Lv 27
27
Jun tzo'n̈ tas tz'ajx yico'oc Jehová
1'Ix yaln pax Jehová 'a Moisés 'ixtic:
2Al yab' eb' et israelal to an tzwal jun tzo'n̈ tic: Toto 'ay junc mach tznib'n mannc 'el junc 'anma to ya'jnacx sti ya'n 'ayn an Jehová in, tztac' cab' smann 'eli, palta 'icha cab' yaln slistail tic, 'ixta tzyutj stojni.#Lv 27.2 'Ay 'aj 'ay eb' 'anma tzyac' sti ya'n 'och sb'a yico'oc Dios, mto junc yunnal, mto junc yisil, mto junc xo 'anma tzta'wj ya'n 'a 'a. Tzlajw cha, tznan pax sb'a to matz yac' 'a 'a; toto 'ixta', yowlal tztoj jac 'a win molm tumn 'a yatut Dios, yuj smann 'el can pax jun 'anma cha. 3A eb' winc junc'l ab'il sq'uinal masnto tzc'och 'a 60 ab'il, yowlal tz'ajx 50 q'uen tumn plata smanmb'iloc, a tzyal 'echtab' tzc'anx 'a in cajnub'. 4Toto 'ix, cojn 30 q'uen tumn plata tz'ajx yu'uj. 5Ax pax yuj eb' o'e ab'il sq'uinal masnto 'a sjunc'lil ab'il, toto winac, junc'l q'uen tumn plata tz'ajx yu'uj, ax toto 'ix, lajn̈e q'uen tumn plata tz'ajx yu'uj. 6Ax yuj eb' 'unn jun 'ujl sq'uinal masnto 'a o'e ab'il, a yuj eb' winc 'unin, o'e q'uen tumn plata tz'ajx yu'uj, ax yuj eb' 'ix 'unin, cojn 'oxe q'uen tumn plata tz'ajx yu'uj. 7Ax pax yuj eb' 'ichm 'anma 'ec'b'alx 'a 60 ab'il sq'uinal, toto winac, olajn̈e q'uen tumn plata chi tz'ajx yu'uj, ax yuj eb' 'ix, cojn lajn̈e q'uen tumn plata tz'ajx yu'uj. 8Palta toto caw meb'a junc 'anma cha, matz techj ya'n jun tojlb'al cha, a jun 'anma cha, tz'ijx cot 'a yojltac win ya'mal 'och sti eb' 'anma 'ayin, ax win tznani jantc wal tztechj ya'ni.
9A pax yuj e no noc' tz'ajx xajmb'al-l 'ayn an Jehová in, a smasnil no tz'ajx 'ayin, checl cab' tz'ajcn no'. 10Matz tac' sjelx no yet' junc xo no', wach'xam wach' no', mto ma'ay. A no tz'ajx sjelc no cha, cojn to tzcan no yet' no checl xon yaj cha.
11A pax yuj junc no noc' man̈ wach'c yoch xajmb'al-l 'ayin, 'ijx cot cab' no 'a win ya'mal 'och sti eb' 'anma cha, 12sec a win tznan 'eli, jantc stojl no'. A tzyal pax yilx 'och no', 'icha tzyutj win yaln stojl no cha, 'ixta cab' tzchon̈x no', sec chab'il stojl no chi wu'uj. 13A mach tz'a'n no noc' cha, toto tznib'j tzmancn pax no', yowlal tzyac' junc xo yomacn̈il 'a yib'n̈ 'icha xon yaj yalx can stojl no cha.
14A yic 'ay mach tznib'j yac' junc yatut ofrendail 'ayn an Jehová in, a cab' win ya'mal 'och sti eb' 'anma cha, a tz'at 'ilnoc jun n̈a cha, tznan 'eli jantc stojol. A tzyal yilx 'och jun n̈a cha, 'ixta cab' tz'ajcn stojl cha. 15Palta toto a mach tz'a'n jun n̈a cha, tznib'j tzmanx can 'ec' yico'oc, yowlal tzyac' junc xo yomacn̈il 'a yib'n̈ 'icha xon yaj snax 'el can stojol, 'ixta to b'i'an, tztac' yica'an pax jun n̈a cha.
16Toto 'ay mach tz'el 'a sc'ojl ya'n wico'oc jun c'ajoc slum an Jehová in, yowlal tznaxi jantc stojol, a tzyal jantc 'in̈t tz'awx 'a lu'um. A 'a junjn b'aln̈e arroba 'in̈t cebada tz'ejm 'a lu'um, ata tz'ajx 50 q'uen tumn plata stojloc lu'um. 17Toto tz'ajx lum lum chi wico'oc 'a yic 'ayx yab'lil yel junc tas 'a libre, jun 'ejmn̈ej tzcan stojl lum 'icha tz'aj snax can 'el cha. 18Palta toto 'e'nc xo jun ab'il cha, yic tz'ajx to lum 'ayin, ax win ya'mal 'och sti eb' 'anma cha, a win tznan 'eli, jantc q'uen tumn plata chi smoj yajxi, tz'ijx 'emt jac stojl lu'um, a tzyal jaye xoj ab'il yelx can lum 'a libre.
19Toto a mach tz'a'n lum lum cha, tznib'j smanx can 'ec' lum yico'oc, yowlal tzyac' junc xo yomacn̈il 'a yib'n̈ 'icha stojl lum nab'il can 'el cha, 'ixta to b'i'an, tzyica'an pax jun 'anma chi slum cha. 20Palta toto man̈xtzac techj smann can pax winac, mto chucx mach 'aj tzchon̈o, toto 'ixta', man̈x 'a b'a'n̈ tztac' smann 'ec' win yico'oc lu'um. 21A yic 'oj colchjoc can 'el lum lum chi 'a jun ab'il yic tz'el junc tas 'a libre, a jun lum cha, wic tz'ajcn an Jehová in, ax ewin ya'mal 'och sti eb' 'anma cha, a ewin tz'ica'an lu'um.
22Toto 'ay mach tz'el 'a sc'ojl ya'n junc smanb'il lum wico'oc an Jehová in, man̈ smacloc yaj yuj smam snun, 23ax junc win ya'mal 'och sti eb' 'anma cha, a win tznan 'el stojl lum yet' jun mach tz'a'n lum cha, masnto tzjapx jun ab'il yic tz'el jun tzo'n̈ tas 'a libre. A 'a jun c'u 'aj tzb'ocn stojl lum cha, ata cab' tzya'cn jun 'anma chi sti yuj stojl lu'um, sec a q'uen tumn chi tz'och wico'oc an Jehová in. 24Ax 'a yic tzjaw jun ab'il yic tz'el jun tzo'n̈ tas 'a libre, ata tzcolchj can pax 'el lu'um, tzcanx can lum 'a win 'ay xon yic lum lum cha, atn win chon̈jnac lum cha.
25A smasnil stojl tas tznax 'el yuj win ya'mal 'och sti eb' 'anma cha, lajnn̈ej tz'aj 'icha q'uen tumn tzc'anx 'a in cajnub', junc'l geras,#Lv 27.25 Jun gera matz q'ue'ch yal-l 'a mel-l gramo. Jab'xoj may 60 gera 'a jun onza. tzyal 'el'chi jun siclo.
26Palta a sb'ab'l 'une e wacax, e calnelu mto e chiwo, a jun tzo'n̈ noc' cha, wic xon yaj e no an Jehová in, yuj cha, may junc mach tztac' yalni to tzyac' no ofrendail 'ayin. 27Toto a junc sb'ab'l 'une junc no noc' matz tac' yoch xajmb'alil, yujto 'ay spaltail, tztac' cab' smann pax win 'ay yic no cha, tzyac' win stojl no 'icha yaj snax can 'eli. Tzya'n to pax win junc xo yomacn̈il 'a yib'n̈ 'icha stojl no cha, palta toto man̈oc win 'ay yic no chi tzmann can pax 'el no', to 'ixta', tztac' schon̈x 'el no 'icha xon stojl cha.
28A mach tz'a'n junc tas wico'oc 'a jun 'ejmn̈ej an Jehová in, yaln̈ej tas 'ay 'a 'a, toxn̈ej 'anma', mto noc', mto lum tz'ajx yico'oc yuj smam snun, a jun tzo'n̈ chi tz'ajx wico'oc an Jehová in, matz tac' schon̈xi, matz tac' smann can pax 'ec' mach tz'a'n cha. 29A pax junc 'anma to 'aych xon chaml 'a yib'an̈, matz tac' smanx 'eli, a jun cha, yowlal tzchami.
30A slajn̈c'ajil sat 'awb'en tzyac' lum lu'um, a jun tzo'n̈ cha, wicn̈ej yaj an Jehová in. 31Toto 'ay mach tznib'n mannc 'el jun yic slajn̈c'ajil cha, yowlal tzyac' junc xo yomacn̈il stojl 'a yib'n̈ 'icha xon stojl cha.
32A yic sb'isx no cajb'en noc' 'a junjn ab'il, a junjn lajn̈wan̈ no', ata tz'ijx 'el junjn wic an Jehová in, atn no wacax, no calnelu yet' no chiwo, atn no chi tz'ajx diesmoal 'ayin. 33Matz tac' si'lx no 'a scal no wach', yet' no tz'on, matz tac' pax sjelx no yet' junc xo no'. Toto 'ay mach tznib'j jelnc no', a no tz'ajx sjelc no cha, ton̈j tzwach' can no yet' no b'ab'l cha. Matz tac' smanx 'el no', xchi Dios 'a Moisés.
34Atn jun tzo'n̈ checnb'il tic 'ix yac' Jehová 'a Moisés, yic 'ayc' 'a lum jolm witz Sinaí, sec tz'och scuynb'ilc chon̈b' Israel.
Currently Selected:
Lv 27: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
