Jos 16
16
Slum Efraín yet' Manasés
1A lum lum 'ix yij eb' yin̈tl José, 'ix 'el yich lum 'aj tzq'uel c'u 'a a Jordán 'a 'aj tzpac' a a yic Jericó, tz'e'x 'a cusltac lum 'a jolmctac witz, tz'at 'a Jericó tzc'och 'a Bet-el. 2A Bet-el, a pax tzcuch Luz 'a pecti', tz'e'x 'a slum eb' arquita, masnto 'a Atarot. 3Tz'atx lum 'a stojlal 'aj tz'em c'u atn 'a slum eb' jafletita, masnto 'a smon̈jonal yic Bet-horón lum 'a yaln̈ 'ejmi, masnto tzc'och 'a Gezer, tz'elx c'och pax lum 'a a Mar Mediterráneo. 4Atn lum tic schaj eb' yic Manasés yet' eb' yic Efraín smacl lumoc, atn eb' yin̈tl can José.
Slum eb' yin̈tl Efraín
5A smon̈jonal slum eb' yin̈tl Efraín, tz'el yich 'a stojlal 'aj tzq'uel c'u, 'a Atarot-adar masnto tzc'och 'a Bet-horón, lum 'a yib'n̈q'ue'i. 6Tzlajw cha, tz'atx lu'um, masnto tzc'och 'a a Mar Mediterráneo. A 'a snorteal slum eb' cha, ata 'ay Micmetat, axta tzmeltzj smon̈jonal chi 'a stojlal 'aj tzq'uel c'u, masnto 'a Taanat-silo. Tzlajw cha, tz'e'x 'a Janoa, 7tz'atx ta', axta tz'emch 'a Atarot yet' 'a Naarat, masnto tzyamchj Jericó yu'uj, axta tz'el'ch 'a a Jordán. 8Tz'elx 'a Tapúa, axta tz'atx can smon̈jonal 'a stojlal 'aj tz'em c'u, masnto tzc'och 'a a niwn a 'a yol yic Caná, axta tz'el'ch 'a a Mar Mediterráneo. Atn lum tic xyij can eb' yin̈tl Efraín, 'ix pojx 'ec' lum 'a junjn macn̈ yin̈tl eb'. 9'Ayt pax jun tzo'n̈ xo chon̈ab', yet' jun tzo'n̈ xo aldea 'ayc' 'a sat slum eb' yin̈tl Manasés, 'ix yij eb' yin̈tl Efraín pax yico'oc. 10Palta a eb' yin̈tl Efraín, ma'ix pechx 'el eb' cananeo cajn 'a Gezer yuj eb', 'ix 'ajx pural eb' ya'n stojlb'al. Yuj cha, 'ix cann̈j eb' cananeo chi 'a scal eb'.
Currently Selected:
Jos 16: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
