Lm 5
5
Slesl eb' 'aj Jerusalén
A eb' 'aj Jerusalén xleslwi eb' 'ixtic:
1Mamin Jehová, na coti jantc wal tas x'ec' 'a quib'n̈ on̈, 'ilt wal tzon̈ 'aj quixtx on̈.
2Smasnil tas 'ay 'ayn̈ on̈, yol sc'ab' eb' chuc chon̈b'al xo 'aj 'ayq'ui. A catut on̈, yic xo eb' chuc 'anmal yaji.
3Meb'a 'unn on̈ 'ajcn on̈, man̈x 'a qui mam on̈, ax eb' qui nun on̈, 'ix can eb' sch'ocoj, man̈x 'a yichmil eb'.
4A ca'al yet' qui c'atztz tzqui c'ana, to tzqui man on̈.
5'Ayn̈j 'och eb' 'ajc'ojl on̈ spechn b'eyc'oc on̈, caw tzon̈ c'unb' quec' on̈, palta matz nib'j eb' tzon̈ 'ilj xon jab'oc.
6Xqui b'acht qui c'ab' 'a eb' 'aj Egipto, yet' 'a eb' 'aj Asiria, yuj qui chan jac tas tzqui c'ux 'a eb'.
7A eb' qui mam quichm on̈, a eb' 'ochnc smul, palta chamnc xo eb'. Ax ticnec, a 'a quib'n̈ tzjaw yailal yuj smul eb' cha.
8A ticnec, 'ayn̈ 'och 'a yol sc'ab' eb' 'aych mosoal, may mach tzon̈ coln 'a eb' on̈.
9Scal xiwc'ojlal tz'at quic' jac tas tzqui c'ux on̈, yujto 'ay smay yuj eb' 'a'm owl 'a lum cusltac lu'um.
10Caw wal tz'a qui tz'umal yuj c'ac' tzpitzw chan̈ 'ayn̈ yuj wejl on̈.
11A wal 'a chon̈b' Sión yet' 'a jun tzo'n̈ xo chon̈b' 'ay 'a Judá, caw tz'ixtx eb' 'ix 'ix yet' pax eb' 'ix cob'stac 'ix yuj ewin winac.
12'Ix q'ue t'un̈n eb' qui yajlil yuj eb' 'ajc'ojl yajch 'ayn̈ on̈, man̈x 'a xon jac yel'ch eb' 'ichmtac winc 'a sat eb'.
13A eb' quelm caw 'ay yip, 'ix 'ajx 'och eb' chenoc, ax eb' quelmtac 'unin, 'ix laj telw eb' 'a yaln̈ sc'atzitz.
14Man̈x 'a eb' 'ichmtac winc tz'em wocn 'a sti spuertail chon̈ab' yic tzb'eyc'ojlwi, man̈x 'a pax eb' quelm 'unn tz'ab'x sb'itni.
15Man̈x 'a xon jac qui tzaljc'ojlal on̈. A chan̈l yic tzaljc'ojlal, 'ix meltzj 'och 'a cusc'ojlal.
16Man̈xtzac on̈ b'inax 'icha 'a yic yalan̈, caw 'oltac tzon̈ 'aj on̈, yujto 'ix 'och qui mul on̈.
17Yuj cha, caw ya caj tzcab' on̈, caw wal tz'och pax 'a qui sat on̈.
18A chon̈b' Sión, 'ix lan̈chj 'ejm can smasnil, axn̈ej no wax tzlaj 'ec' ta'.
19Ach xo tic Mamin Jehová, caw wal Yajl ach 'a smasnil tiempo; 'ayc'n̈ej opiso 'a jun 'ejmn̈ej.
20¿Tas yuj xac' sat a c'ojl 'ayn̈ 'a jun 'ejmn̈ej on̈? ¿Tas yuj caw niwn xo tiempo qui can oj on̈?
21Mamin Jehová, 'ij on̈ meltzjoc pax 'aych jun 'ejm xo on̈, caw tzqui nib'j tzon̈ meltzj paxi. Comnoc wach' tz'ec' cuj jun 'ejm xo, 'icha xon caj 'a yic yaln̈tax on̈.
22Palta ach tic, jun 'ejmn̈ej on̈ a patquilj 'el on̈, yel xo xcot yowl a c'ojl 'a quib'n̈ on̈.
Currently Selected:
Lm 5: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
