Job 1
1
A yab'xil Job yet' eb' yunnal
1A 'a yol smacb'en lum Uz, ata 'ay jun winc Job sb'i, caw wal wach' sb'eyb'al may tas tu tzb'o'o, caw 'ay yel'ch Dios 'a sat, matz ya't sb'a 'a scal maysch'olnil. 2-3'Ay ucwn̈ yunnal yet' 'oxwn̈ yisil; uque mil scalnelu, 'oxe mil scameyo, o'e ciente mojn̈ swacax, o'e ciente sb'uru, til wal eb' smoso tz'a'n servil. Cojn win caw rico 'a yib'n̈ smasnil eb' 'anma 'a lum lum 'ay 'a stojlal 'aj tzq'uel c'u.
4A eb' yunnal win cha, c'aync eb' yoch q'uin̈ 'a yatut, stzol-l yec' q'uin̈ chi 'a junjn ewinac, tzyawtn pax ewin wac eb' 'ix yanb' chi yet'oc. 5A yic tzlajw yec' q'uin̈ chi 'a junjn eb', tzyawtn win Job chi smasnil eb' yunnal cha yic tzsacb'tzan sb'a eb' 'a sat Dios. Ax 'a junx c'u, tzseb' q'ue wan win yac' tz'a xajmb'al yuj junjn eb' yunnal cha, yujto lemb'il tzlaj 'och smul eb' sb'uchwj 'a Dios snan winac. Yuj cha, 'ixtan̈ej tzyutj sb'a win 'a junjn 'ejem.
6'Ay jun c'ual, xc'och eb' ángel sch'ox sb'a 'a yojltac Jehová, an̈jtona xc'och pax win 'ajc'ojl 'a scal eb', atn win Satanás. 7Ax Jehová, sc'anb'n 'a win 'ixtic:
—¿'Ajtil ach coti? xchi 'a winac. Xyaln win 'ixtc 'a 'a:
—In cot 'a yolyib'n̈q'uinal, yujto tz'ec' woymtej lum lu'um, xchi.
8Yuj cha, xyaln Jehová 'ixtc 'a winac: ¿May am 'aj 'ix elcn win in checb' Job? May junc xo mach lajn snab'en yet' win 'a yolyib'n̈q'uinal, caw wal yiclum win 'ayin, tojl sb'eyb'al, 'ay xiwc'ojlal, may 'aj tzb'o win tas maysch'olnil, xchi Dios 'a winac.
9Xyaln win 'ajc'ojl chi 'ixtic:
—'Ix wilcn winac, palta man̈ nab'aoc wach' tzach yutj win ach ya'n servil, 10yujto may junc mach tza chaj 'i'noc 'ec' junc tas 'a winac, atn tas 'ay 'a yol yatut yet' smasnil tas 'ay 'a 'a. Ach tzac' a wach'c'ojlal 'a yib'n̈ smasnil tas tzlaj sb'o', tza'n pax niwtjoc scajb'en noc' win 'a yolyib'n̈q'uinal. 11Palta q'uinloc tzej 'ec' tas 'ay 'a yol sc'ab' winac, 'oj ela', checlton ma'oj a b'uchx yuj winac, xchi win 'ajc'ojl cha.
12'Ix ta'w Jehová 'ixtc 'a winac:
—'Ixta cab' tz'aj 'an. A tas 'ay 'a win Job cha, tzcan 'a yol a c'ab', 'ilto tas tzotej, palta man̈ a'ch yailal 'a sniwnal winac, xchi Dios.
Cojn cha, x'elt win 'ajc'ojl chi 'a yojltac Jehová.
13'Ay jun c'ual yic wan swa eb' yunnal yet' eb' yisl win Job 'a yatut win b'ab'l winac. 14A 'a jun c'u cha 'ix jaw jun winc 'a yatut Job wul yal jun 'ab'x 'a win 'ixtic:
—A yic wan qui t'ocw lum yet' e no wacx on̈, ax 'a qui tz'ey on̈ ata tzlaj wa e no 'axna, 15axn wal cha, xc'och ewin sabeo, smiln can ewin eb' munljum, 'ix yelc'n 'at ewin e no smasnil. Cojxn̈ej in 'elcni yic tzwul walnc ab' jun tic, xchi winac.
16Mantzac lajw yaln win cha, 'ix jaw junx winac, xyaln 'a Job 'ixtic:
—'Ix cot jun c'ac' 'a satchan̈ yuj Dios, 'ix tz'a e no calnelu yet' eb' yilmal e no'. Cojxn̈ej in 'elcni yic tzwul walnc ab' jun tic, xchi winac.
17Mantzac wal lajw yaln win cha, 'ix jaw junx winac, xyaln 'ixtic:
—'Ay 'oxc'aj ewin caldeo 'ix c'och yac' owl quet' on̈, smiln cham ewin eb' yilmal e no cameyo, 'ix yelc'n 'at ewin e no'. Cojxn̈ej in 'elcni yic tzwul walnc ab' jun tic, xchi winac.
18Wanto yaln win cha, 'ix jaw junx winac, xyaln win 'ixtic:
—A ewin onnal yet' eb' 'ix esil, wan cob' swa eb', tzyu'n eb' tas tzyu'j 'a yatut win b'ab'l winac, 19axn wal cha, xjaw jun niwquil 'ic' xcot 'a lum cusltac lu'um. 'Ix sma'n 'ejm lan̈chjoc te n̈a chi 'a yib'n̈ eb' onnal cha, 'ix cham eb' smasnil. Cojxn̈ej in 'elcni yic tzwul walnc ab'i', xchi winac.
20Yajn̈ej 'ix q'ue wan win Job, caw xcus win si'mb'il, stzilnjat win spichl yuj scusc'ojlal cha, sjoxn 'el win xil sjolom, 'ix 'em cumn win 'a sat lu'um yic tzyaln sb'a win 'a Dios. 21'Ix yaln win 'ixtic:
—May xon jac tas wet'i yic in 'alj 'el 'a yolyib'n̈q'uinl tic, may pax jac tas 'oj wic' yic 'oj in meltzj paxi. A Jehová a x'a'n smasnil tas 'ayin, a pax x'i'n 'ec' jun 'ejm xo; alx cab' wach' paxti 'a 'a, xchi Job.
22Wach'xam niwn tas x'ec' 'a yib'n̈ Job, palta may tas tu 'ix yal 'a spatc Dios.
Currently Selected:
Job 1: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
