Job 39
39
1¿Ojc ama tas tiempoal tz'alj yune e no calte'al chiwo? ¿'Ayxam 'aj tzela tas tz'aj yalj yune e no c'ultquil chej?
2¿Ojc ama jaye 'uj scuchn chan̈ e no yune', 'ixta to b'i'an, tz'alj yune e no cha?
3A yic tz'alj yune e no cha, to tzmotz' sb'a e no' sec tz'ec' syal no 'unn cha.
4A yic tz'och yip e no cotc cha, tz'atcn e no 'a calte', man̈xtzac japx e no 'a snun cha.
5¿Mach 'ix 'actn can 'el no calte'al b'uru tza na'a? ¿Mach 'ix alni yuj cha libre yaj no'?
6An xwala 'aj tzcan cajn no', ata xwa'cn 'at no 'a cusltac lu'um, 'a lum niwc pan̈n 'a'lic 'aj may wal c'ultac.
7Matz nib'j no tzcan 'a 'aj 'ay 'anma', yujto til wal 'aw tzyab' no', matz nib'j pax no to tz'och 'a yaln̈ 'icatz.
8A 'a eb' lum tzalctac, ata tz'ec' say wa sb'a no', a te 'unn c'ultac, a te tz'ec' say no slo'.
9¿Tzam a na ach tic to a junc no simbron wacax 'oj yal sc'ojl no smunlj jac a munljel, mto tza mac no junc 'ac'wl 'a yol a colal?
10¿'Ojm stac' a'n q'ue te yugo 'a sjolm no', yic tza'n t'ocwc lum no', 'oj yal am sc'ojl no yoch tza'n o'oj?
11¿Tom yuj caw 'ay yip no', yuj cha, ax cob' a'nc yipc a c'ojl no yuj a munljel?
12¿Am tza na'a to 'oj stac' a c'ann no', yic 'oj a molnc chan̈ tas tzyac' a munljel, mto 'oj a c'an no te'j trigo 'a a te'lab'?
13'Iltnab'n no avestruz, 'ay cob' sc'axl no 'icha no cigüeña, palta matz tac' sjen̈w no'.
14A yic tzya'n no sn̈olob', a 'a scal arena ata tzmuccn no sn̈olb' cha, sec ax sc'a'l yoc c'u a chi tz'a'n q'uixnjoc no n̈olb' cha.
15Toc tzuj snan no' toto 'ay mach tz'ec' te'nc poj sn̈olb' no cha, mto junc no noc' tz'ec' 'a yib'an̈.
16Caw tu snab'en no 'a no yune cha, 'icha to man̈ yico'oc no'; toc 'ay yel'ch no n̈olb' chi 'a no', toxn̈ej matz 'elt no cotc cha.
17Yujto an ma'ix wac' snab'en no', yuj cha, 'ixta tzyutj sb'a no',
18palta yic tzq'ue wan no', tzya'n no carela, ton̈j tzewj can no yuj no chej cob' tz'och tza'n yu'uj, yujto matz techj sb'ey no chej chi 'a no'.
19¿Tom ach 'ix ac' yip no chej? ¿Mach 'ix 'a'n pitzwc xil sjaj no' sec wach' yilx no'?
20¿Tom o'oj tztac' sb'atj chan̈ no 'icha no b'ojch'in, ax yic tzjormj yol sn̈i no', caw tzxiw eb' 'anma'?
21Tzmac' 'ejm no sc'ab' tz'ec' no 'a lum 'a'lic, matz xiw xon no jac s'at 'a owal.
22Toc yojc no' toto 'ay tas 'ay smay, toc tzxiw no'. Matz meltzj no 'a spatc yuj q'uen espada tzjaw 'a yojltac,
23wach'xam tzchil-lji q'uen q'uen 'aych 'a win 'ay q'ue 'a yib'n̈ no'. Wach'xam tzcoplji q'uen yespada mto q'uen slanza ewin 'ajc'ojol, palta matz xiw no'.
24A yic tz'oc' no cacha yic owal, yet' wal smasnil yip no chej cha, tzya'n no' carela s'ati, toxn man̈xtzac yal sc'ojl no tz'och wa'an.
25A yic tz'oc' no cacha cha, tz'oc' pax no chej cha; najt to wal sc'och no', tzyab'n no' to 'ay owal, tzyab'n pax no yel yaw eb' capitan̈.
26¿Jeln ach ama, tztac' am aln 'a no c'uc'um yic tz'at jen̈n̈oc no 'a stojlal sur?
27¿Ach am tzal 'a no salt'iw yic tzb'on no yet'l 'a caw cha'an̈?
28A 'a c'ual yet' 'a 'ac'wal, ata 'ayc' no 'a sat eb' q'uen tenam, mto a 'a sjolm eb' q'uen tenm chi tzc'ub'j 'el sb'a no'.
29Ata tzmac no yil 'a chan̈ cha, 'aj tz'at yic' no schib'ej.
30A chic', a 'i'n pitzn e no yune no cha, a 'aj 'ay sniwnal junc no chamnc noc', ata 'ayc'n̈ej no', xchi Dios.
Currently Selected:
Job 39: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
