Job 29
29
Snajnac cot Job chajtl yilx 'a yic yalan̈
1Syamn 'och Job yaln jun 'ejm xo 'ixtic:
2Comnoc wal tztac' in c'ochx 'icha wal waj xon 'a yic jun tiempoal 'a yaln̈taxi, yic caw wal tan̈b'iln yuj Dios.
3A tzin tzictajni, yuj cha wach' wec' 'a scal q'uic'q'uinal.
4A yic quelm in winac, caw wal checl scolwj Dios wet'oc, yet' 'a tas 'ay 'a yol wet'ul.
5A 'a jun tiempoal cha, a Dios tztac' yuj smasnil, 'ayt 'ec' wet'oc, ax eb' wunnal, oyn 'och eb' 'a in tz'ey.
6Caw wal tzyac' sobra slech no 'in wacax, ax eb' te wawb'en olivo 'a cal q'ue'en, caw tzyac' sobra yaceiteal te'.
7A yic 'ay yamnil tz'och 'a yol chon̈ab', caw wal sayb'il in xila 'aj tzin 'emwocan.
8A yic tzin yiln eb' quelmtac winac, tzyij 'el sb'a eb' 'a yol in b'e, ax eb' 'ichmtac winac, tzlaj q'ue wan lin̈n eb' yic tzin yiln eb'.
9A eb' niwc winc 'ay yopiso, tz'och wan eb' spaxtin wu'uj, tzlaj sch'oxnc eb' senya yic sictac tz'aj eb'.
10A eb' niwc yajl cha, caw c'un xoj spaxtin eb', 'icha to tzlaj can tzayn yac' eb' 'a yol sjom.
11A yic tzyab'n eb' 'anma in paxtini, caw wach' tzlaj yal eb' 'a in patic, tzch'oxn eb' swach' nab'enal 'ayin.
12Yujto an tic, in laj colwj 'a eb' meb'a 'unn chamnc smam, yet' 'a eb' may xon jac tas 'ay 'a 'a, atn eb' may xon mach tzcolni.
13A eb' tzlajw 'ejm yuj meb'a'il, xyal eb' yuj diosal 'ayin; ax eb' 'ix 'ix chamnc yichmil, tzalj eb' 'ix yujto tzin colwj 'a eb'.
14A tojlal yet' yiclumal, a chi wic yaji; 'icha to in pichl yajch 'a junjn c'u.
15'Ix in quetz b'ey eb' matz uj yilni yet' eb' coxo, in colwj 'a eb'.
16'Icha to mamb'il waj 'a eb' 'ay tas sc'a'l tz'och yu'uj, tzin colwj pax in b'onyaj eb' chuc chon̈b'al yic 'ay tas tznib'j eb' sb'o'yaji.
17Xwij 'el yopiso eb' 'ixtm 'anma', xin coln eb' 'aych 'a yol sc'ab' eb'.
18'Ix waln 'ixtc yet' in nab'en: An tic, til wal sc'ul 'oj wila', lajn sb'isl 'icha yarenail sti a mar. Caw wal 'ichmal 'oj waj in cham 'elt 'a yol wet'ul.
19Lajn in 'icha junc te te 'awb'il 'a sti junc a', ax sc'ab' sja'l wal schan chicb'chan̈ tz'em 'a 'ac'wal.
20A 'in b'inab'ilal, 'oj alb'tan̈xn̈ej, may b'a'n̈ 'oj 'och wan yalxi, xin chi.
21A yic tzin paxtin 'a scal 'anma', caw wal sictac tz'aj eb' smaclni yab' tas tzwala yet' tas nab'enal tzwac' 'a eb'.
22Ax yic tzlajw in paxtin cha, toc 'ay mach tzc'anb'n yab' junc xo tas 'ayin; caw wal wach' jun tzo'n̈ in paxti chi tzyab' eb'.
23Caw wal tznib'j eb' yab' tas tzwala, 'icha wal qui nib'n ya'n n̈ab' 'a yic cuaresmail.
24A yic tzin tzewji, tzwaln junc chi yab' eb', 'ijn wal matz chaj eb' yab' 'ayin toto yel. Caw tz'och q'ueln eb' 'a in sat, toto yel tzin tzalj yet' eb'.
25'Ix wa'ch wopiso 'a scal eb', an tzwala tas yowlal tzb'o eb', 'icha tzyac' junc rey tzb'ab'lj yuj eb' soldado, 'ixta xwutj in b'a 'a eb'. A yic 'ay scusc'ojlal eb', an tzwac' sniwnal sc'ojl eb'.
Currently Selected:
Job 29: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
