Job 30
30
1Palta ax ticnec, a eb' quelmtac winac ton̈j tzin stzetzj eb', a 'a yic yaln̈tax cha, man̈ smojc xin chaj 'och wan smam eb' yet' e no in tz'i tztan̈wni in calnelu.
2A eb' cha, man̈x 'a tz'och yip eb' wu'uj, yujto wan xo laj yel yip eb'.
3Yuj meb'a'il yet' yuj wejel, tzsayn 'at sb'a eb' 'a lum cusltac lu'um; ax sch'an̈l yib' te tzjoy q'uet eb' sc'ux ta'.
4Tzlaj sayn eb' slo te 'itj caw c'a 'a scal waymtac; tzlaj saync eb' sc'ux yib' te meslab'.
5A eb' cha, pechb'il 'el eb' yuj eb' yit chon̈ab'. Tz'el yaw eb' 'anma', tz'at eb' 'a spatc eb', 'icha tz'aj spechx junc 'elc'um;
6ax 'a yoltc n̈aq'uen xcan cajn eb'. 'Ay eb' xlaj can 'a sat c'acap, 'ay pax eb' xlaj can 'a sat q'ue'en.
7'Ix laj 'awj chan̈ eb' 'a cal c'ultac, xlaj syamn sb'a eb' 'a yaln̈ yen̈l te q'uixte'.
8A jun tzo'n̈ 'anma cha, may xon jac tztac' yuj eb', quistal 'anma smam eb', pechb'il 'el eb' 'a scal yit 'anma'il.
9Ax ticnec, tzin laj sb'uch eb' yunnal eb', tzin laj yetz'tanc eb'.
10Caw wal tzin syaj eb', yuj cha tz'el eb' 'a in tz'ey, tzlaj tzub'n 'och eb' 'a in sat.
11Palta ax ticnec, ya' sb'a to xyij 'el Dios sat 'ayin, xin ya'n can 'och 'a yailal, caw wal man̈x 'a xon jac wel'ch 'a sat eb'.
12A eb' 'anma tzchichn 'och 'ayin, tzjaw wal ch'ucn eb' 'a in tz'ey yic tzin 'em yuj eb' snani, tzyamn 'och eb' yac' owl wet'oc, tznib'j eb' to tzin cham muc'uc.
13Tzmac eb' yol in b'e, yic tzin ya'n lajwc eb' snani; toc 'ay mach tztenn 'och wan eb'.
14'Icha to 'ay junc oln 'aj x'oxt eb' 'a yich smuroal chon̈ab', mto 'icha tzyac' 'ic'n̈ab', 'ixta x'aj sjaw tza'njoc eb' 'ayin,
15'ixta wal x'aj sjaw xiwc'ojlal 'ayin. Ax in b'inab'ilal, 'ix 'at 'elc 'icha s'at 'ic'. A smasnil tas 'ay 'ayin, 'ix satchan̈ 'icha tzyac' 'asun.
16A ticnec wan in chami, tas to yuj pitzn in; man̈xtzac 'och wan in yailal tic.
17A 'in yailal tic, c'uxn tz'och syal 'a yol in b'aquil; toxn matz 'och wan syail tz'ec' 'ac'wal.
18A Dios, 'icha wal to x'och b'ann 'a yib' in jaj, yet' wal yip sc'ab' sut'n 'och in pichl 'a in jaj, tzin stzicb'tan̈ni.
19In sjuln 'ejm 'a scal b'iq'uich, 'icha xoj wal pococ mto 'icha q'uen stan̈il c'ac', 'ixta xoj wilx 'a sat.
20Tzcob' in c'an a colwal ach in Diosal, palta toc tzach ta'w 'ayin. Tzcob' wal in b'a 'ayach, toc tza chaj ab' tas tzwala.
21Tu tzotj a nab'en 'ayin, tzin a pech b'ey yet' yowl a c'ojol.
22Tzin a'n yutz'c chan̈ 'ic', ax 'ic'n̈ab' tzin ac' tzicb'tan̈noc.
23Wojc xo to wan in e'n 'at 'a chamel, atn jun lugar 'aj 'oj c'och smasnil 'anma pitznto ticnec.
24Palta an tic, in cob' colwjoc 'a eb' meb'a', in colwj 'a eb' wan scham yuj meb'a'il.
25In laj 'oc' yet' eb' 'aych 'a syailal, 'ix 'o'ch pax in c'ojl 'a eb' may jac tas 'ay 'a 'a.
26Yuj cha, a tzaljc'ojlal xin tan̈wj sjawi, ax x'aji, a in cusc'ojlal xjawi; xin tan̈wj sjaw sacq'uinl 'a wib'an̈, ax x'aji, a q'uic'q'uinl 'ix jawi.
27Caw wal tz'ib'x in pixn yuj xiwc'ojlal, toc 'ayt jac 'iljel yu'uj; caw wal tan̈b'iln yuj yailal.
28'Ix jaw wal cusc'ojlal 'a wib'an̈, 'icha wal to man̈xtzac wil sacq'uinlal yoc c'u; wal 'a sat smasnil eb' 'anma', xcob' in q'ue wan in c'an colwal.
29Caw wal cusltac xoj yel waw 'icha no 'ocs 'a 'ac'wal, mto 'icha no chulpop.
30A 'in niwnal tic, caw wal tzchiwj smasnil yuj c'ac', 'ix q'uic'b' pax 'el in tz'umal.
31A 'a yic yaln̈taxi, tzlaj in yuc in arpa, tzwutz'n pax in 'amay, ax ticnec, cojxn 'oc'l tzin c'an in b'o yuj yailal.
Currently Selected:
Job 30: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
