Job 11
11
1Xlajw cha, 'ix ta'w pax win Zofar, atn win 'aj Naamat:
2A smasnil jun tzo'n̈ a paxti tic, smoj wal spacx eb' 'ayach, palta man̈ yujoc til wal tas tz'el alni, ax a b'oxcan muc'uc.
3Am wal a nani to yuj til wal tas tz'el aln tic, ax qui can an̈ tic 'a sictacl on̈. Am tzotj a nani to man̈x 'a mach tztac' spacn jun tzo'n a b'uchwal paxti cha.
4Ach tic, cob' tzal 'a Dios to tojl a nab'en 'a sat, palta mun ach tzal 'ixta'.
5Comnoc wal 'ay tz'aj spaxtin Dios, tzpacn jun tzo'n̈ chi 'ayach.
6Tzach sch'oxn 'a jun tzo'n̈ jelnal c'ultac yaji, atn jun tzo'n̈ caw 'ajltac snachj 'eli. Toto 'ixta', 'oj ojcoc 'eli, to mantzac yac' Dios a yailal 'icha wal tas smoj a chani.
7Am wal tzotj a nani, to 'oj ojcoc 'el sjelnal Dios to c'ultac yaji, atn jun Dios tztac' yuj smasnil.
8¿Tas wal 'oj otc ojcan 'el jun jelnal cha? A jun cha, yel xo wal najt yajb't 'a satcha'an̈. Yel xo wal xab' yajb't 'a yaln̈ lum xab' olan.
9Yel xo pax niwquil 'a yib'n̈ lum lum tic, 'ec'b'al slewnal sat 'a yib'n̈ a mar.
10Toto a Dios tzach 'awtni yic tzach sb'eyc'ojlani, ¿mach wal junc 'oj stac' stenn 'och wa'an?
11Yojc Dios mach tzyac' 'es, tzyil jantcn̈ej smaysch'olnilal eb' 'anma'. ¿Mto matz yil tza na ach tic?
12'Icha matz tac yalj junc 'anma 'a junc no calte'al b'uru, 'ixta pax junc mach may snab'en 'icha ach tic, ¿tom 'ay 'oj 'aj sjaw snab'en?
13Toto ach tic tza tojlb'tzej a nab'en, al a yailal 'a Dios.
14Toto 'ay a mul 'aych 'a eb'an̈, wach' to tzej 'el a b'a 'a yalan̈; man̈ e'ch jun tzo'n̈ maysch'olnil chi 'a yol atut.
15To 'ixta', caw wal wach' elx 'a sat Dios, man̈x 'a jac a q'uixwc'ojlal; tzaljc'ojlal 'oj a canxi, man̈x 'a tas 'oj a xib'tni;
16ax a'n sat a c'ojl 'a yailal x'ec' 'a eb'an̈; jab'jnal 'oj sat 'a a c'ojol, 'icha tz'aj stup chan̈ a b'eymal a'.
17Toto tza na a b'a, wach'xam 'icha to ach can 'a q'uic'q'uinl yuj a yailal tic, palta ax ticnec, 'icha to 'oj sacb' pax 'el 'a eb'an̈. Caw tzaljc'ojlal 'oj a canxi, 'icha wal to chimc'ul 'aj 'aych pax 'eq'ui.
18'Oj a canx 'a junc'ojlal, yujto 'ay jun tas 'aych yipc a c'ojol; a Dios 'oj a tan̈wni, ax a way 'a tzaljc'ojlal.
19'Oj elj 'a tzaljc'ojlal, man̈x 'a mach 'oj a xib'tni. Til pax wal eb' 'anma 'oj jawc 'ayach, ax yoch eb' a wach'c'ojloc.
20Palta ax eb' maysch'olnil snab'en, 'oj cob' sayc' eb' mach 'oj colwjoc 'a 'a, palta caw nab'a xoj. Man̈x 'oj 'ilchjoc 'aj wach' scoln sb'a eb', axn̈ej schamlil eb' 'aj 'oj ya'ch snab'en, xchi win Zofar.
Currently Selected:
Job 11: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
