Job 3
3
'Ix stzactzj chan̈ Job yuj syailal
1-2Xlajw yec' uque c'u cha, 'ix yaln win Job jun tzo'n̈ tu paxti 'a yib'n̈ jun c'u 'aj 'aljnac, xyaln 'ixtic:
3Caw tzin catb'ej jun 'ac'wl 'aj cuchb'iln chan̈ yuj in nun, tzin catb'ej jun c'ul 'aj 'aljnac in.
4Comnoc a jun c'u cha, 'ix ya'cn 'och sb'a 'ac'wlil, comnoc ton̈j xcan 'ixta yuj Dios, octom wal ma'ix sacb'xon 'eli.
5Comnoc 'ay junc tas q'uic'q'uinl x'ajch 'a yib'an̈ sec xq'uic'b' 'eli, mto a junc q'uic' 'asn tzc'ub'n 'eli, mto pax junc xo tas tz'ec' 'a sat sec x'och xiwc'ojlal 'a jun c'u cha.
6Comnoc q'uic'q'uinln̈ej x'ajcn 'a jun 'ac'wl cha, sec ma'ix 'och jun c'u chi sb'isloc jun tzo'n̈ c'u 'a jun 'uj 'a yol jun ab'il cha.
7Comnoc may tas 'ix uj 'a jun 'ac'wl cha, sec may jun tzo'n̈ 'aw yic tzaljc'ojlal xlaj 'ochi.
8Ax eb' cob' tzyalch sb'a to 'ay tas tztac' yu'uj, comnoc scatb'ej can eb' jun 'ac'wl cha, eb' tztac' ya'n 'och no Leviatán#Job 3.8 A no Leviatán tzb'inej win Job tic, am junc no noc' cajn 'a yojl a mar to b'inab'il no yuj eb' 'anma 'a yic pecti', tolab' tztup yoc c'u yuj no'. Mto a no lagarto tzyala. yiclumal.
9Comnoc wal ma'ix q'uel xon sacb'sun 'a yic jun sq'uin̈b'il cha, comnoc ma'ix tan̈wx xon sacb'i, yic sacb' cot yib'cha'an̈.
10Caw tzin catb'ej jun 'ac'wl 'aj 'aljnac in, yujto ma'in stench wan 'a yic xc'och stiempoal walji, alto ma'ay, tecn matz wil jun tzo'n̈ yailal tic yet' cusc'ojlal.
11Octom in cham 'a yol sc'ojl in nun, mto 'a yic in 'alji in chami.
12Octom ma'in smec' in nun yic in ya'n chuwoc yic in sq'uib'tzani,
13Comnoc chamnc in, to 'ixta', caw wal tzaljc'ojlal tzin wayi, caw wal tzin 'ilj 'a junc'ojlal.
14To 'ixta' junn̈j waj yet' ewin rey, yet' pax eb' niwc yopiso 'e'nc 'a pecti', eb' to b'ojnac chan̈ jun tzo'n̈ niwc n̈a lan̈chjnac xo 'ejmi,
15atn eb' niwc yajl xlaj sb'ut' yatut yet' q'uen oro mto plata.
16Octom in mucx 'icha junc 'e'lti 'unin, mto 'icha eb' chamnc xoni yic tz'alji.
17A 'aj tzmucx eb' maysch'olnil snab'en, ata tzlajw can c'och yixtn eb' 'anma'; a pax ta tz'ilj eb' 'ixtb'il yuj eb'.
18A pax ta tz'ilj eb' 'icha preso yaj yuj munljel, man̈x 'aj 'oj 'ab'xoc stumj eb' 'ilm munljel cha.
19Atnta 'ayc' eb' niwc winac yet' eb' may wal yel'chi. A pax ta 'ayc' eb' colchjnacx 'el 'a yol sc'ab' spatron̈, lajn xoj yaj eb' smasnil ta'.
20¿Tasm yuj tzyac' Dios sacq'uinl 'a yib'n̈ eb' tz'ixtxi? ¿Tasm yuj an̈ja ya'n sacq'uinl 'a yib'n̈ eb' 'aych 'a cusc'ojal?
21'Ay mach cob' tznib'j cham sb'a, palta matz cham paxi; wach'xam cob' tzsay tas tz'aj scham 'icha qui sayn 'ec' ricoal, palta matz 'ilchj yu'uj.
22At yic tzc'och junc 'anma chi mucxoc can 'a campusan, atta tzcan 'a tzaljc'ojlal.
23¿Tasm yuj an̈ja ya'n Dios sq'uinl junc 'anma man̈ yojcoc 'aj tzc'ochi, 'icha to macb'il yol sb'e chi yuj Dios?
24Tzcob' in nib'nc wa in b'a, palta ton̈j tzjaw si'snoc in c'ojl woq'ui, toxn matz 'och wan in c'acw wab'n syail.
25A smasnil tas tzin xiw sjaw 'ayin, atn wal jun tzo'n̈ chi xjaw 'a wib'an̈.
26A ticnec, man̈x 'a xon jac 'iljelal wu'uj, man̈x 'a xon jac swach'l waji; man̈x xon jac in junc'ojlal, cojxn yailal tzwila', xchi Job.
Currently Selected:
Job 3: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
