Job 37
37
1A yic tzwiln sjaw junc 'ic'n̈ab', caw wal tzin xiwi, ax in pixan, toxn̈ej tztin̈tin̈n yib'xi, 'icha to tzjul 'elt sb'a tzwab'i.
2'Ab'tec wal sc'an̈ c'u, a jun cha yol sjaj Dios. A 'a yol sti tz'elt jun tzc'an̈ cha.
3A tz'a'n 'ec' copljoc raya 'a satcha'an̈, tzya'n q'ue wan letz'lom 'a junjn sti 'aj tzlajw c'och lum lum tic.
4Tzlajw cha, tz'ab'x sc'an̈ yol sjaj Dios jun 'ay yopiso 'a yib'n̈ smasnil; ya' sb'a tzc'an̈ cha, til wal yec' copljoc raya, toxn matz 'och wa'an.
5Caw satjub'tac yab'x sn̈il-li yol sjaj Dios, til wal tas niwn yel'ch tzb'o'o, palta may mach tztac' yojcan 'eli.
6A tzalni yic tz'em q'uen sacb'acm 'a yib'n̈ lum lum tic, tzya'n cot pax n̈ab' yel xo wal 'ay smay.
7A tz'a'n smol sb'a eb' 'anma 'a yol yatut, sec tzyojquej 'el eb' tas wan sb'on Dios.
8Ax e no noc', tzlaj 'och e no sc'ub'c 'el sb'a 'a yojl eb' q'uen n̈aq'ue'en.
9A 'a stojlal sur, ata tzcot 'ic'n̈ab', ax 'a stojlal norte, ata tzcot sic yuj 'ic'.
10Yuj yic' Dios, tzpitzw q'uen che'ew, ax eb' a niwc a', c'uxn tzchewb'i can 'el eb' a yuj q'ue'en.
11A tz'a'n b'ut'joc 'och a a chi 'a scal 'asun, ax 'a scal chi tzpitzw chan̈ raya.
12Cojn 'aj tznib'j Dios tzyac' n̈ab', cojn ta tz'och 'asn 'a satcha'an̈; 'ixta tzyutj 'asn chi syiclni tas tzalx 'a 'a, yic tzya'n 'emt n̈ab' 'a sat lum lu'um.
13A yet' jun tzo'n̈ chi tztac' ya'n cot Dios yowl sc'ojol, mto yic tzya'n pax swach'c'ojlal 'a sat lum lum tic.
14Mamin Job, 'ac' techjoc a maclni ab' tas tzwal tic, tza nan wal si'mb'il, chajtlto caw satjub'tac yilx tas tzb'o Dios.
15¿Tzam nachj 'el o'oj tas tzyutj Dios sc'anlb'an jun tzo'n̈ tic? ¿Ojc ama tas tz'aj spitzw chan̈ letz'lom 'a scal 'asun?
16¿Tzam nachj 'el o'oj tas tz'aj yoch wan 'asn 'a scal 'ic'? A jun cha, a tzch'oxn 'el sjelnal Dios to caw satjub'tac yilxi.
17Ach tic caw teb'il xoj tztechj c'ac' 'oj 'a yol a pichul yic tzyi'n cot Dios 'ic' 'a stojlal sur, yuj cha, siclab'nac tz'aj sat lum lum tic.
18¿Tzam stac' a colwj jac yet' Dios yic tzjen̈n 'at satchan̈ tic, 'icha tzyac' junc q'uen q'uen tzatz tz'ajcn 'a yet'ul?
19Al 'ayn̈ ticnec tas wach' caln 'a Dios, yujto 'icha scal q'uic'q'uinl 'ayn̈ ticnec, man̈xtzac nachji tas tzcala.
20An tic, matz in te'wtzej in b'a walni to tzin paxtin yet' Dios. Toto tzin c'an paxtinc in b'a yet'oc, 'icha to wan wi'n cot chaml 'a wib'an̈.
21Toto tzq'uic'b' 'och 'asn 'a satcha'an̈, man̈xtzac stac' quilnec xon jac yoc c'u; palta toto tzjacw 'elt 'ic', caw pilmtac tz'ajx satcha'an̈, sja'l quilnec paxi.
22A 'a stojlal norte, caw wal tzictzni tz'aj 'icha yilx q'uen oro, caw tzsat qui c'ojlec yuj stzictznil Dios.
23Matz tac' cojcanec 'eli jantc wal spoder Dios tztac' yuj smasnil, yujto man̈x yalnb'ilc sjelnal. Caw tojl paxi, wach' snab'en, may junc mach tzcomn 'ixtej.
24Yuj cha, caw wal 'ay xiwc'ojlal 'anma 'a 'a. Toc 'ay jac yel'ch eb' tzyal jelnal sb'a 'a Dios, xchi Eliú.
Currently Selected:
Job 37: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
