Job 15
15
Schac'ajil c'umjb'a
(Caps. 15—21)
1Yuj cha, xta'w Elifaz win 'aj Temán, xyaln win 'ixtic:
2A mach jeln snab'en, man̈ smojc sta'w yet' jun tzo'n̈ paxti may yopiso, mto jun tzo'n̈ paxti ton̈j tzsatcn 'at 'a scal 'ic',
3man̈toc ton̈j tzcomn paxtini, matz c'anlb'ej paxti may yopiso.
4Ach xo tic tzala to may yel'ch xiwc'ojlal 'a Dios, may yel'ch pax 'emmquilal 'ayach.
5A tas tzal yet' a ti', a tzch'oxn 'el a paltail, yujto tza nib'j tzon̈ cob' extj paxti 'on̈.
6Man̈ a na', to an 'oj wa'ch 'a eb'n̈ yuj a mul, palta mun a a ti chi tzlocn cot 'a eb'an̈.
7Am tzotj a nani, to ach b'ab'l 'anma aj 'a yolyib'n̈q'uinl tic. ¿Tom 'aych xon 'ec' a nani yic xlaj pitzwc chan̈ lum niwc witz?
8¿Tom ojc ach tic tas c'ultac nab'il yuj Dios? ¿Tom cojn ach jeln ach a nan 'a yolyib'n̈q'uinl tic?
9Am tzotj a nani to cojn ach ojc smasnil jelnal, an̈ xo tic on̈, man̈ cojcoc tzotj a nani.
10An̈ tic on̈, caw 'ayx qui nab'en si'mb'il on̈, yujto a eb' 'ichmtac winc 'aj xquij can qui jelnal tic on̈, a eb' cha, b'ab'l 'ichm winc eb' 'a sat a mam.
11A Dios tznib'j yac' a niwnc'ojlal, an̈ xo tic on̈, caw wach' pax tas tzcal 'aych on̈.
12¿Tas yuj tzej 'el a b'a 'a stz'ey, caw wal tz'elt yol a sat scot owal?
13¿Tas yuj tzcot owl 'a Dios, comn xoj tzal junc paxti'?
14Toc 'ay junc 'anma to caw wach', yic may jac smul tz'ochi.
15A Dios matz ya'ch wal yipc sc'ojl eb' ángel, 'ixta pax satcha'an̈, man̈toc yel xo pax wach' yilx 'a sat.
16An̈ xo an̈ 'anman̈ec tic, caw yajb'entacn̈ec, yel xo wal a maysch'olnil tzqui b'o'ec, lajn wal maysch'olnil chi 'ayn̈ec 'icha swach'l yu'x a a'.
17Yuj cha, comnoc tza maclj ab' tas 'oj wala', a tas wojc xo, a chi 'oj wal ab'i'.
18A eb' jeln snab'en, a eb' on̈ cuyn can on̈. A jun tzo'n̈ sjelnal eb' cha, ata cuyb'il can yuj eb' 'a smam yicham.
19A eb' 'ichmtac winc cha, atn 'a eb' 'ac'b'il can lum lum tic, may eb' chuc chon̈b'al scalj sb'a yet' eb'.
20A eb' 'anma caw wal tu sb'eyb'al, c'ochn jab' sq'uinl eb', yailaln̈ej tz'aj yec' tiempo yuj eb'.
21A yic tzyab'n eb' sc'an̈ junc tas, caw tzxiw eb' yu'uj, ax yic cob' may tas tzna eb', a paxta tzjaw maysch'olnil chi 'a yib'n̈ eb'.
22Man̈x 'oj stac' scoln 'elt sb'a eb' 'a scal q'uic'q'uinal, tecn xo 'och q'uen cuchlub' 'a eb' yic tzmilx eb'.
23Ax sniwnal eb' cha, a no 'usj 'oj chinoc. Yojc xon pax eb' to a tas tzjaw 'a yib'n̈ eb' cha, to ma'oj 'ec'oc.
24A yailal mto xiwc'ojlal cha, a 'oj 'a'nc somchjoc 'el snab'en eb', 'icha tzon̈ 'ajc qui xiw chan̈ yuj junc win rey tzjaw yac' owl quet'oc.
25'Ixta wal tz'aj junc mach tzyij chan̈ sb'a 'a Dios to tztac' yuj smasnil, yic tzcob' ste'wtzan sb'a 'a yojltac.
26'Icha to cob' 'aych smacl jul-lab' 'a yojltac, yic tz'at ya'nc owl yet' Dios snani.
27Caw wal tzq'ue b'a'chil 'a sjolom yic tzcob' sb'onc chi 'ixta'.
28Ax jun chon̈b' chi 'aj cajn cha, 'oj lajwc 'eli, man̈x 'a mach 'oj cajnc smasnil te n̈a. 'Oj can 'a sictaquil, jun b'uln̈ xoj 'oj 'ajcn 'icha c'alem.
29Man̈ niwnoc tiempo 'oj yac' sgana yet' sricoal, may tas 'oj niwtjoc chan̈ yuj 'a sat lum lum tic.
30Man̈x 'oj stac' scoln 'el sb'a 'a scal q'uic'q'uinal. Lajn wal 'oj 'aj 'icha junc te sc'ab' te tz'a yuj te c'ac', mto tzma'x 'el snich te yuj 'ic'.
31Man̈x cab' ya'ch yipc sc'ojl tas to may yel'chi, yujto a jun cha, ton̈j tzwach' 'ixtx paxti yu'uj.
32'Oj seb' cham muc'uc, 'icha tzyac' junc te wolte tzu'x 'el 'a snun, man̈x 'a b'a'n̈ to 'oj yaxb'oc paxi.
33Lajn 'oj 'aj 'icha te sat uva ton̈j tzpucl 'a te snun cha, matz 'e'maxi, mto 'icha tzyac' te snich te olivo ton̈j tzpucli.
34A eb' 'anma maysch'olnil sb'eyb'al, may yin̈tl eb' 'oj q'uib'cn cha'an̈, ax sricoal eb' xniwtj chan̈ yuj schan tumn 'a c'ultaquil, 'oj tz'a smasnil yet' yatut eb'.
35A eb' cha, cojn maysch'olnil nab'il yuj eb', tznib'j eb' to tzjaw maysch'olnil chi 'a yib'n̈ junc xo yit 'anma'il; cojn chi 'ayc' 'a snab'en eb', xchi win Elifaz.
Currently Selected:
Job 15: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
