qui Mam Dios 'ayc' 'a satcha'an̈. 33Palta ax eb' tzaln 'a sat eb' 'anma', to man̈ wico'oc eb', an̈jtona 'in, 'oj wal 'a qui Mam 'ayc' 'a satcha'an̈, to man̈ wico'oc pax eb'.

Yuj Jesús 'ay eb' 'oj yac' owl sb'a

(Lc 12.51-53; 14.26-27)

34Man̈ e na', to in jaw wul wac' junc'ojlal 'a eb' 'anma 'a yolyib'n̈q'uinl tic. Man̈ yujoc yoch junc'ojlal 'a scal eb' in jawi, palta yuj yoch owl 'a scal eb'. 35In jawi, sec wach' 'ay eb' winc 'oj yac' owl sb'a yet' smam. 'Ay eb' 'ix 'ix 'oj yac' owl sb'a yet' snun. 'Ay eb' 'ix 'alb'al 'oj yac' owl sb'a yet' yalib'. 36Yuj cha, a eb' jun yaj yet' junc mach 'a yol yatut, atn eb' 'oj sutmjc 'och 'ajc'ojlal 'a 'a.

37A mach yel xo niwn tzchamc'ojlej smam snun 'a wib'an̈, man̈ smojc eb' yoch wico'oc. An̈jtona', a mach yel xo wal niwn tzchamc'ojlej yunnal 'a wib'an̈, man̈ smojc yoch eb' wico'oc. 38A mach matz yal sc'ojl tzyab' syal wuj 'icha 'oj waj 'a spenc culus, man̈ smojc yoch wico'oc. 39A eb' ton̈j tznib'j colchjoc sb'a 'a yolyib'n̈q'uinl tic, 'oj satl sq'uinl eb' 'a jun 'ejmn̈ej. Palta ax eb' 'oj yac' cham sb'a wu'uj, atn eb' 'oj scha sq'uinl 'a jun 'ejmn̈ej.

A eb' 'oj chanc spac yic 'a Dios

(Mr 9.41)

40A eb' tzex chani, an tzin schaj eb'. Ax eb' tzin chan cha, wan schan pax eb' jun checjnacn coti. 41A eb' tzchan junc schecb' Dios, yujn̈ej to schecb' Dios yaji, 'oj scha eb' spac 'icha yic eb' schecb' Dios cha. A eb' tzchan junc mach tojl sb'eyb'al, yujn̈ej to tojl sb'eyb'al, 'oj scha eb' spac 'icha yic eb' tojl sb'eyb'al cha. 42Tzann̈j mach tzsiyn junc vaso sicl a 'a junc eb' in cuywum, wach'xam junc may wal yel'chi, palta yujn̈ej to in cuywum, wal yel 'oj scha spac.#Mt 10.42 A slum eb' israel, caw wal c'a'l lu'um, tacn̈ sat paxi, yuj cha, a yic tzsiyx junc vaso sicla', caw niwquil colwjum 'a eb' b'eymal 'anma tzyab'i.

Currently Selected:

Mt 10: CSS

Highlight

Copy