Job 32
32
A jun tzo'n̈ tas xyal win Eliú
1A yic xyiln ewin 'oxwn̈ cha, to yelc'ojlal tzte'wtzej sb'a Job yalni to may smul, yuj cha, 'ix yactn ewin sten sb'a yet'oc. 2Palta 'ay junx quelm winc 'ayc' yet' eb', 'aj chon̈b' Buz, Eliú sb'i, yunnal Baraquel yic eb' yin̈tl can Ram. Caw wal man̈x 'ic techj syamn 'och wan sb'a scot yowl 'a Job, yujto an̈ja yaln Job chi wach'l sb'a, yic tzya'n can 'at jun tzo'n̈ chi 'a yib'n̈ Dios. 3'Ix cot pax yowl 'a eb' 'oxwn̈ swach'c'ojl Job cha, yujto ma'ix nachj 'el yuj eb' tas 'ix yutj eb' ya'n spac spaxti', palta an̈ja 'ix yaln̈j eb' to caw 'ay smul winac. 4Yujto quelm winc to Eliú 'a scal jun tzo'n̈ xo eb' cha, yuj cha, 'ix stan̈wni slajw spaxtin eb' 'ichm winc chi yet' Job. 5Palta ax xyiln winac to man̈xtzac stac' ya'n eb' 'oxwn̈ chi spac 'a Job, yuj cha, man̈x 'ic techj syamn 'och wan sb'a. 6'Ix syamn 'och yaln yic 'a scal eb' 'ixtic:
Sb'ab'l paxti Eliú
An tic, quelm in to winac, ax xo tic, 'ichm exx winac, yuj cha, ma'ix in comn 'alj in nab'en 'a scal eyico'.
7'Ixtc xwutj in nani: Paxtin cab' eb' 'ichm winc tic, yujto caw wal 'ay snab'en eb'; til xo wal tas yojc eb', sch'oxl cab' eb' sjelnal cha, xin chi.
8Palta wal yel, 'ayn̈j snab'en smasnil 'anma', yujto a Dios tztac' yuj smasnil, a 'ix 'a'n 'och yespíritu junjn mach.
9Man̈ yujoc to til xo wal yab'lil tzyil junc mach, man̈ yujoc cha 'ay sjelnal; man̈ yujoc yichm wincal junc mach, man̈ yujoc cha, caw wach' snachj 'el junc tas yu'uj.
10Yuj cha, tzwaln 'ixtc 'ayex: A ticnec, comnoc tzeyab' pax jac wic 'oj wala', yujto 'ay pax tas tzin nib'j wala'.
11An tic, xin maclj wab' tas xlaj e say eyala', sictac waji yic ex laj paxtini. 'Ix wil wal e sayn jun tzo'n̈ tas wach' xcob' laj eyal coti.
12Palta may xon junc ex xtechj e pacn 'a Job, 'icha wal tas smoj spacx 'a 'a.
13Xeyalt wal jelnal e b'a, palta ma'ix stac' eyu'uj. Yuj cha, a Dios 'oj 'a'nc spac spaxti Job.
14Man̈oc 'ayn xyal Job jun tzo'n̈ spaxti tic, yuj cha, ma'oj in pac 'a 'icha xeyutj eyaln 'a ax tic.
15Mamin Job, a eb' 'oxwn̈ 'ichm winc tic, caw somchjnac eb', toxn ma'ix stac' spacn eb' tas 'ix ala;
16palta an tic man̈ sictacoc 'oj waji, wach'xam a eb' tic sictac x'aj eb', yujto man̈x 'a tas wach' yaln eb', man̈xtzac nachj yuj eb' tas tzyutj eb' spacni.
17Yuj cha, an tic 'oj wa'ch in b'a 'a scal jun tzo'n̈ paxti tic, 'oj wal pax tas nab'il wu'uj.
18Til wal tas tzin nib'j wala', man̈xtzac techj in yamn 'och wan in b'a yet' tas nab'ilx wu'uj.
19'Ijn wal tzin n̈i'chj 'at yuj jun tzo'n̈ in paxti chi tzwab'i, 'icha tzyac' no 'ac' tz'um yuj te yal uva tzjaw sti 'a yojol.
20Yowlal 'oj wal tas tzin nib'j wala'; sec 'oj choyb'oc tas 'ay 'a in nab'en, ax wa'n spac a paxti'.
21An tic man̈ chucchcoc yel 'anma 'a in sat; palta lajnn̈ej yel'ch eb' smasnil 'ayin.
22Wal yel, an tic man̈ in b'eyb'aloc to 'ay junc mach tzwij cha'an̈; toto tzin b'o 'ixta', tecn tzya'ch Dios in yailal, atn jun mach b'ojnac in.
Currently Selected:
Job 32: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
