Job 27
27
1Scha aln pax Job 'ixtic:
2Tzwac' in ti 'a sat Dios tztac' yuj smasnil, jun matz in b'onyaji, to a tzin 'a'n cusoc,
3ya' sb'a tzat yac' Dios wip yic tzwi'n jac wic',
4may xon wal 'aj 'oj wal tas man̈ yeloc, may junc 'es paxti' 'oj wala'.
5Ya' sb'a pitzn in to, may b'a'n̈ 'oj wala' to yel tas tzeyala; ma'oj in chach 'a wib'an̈ to yuj in mul 'ixta tzin 'aji.
6An tic, ma'oj wactc walni to tojl in nab'en, yujto wojc si'mb'il to may in mul.
7Smasnil eb' tz'och 'ajc'ojlal 'ayin, lajn cab' tz'aj sjaw yailal 'a yib'n̈ eb' 'icha tz'aj sjaw yailal 'a yib'n̈ eb' maysch'olnil sb'eyb'al, yet' eb' man̈ tojloc snab'en.
8¿Tas to junc 'aych yipc sc'ojl eb' maysch'olnil sb'eyb'al yic tzyi'n 'ec' Dios sq'uinl eb'?
9A yic 'ayx 'och syailal eb', man̈x 'oj scha Dios yab' tas 'oj yal eb'.
10Yujto may 'aj 'ix yij eb' stzaljc'ojlal 'a spatquil Dios tztac' yuj smasnil, may xon 'aj xyal sb'a eb' 'a 'a.
11Ax ticnec jun, 'oj in ch'ox eyil spoder Dios, atn tas nab'il yuj jun mach to tztac' yuj smasnil.
12Toto ax tic, eyiljnacx smasnil jun tzo'n̈ cha, ¿tas yuj man̈toc tojl tzeyutj eyalni?
13Atn jun yailal tic tzyac' Dios tztac' yuj smasnil, spacc 'a eb' maysch'olnil sb'eyb'al yet' 'a eb' tu snab'en.
14Wach'xam niwn yunnal eb', palta 'oj cham eb' 'unnab'il chi 'a scal owal, mto a wejl 'oj milnc eb'.
15A eb' ma'oj chamoc, a yab'il 'oj milnc eb', 'oj can yistl eb', toc 'ay eb' 'ix 'oj 'oc' yuj ewinac.
16A eb' tu sb'eyb'al cha, wach'xam til wal q'uen plata tzmontoej eb' 'icha lum lu'um, mto til wal spichl eb' b'uln 'eq'ui,
17palta am eb' tojl snab'en, a eb' 'oj 'a'nc 'och jun tzo'n̈ pichl cha; am eb' wach' snab'en, a eb' 'oj 'ica'anc q'uen plata cha.
18A yatut eb' maysch'olnil snab'en cha, lajn 'icha sjoxl 'ixm sat 'ixm 'aj tz'elt no ch'unam 'ij, caw wal c'un spoji, mto 'icha jac pat xilte 'ay q'ue 'a yib'an̈.
19A eb' maysch'olnil snab'en, 'oj 'ec' teln eb' sway 'a jun slajb' 'ac'wl yet' smasnil sricoal, ax yic 'oj 'elx swayn̈ eb', man̈x 'a xon jac tas 'ay 'a eb'.
20A jun tzo'n̈ tas 'aj tzxiw eb', a 'oj jawc 'a yib'n̈ eb' 'icha a 'elmal a', 'icha tz'aj yijx 'at junc tas yuj 'ic'n̈ab' 'a yic 'ac'wal.
21'Icha tzyac' junc tas tz'ec' smac' 'elt 'ic' tzcot 'a stojlal 'aj tzq'uel c'u, 'ixta 'oj 'aj yijx 'el eb' 'a yatut.
22'Oj 'ijxocn̈ej 'at eb' wach'xam tzat cob' ya'lc eb' s'at 'eloc, palta man̈x 'a niwnc'ojlal 'a eb'.
23A jun 'ic' cha, caw wal 'oj jommoc, ax xub'n sc'an̈ s'at 'a spatc eb'.
Currently Selected:
Job 27: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
