Job 19
19
1Yuj cha, xta'w pax Job, xyaln 'ixtic:
2¿B'a'n̈ wal 'oj eyactc in e tzuntzn yet' in yailal tic, caw wal tzin eyac' lajwc yet' jun tzo'n̈ e paxti tzeyal 'ayn tic?
3'Ayxn̈ej 'och eyaln tu paxti 'ayin, ¿tom matz eyec q'uixwc e b'a yuj tas tzeyal 'ayn tic?
4Q'uinloc to yel 'ay in mul cha, mun 'oj jawc in yailal yu'uj.
5Ax tic, caw wal tzcob' eyij chan̈ e b'a 'ayin, yuj in yailal tic tzeyaln 'och 'a in sat to may in ch'olnil.
6Palta comnoc tzeyojquej 'eli, to a Dios 'ixtc tzin 'utni, a x'a'n 'ejm jun yal tic 'aj in can t'un̈an.
7Tzcob' 'el waw, tzwaln 'ixtic: Wan wixtxi, xcob' in chioc, palta may xon mach tzta'w 'ayin, tzcob' wal in b'a, palta may mach tzin b'onyaji.
8A Dios a 'ix macn yol in b'e, yuj cha, man̈xtzac stac' in b'eyq'ui, 'icha wal to scal q'uic'q'uinl tzin b'eyc' yu'uj.
9'Ix yij 'ec' in ricoal, xya'n sat 'ejm in b'inab'ilal.
10In yac' lajwc 'ejm wal si'mb'il, ax tas 'aych yipc in c'ojol, c'uxn xlajw 'el 'icha tzyac' junc te te tztacj yet' sch'an̈lyib'.
11'Ix ya' cot wal yowl sc'ojl 'a wib'an̈, 'icha wal junc 'ajc'ojl yajch 'a 'a, 'ixta wal in yutej.
12Smasnil eb' soldado ajun yet'oc, 'ix 'och oyn eb' 'ayin, 'ix 'och oyn eb' 'a spatc watut yic tzin smiln eb' snani.
13A Dios 'ix 'i'n 'el eb' wu'tac 'a in tz'ey yet' smasnil eb' in wach'c'ojol, 'icha xoj wal comn 'anma tzin yutj can eb'.
14A eb' wican yet' eb' in wach'c'ojol, in yactjcan eb' in ch'ocoj, 'ix ya'n eb' sat sc'ojl 'ayin.
15Ax eb' cajn 'a watut yet' smasnil eb' 'ix wa'mal servil, chuc 'anmal wilx 'a sat eb', man̈xtzac in nachj cot yuj eb'.
16Toto tzwawtj cot junc eb' in checb' cha, toc tzta'w to eb' 'ayin, wach'xam tzcob' in tewc 'och 'a 'a.
17Toto tzin c'och 'a stz'ey 'ix wistzil, caw wal tu sjab' xob' in ti tzyab' 'ix, ax eb' wican caw wal tzin syaj eb'.
18'Ixta pax eb' 'unn 'a b'esan, tzin schacl eb', a yic tzin laj yiln eb', tzin sb'uchn eb'.
19A eb' caw wach' waj yet'oc, in spatquilj can 'el eb', a eb' caw wal tzin tzalj yet'oc, 'ix meltzj 'och eb' 'ajc'ojlal 'ayin.
20A in tz'umal, tox 'ix tacj 'och 'a spatc in b'aquil, teb'il xoj pitzn in tzwab'i.
21Ex in wach'c'ojol, 'o'ch cab' e c'ojl 'ayin, yujto a Dios 'ix 'a'n 'och in yailal.
22¿Tas yuj tza'nexn̈ej wu'uj tzin 'eq'ui? 'Icha wal yajch tza'n Dios wu'uj. ¿Tom man̈ colb'loc tzin eyac' cus tic?
23Comnoc wal 'ay junc mach tz'ib'n can jun tzo'n̈ in paxti tic 'a junc u'un̈, mto 'a q'uen q'ue'en.
24'Ayc wal mach tz'ib'n can 'och yet' q'uen cincel 'a junc q'ue'en mto 'a q'uen plomo, sec tzcan jun tzo'n̈ chi 'a jun 'ejmn̈ej.
25Wojtac to a jun mach tzin colni, pitzan, ax 'a slajb' c'ual, 'oj jawc in wul yi' chan̈ 'a sat lum tic.
26Wach'xam tzlajw 'el in tz'umal tic, palta 'oj wilch Dios yet' in niwnal tic.
27'Oj wilch wal yet' in sat, caw an 'oj wila', man̈toc chuc mach 'oj 'ilnoc. Caw wal an tzin nib'j wilchi.
28Ax tic, 'in tzeyal wuj 'ixtic: ¿Tas wal tzcutjec qui tzuntzni? yujto mun a tz'i'n cot jun tzo'n̈ yailal tic 'a yib'an̈, xe chi.
29Palta xiwn̈ec 'a jun q'uen espada, atn q'uen tzc'anlb'ej Dios yuj yowl sc'ojl 'a tas man̈ tojloc, 'ojquejec 'eli to a Dios 'oj qui b'eyc'ojlanec, xchi Job.
Currently Selected:
Job 19: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
