Mt 1
1
A sb'i eb' smam yichm Jesucristo
(Lc 3.23-38)
1A jun libro tic tzaln cot yab'xil Jesucristo yin̈tl can David, yin̈tl pax Abraham. Atn sb'i eb' smam yichm Jesucristo tic.
2A Abraham a 'ay yunnal Isaac, ax Isaac a 'ay yunnal Jacob, atn smam Judá yet' jun tzo'n̈ xo eb' yu'tac. 3A Judá a 'ay yunnal Fares yet' Zara, Tamar sb'i snun eb' chawn̈ tic. A Fares a 'ay yunnal Hesrón, atn smam Aram. 4A Aram a 'ay yunnal Aminadab, ax Aminadab a 'ay yunnal Naasón, atn smam Salmón. 5A Salmón a 'ay yunnal Booz, Rahab sb'i snun Booz cha. Ax Booz a 'ay yunnal Obed, Rut sb'i snun Obed cha. A Obed a 'ay yunnal Isaí. 6A Isaí, atn smam rey David. A David a 'ay yunnal Salomón, a snun Salomón, atn 'ix yistzil can win Urías.
7A Salomón, a 'ay yunnal Roboam, ax Roboam a 'ay yunnal Abías, atn smam Asa. 8A Asa a 'ay yunnal Josafat, ax Josafat a 'ay yunnal Joram, atn smam Uzías. 9A Uzías a 'ay yunnal Jotam, ax Jotam a 'ay yunnal Acaz, atn smam Ezequías. 10A Ezequías a 'ay yunnal Manasés, ax Manasés a 'ay yunnal Amón, atn smam Josías. 11A Josías a 'ay yunnal Jeconías, yet' eb' yu'tac. A 'a jun tiempoal cha, ata 'ijxnac 'at eb' israel 'icha presoal 'a Babilonia.
12A yic 'ayx 'ec' eb' 'a Babilonia cha, 'ix 'alj Salatiel yunnal Jeconías. Ax Salatiel a 'ay yunnal Zorobabel. 13A Zorobabel a 'ay yunnal Abiud, ax Abiud a 'ay yunnal Eliaquim, atn smam Azor. 14A Azor a 'ay yunnal Sadoc, ax Sadoc a 'ay yunnal Aquim, atn smam Eliud. 15A Eliud a 'ay yunnal Eleazar, ax Eleazar a 'ay yunnal Matán, atn smam Jacob. 16A Jacob a 'ay yunnal José win yichmil 'ix María, 'ix snun Jesús. A Jesús tzcuch pax Cristo, atn jun 'Ac'b'il Yopiso Colwjumal.
17Yuj cha, chequel to 'ay chan̈lajn̈ c'aj smam yichm Jesucristo 'aycn 'a snan̈l Abraham yet' David. 'Ay chan̈lajn̈ c'aj pax eb' 'a David, masnto yic yijx 'at eb' israel 'icha presoal 'a Babilonia. 'Ay chan̈lajn̈ c'aj pax eb' yictax yijx 'at eb' 'a Babilonia cha, masnto yic yalj Cristo.
A yaljub'al Jesucristo
(Lc 2.1-7)
18'Ixtc 'ajnc Jesucristo yalji. A José tox 'ix yac' strato yet' María, ton̈j nant tzyac' eb' strato, mantzac yij sb'a eb'. Palta ax María, 'ayx tz'i'n yuj jun 'unin, yujto a Yespíritu Dios x'a'n pitzwc 'a 'a. 19A José cha, caw tojl snab'en, palta ma'ix snib'j tzchecltej 'el 'ix 'a scal eb' 'anma'. Ton̈j snib'j tzsatcn 'ejm jun strato eb' chi 'a c'ultaquil. 20Ax yic wan snan win José jun cha, 'ay jun yángel Cajlil 'ix ch'ox sb'a 'a win 'a swayich, 'ix yaln 'a 'ixtic:
—José, ach yin̈tl can David, man̈ ach xiw e'n a b'a yet' 'ix María tic, yujto a Yespíritu Dios 'ix 'a'n pitzwc jun 'unn chi 'a 'ix. 21A jun 'unn 'oj 'aljoc cha, winc 'unin. 'Oj ac' sb'ic JESÚS,#Mt 1.21 Jesús, tzyal 'el'chi "A Dios Colwjum." yujto a 'oj colnc can 'elt eb' schon̈b' 'a yaln̈ smul, xchi jun ángel 'a José cha.
22'Ixta x'aj jun tzo'n̈ chi sb'o'i, sec tz'el'ch tas yaljnac can Cajlil, yic ya'n yal jun schecb' 'ixtic:
23'Ay jun cob's 'ix, mant 'a xon junc winc tzyi'aj, palta 'oj pitzwc chan̈ jun 'unn 'a 'ix. 'Oj 'aljoc jun swinc 'unin, ax ya'n sb'ic Emanuel, xchi. (Emanuel tzyal 'el'chi, 'ayc' Dios quet'oc).
24Ax yic x'el swayn̈ José cha, sb'on 'icha xyutj yaln jun yángel Cajlil chi 'a 'a. 'Ixta to b'i'an, 'ix chan pax sc'ojl win yi'n 'ix. 25Palta mant 'ic yij sb'a yet' 'ix, masnto x'alj jun 'unn cha. Ax José x'a'n sb'ic Jesús.
Currently Selected:
Mt 1: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.