Jer 48
48
A tas alb'il 'a yib'n̈ Moab
1A Jehová tztac' yuj smasnil, atn sDiosal Israel, a 'ix aln 'ixtc 'a yib'n̈ chon̈b' Moab:
¡'Oltac wal chon̈b' Nebo, caw 'ix lan̈chj 'ejmi! An̈jtona pax chon̈b' Quiriataim, tox 'ix 'ajx ganar, caw 'ix 'ijx 'ejmi. Tox 'ix ma'x 'ejm lan̈chjoc smuroal 'a sat lu'um.
2Tox 'ix lajw 'ejm sb'inab'ilal Moab. A 'a chon̈b' Hesbón, ata tzmol alj eb' 'ajc'ojol, tas 'oj yutc eb' satn 'el nacion̈ Moab 'a jun 'ejmn̈ej. An̈jtona pax chon̈b' Madmena, 'oj lajwc 'eli, a jun owl cha, ma'oj 'och wan ya'n lajwc 'eli.
3A eb' 'aj chon̈b' Horonaim, caw 'oj 'el yaw eb': ¡Tic tzon̈ chami, caw tzon̈ lajw 'ejmi! 'oj xchic eb'.
4A chon̈b' Moab, tox 'ix lajw 'ejmi, tzc'och yab'x yel yaw eb' 'anma 'a chon̈b' Zoar.
5Til wal yoc' eb', caw tz'el yal sat eb' sq'ue 'a lum switzl Luhit. Ax eb' tz'ejm 'a Horonaim, caw tz'el yaw eb' yuj syal tas tzlaj uji.
6¡A eb' tztac' to yu'uj, 'at cab' eb' 'eloc! ¡Scol cab' sb'a eb'! Lajn xoj cab' tzyutj sb'a eb' 'icha no calte'al b'uru 'a cusltac lu'um.
7A Moab, a wal smunljel yet' sricoal 'aych yipc sc'ojol, palta an̈jtona 'oj 'ijxoc 'ati. A jun sdiosal tzcuch Quemos, 'oj 'ijxoc 'at 'icha presoal, yet' eb' 'aych ya'malc 'och sti eb' 'a 'a, yet' pax eb' 'anma caw niwc cob' yel'chi.
8An Jehová in, an tzwala: A jun owl cha, 'oj c'och 'a smasnil chon̈b' Moab, may junc 'oj 'elcni. Smasnil tas 'ay 'a lum ch'olctac' yet' 'a lum pan̈ctac, 'oj satxoc 'el smasnil.
9'Icha to 'oj 'och sc'axl eb' 'aj Moab, yic tz'at eb' 'eloc. A wal smasnil eb' chon̈b' 'ay 'a yol smacb'en, caw 'oj lajwc 'ejm eb'. Man̈x 'a junc mach 'oj can cajn 'a 'a, xchi Dios.
10(Catb'tzaxc cab' mach to matz b'on snib'b'en Jehová 'a smasnil sc'ojol. Catb'tzaxc cab' mach to matz c'anlb'ej yespada yic tzmilw cham 'anma'.)
11Junc'ojlaln̈ej yaj Moab, may 'aj x'ijx 'at 'icha presoal. 'Icha yal uva tz'ajx can 'ejm 'a yol junc yet'ul, matz jelx 'a yet'ul, yuj cha, may tz'aj sb'o sjab', an̈jan̈ej yaji, 'ixta wal yaj Moab.
12Tzyaln Jehová 'ixtic: An tzwala, to 'oj jawc jun c'u yic 'oj in checnc 'at jun tzo'n̈ winac, ax yijx 'at eb' 'aj Moab yuj eb' 'a junc xo chon̈ab', 'icha wal tz'aj sjelx yal uva 'a yol yet'ul. 'Oj ma'xoc lan̈chjoc can schon̈b' eb', cusltac 'oj 'ajcni, 'icha wal tz'aj sma'x poj jun tzo'n̈ yet'l yal uva to man̈x 'a tas 'a yojol. 13Yuj cha, a eb' 'aj Moab cha, caw 'oj jawc schab'c'ojlal eb' 'a Quemos, atn sdiosal eb', 'icha wal 'ajnc sjaw schab'c'ojlal eb' israel yuj sdiosal 'a Bet-el, atn jun 'aych cob' yipc sc'ojl eb'.
14Man̈ yal cab' eb' 'aj Moab 'ixtic: An̈ tic, caw jeln on̈, b'inab'il on̈, to caw 'a'm on̈ owal, man̈ xchic cab' eb'.
15Wan sc'och jun 'oj 'a'nc lajwc jun tzo'n̈ chon̈b' 'a yol yic Moab, 'oj cham eb' quelmtac caw 'ay yip cajn ta'. A jun tic, tzwal an Rey in tic, Jehová in b'i, tztac' wuj smasnil.
16Tox 'ix jaw sc'ul yailal 'a yib'n̈ Moab, 'ix jaw sc'ul satli.
17Jantc ex cajn ex 'a stz'ey Moab, yet' ex to eyojc wal jantc tz'aj sb'inaxi, 'o'n̈ec yu'uj, tzeyaln yuj 'ixtic: A yopiso Moab, 'ix lajw 'ejmi, man̈x 'a jac yip, sat 'ejm sb'inab'ilal, xe chi.
18'Actjec can e b'inab'ilal ex 'aj Dibón, 'emmquilal tzeyutj e b'a, yujto a jun mach wan satn 'el Moab, wan sc'och 'ayex, wan xo sma'n lan̈chjoc smuroal e chon̈ab'.
19Ex 'aj chon̈b' Aroer, 'ochn̈ec lin̈n 'a stitc b'e, tzlajw cha, tzeyilni. C'anb'jec eyab' 'a eb' 'aj Dibón 'ix cant cani, yuj jantc tas 'ix uji.
20A wal Moab, caw q'uixwc'ojlal xoj yaji, 'aych 'a xiwc'ojlal. 'O'n̈ec yuj syailal. Alc 'el 'a stitc 'a niwn a Arnón, chajtlto a Moab, tox 'ix lajw 'ejmi, xchi Dios.
21Tox 'ix jaw yailal alb'il can 'el 'a yib'n̈ jun tzo'n̈ chon̈b' 'ay 'a lum niwc pan̈n tic: atn Holón, Jahaza, Mefaat, 22Dibón, Nebo, Bet-diblataim, 23Quiriataim, Bet-gamul, Bet-meón, 24Queriot, Bosra, yet' smasnil jun tzo'n̈ xo chon̈b' 'ay 'a yol yic Moab, eb' 'ay 'a stz'ey, yet' pax eb' najt yajl 'a stz'ey.
25A Jehová, a tzaln 'ixtic: A wal yip Moab, tox 'ix lajw 'ejmi, a sjelnal, tox 'ix sat 'ejmi, xchi.
26Tzyaln pax Jehová 'ixtic: Somchjnacx snab'en eb' 'aj Moab, yujto tenmtac xyutj sb'a eb' 'ayin. Tzetzx cab' eb' yuj eb' 'anma', 'icha tz'aj stzetzx junc 'u'm 'an̈ tzb'al sb'a 'a scal xej.
27Ex 'aj Moab, nac coti chajtlto e tzetzjnac eb' 'aj Israel, e b'uchjnac eb', 'icha xo 'elc'm yaj eb' 'a e sat.
28E masnil ex 'aj Moab, 'actjec can e chon̈ab', 'ixquec cajn 'a satcq'ue'en, 'icha no 'uch, a 'a sat q'uen chi tzb'o no so'.
29Wojc wal sb'an̈jb'al eb' 'aj Moab. Caw ch'an eb', niwc winc tzyutj sb'a eb'. Yel xo tzyij chan̈ sb'a eb'.
30An Jehová in, wojtac to tzyij chan̈ sb'a eb', palta caw nab'an̈ej, may jac tzyac' ganar eb' yuj sb'an̈jb'al cha.
31Yuj wal cha, tzin 'oq'ui, tzin cus yuj eb' 'aj Moab, yuj pax eb' 'anma 'a Kir-hares.
32Yel xo wal niwn 'oj woc' yuj chon̈b' Sibma 'a yib'n̈ 'icha tz'aj yoc' eb' 'aj Jazer. Yujto a yawb'en uva eb', caw tzc'axw 'ec' 'a junx sc'axpil 'ec' sti a mar, masnto tzc'och 'a sti a yic Jazer. Palta ax ticnec, 'ix jaw eb' 'oj satnc 'el sat te uva cha, yet' sat jun tzo'n̈ xo 'awb'en.
33Man̈x 'a 'aw yic tzaljc'ojlal 'a scal 'awb'ente yic Moab. Man̈x 'a yal uva 'a yet'l 'aj tzmolxi, yujto man̈x 'a mach tzte'n 'el yal uva, man̈x 'a b'it yic tzaljc'ojlal.
34A eb' 'anma 'aj Hesbón, caw tz'el yaw eb' yuj yailal. Tzc'och yel yaw eb' 'a Eleale yet' 'a Jahaza. Tzc'och pax yel yaw eb' 'a Zoar masnto 'a Horonaim, yet' pax 'a Eglat-selisiya, an̈jtona eb' a spac'b'a 'a Nimrim 'ix tup chan̈ eb' a'.
35An Jehová in, an tzwala: A 'a Moab, 'oj in satl 'emmquilal, atn xajmb'al tz'at yac' eb' 'a lum won̈ctac 'a 'aj 'ay jun tzo'n̈ smacsej eb', yet' incienso tzyac' tz'a eb' 'a sdiosal.
36'Icha wal yoc' te 'amay tz'utz'x yuj cusc'ojlal, 'ixta wal woc' yuj eb' 'aj Moab, atn yuj eb' 'anma 'ay 'a Kir-hares, yujto a wal sricoal eb' smolb'tzej, caw sat 'ejmi.
37Smasnil eb' winac, tox 'ix sjoxl eb' xil sjolom, tox 'ix sjoxl eb' xil sti'. C'uxn spol lajwc eb' sc'ab', cojxn̈ej jun tzo'n̈ pichl n̈achtac sat 'aych yuj eb'.
38A 'a smasnil span̈nil yib'n̈ n̈a 'a Moab, yet' 'a smasnil yoltc caye, cojxn cusc'ojlal tz'ab'xi, yujto caw an Jehová in, an tzwala, to 'ix in satl Moab, 'icha wal tz'aj sma'x poj junc lum chen man̈x 'a sch'olnil.
39A Moab caw choc' x'ajcni. 'O'n̈ec yu'uj, yujto caw man̈x 'a yel'ch 'ix 'ajcni, tox 'ix ma'x 'ejm lan̈chjoc. Smasnil jun tzo'n̈ nacion̈ 'ay 'a stz'ey, toxn̈ej tzb'uchwj eb' 'a 'a, caw tzxiw pax eb' yilni, xchi Dios.
40Tzyaln Jehová pax 'ixtic: A jun 'ajc'ojl yajch 'a Moab, 'ix c'och lemnjoc 'a 'a, 'icha sc'och jen̈n̈oc junc no c'uc'um.
41A wal jun tzo'n̈ chon̈b' wach' cob' yajch smuroal, caw 'oj 'ejmc yuj eb' 'ajc'ojol. A wal 'a yic jun c'ul cha, a eb' soldado Moab, toxn̈ej 'oj xiwcn chan̈ eb' 'icha junc 'ix 'ix wan yalj yune'.
42A Moab, man̈x nacion̈oc 'oj 'ajcni, yujto xyij chan̈ sb'a 'a 'ayn an Jehová in.
43Yuj cha, tzwaln 'ixtic: A wal eb' cajn 'a Moab, lajn wal 'oj 'aj eb' 'icha no noc' tzpechx b'eyc'oc yuj eb' pechm noc', 'ay xoj smay s'atcn eb' 'a yol junc xab', mto tzcan eb' 'a junc ch'an̈ ya'al.
44A eb' 'oj 'at 'elc 'a eb' tzpechn b'eyc'oc cha, 'oj 'atcn eb' 'a yol junc xab'. A mach 'oj yac' ganar sq'uet 'a yol junc xab' cha, 'oj cancn 'a junc ch'an̈ ya'al, yujto an Jehová in, an 'oj wa' cot yailal nab'il wuj 'a yib'n̈ Moab.
45A eb' wan cob' s'at 'eloc, man̈x 'a yip eb', 'oj 'at say eb' 'aj tz'at scol sb'a 'a Hesbón. Palta a 'a Hesbón cha, atn schon̈b' win rey Sehón, ata 'oj n̈ilchjoc 'elt c'ac' 'a 'a, caw 'oj b'eyn̈j s'at c'ac' cha. 'Oj sn̈usn̈j tz'a jun tzo'n̈ lugar cha, masnto 'oj c'och 'a lum jolmctac witz 'a yol snacion̈ jun tzo'n̈ caw tzcob' sb'an̈ sb'a cha.
46'Oltacx wal ex 'aj Moab, schon̈b' ex Quemos, caw ex sat 'ejmi. A wal eb' eyunnal, yet' eb' 'ix eyisil, tox 'ix 'ijx 'at eb' 'icha presoal.
47Palta an Jehová in, an tzwala, to ax 'a slajub', 'oj wi'x q'ue'ch chon̈b' Moab jun 'ejm xo, xchi Dios.
Atn jun tzo'n̈ yailal tic 'ix yalcn Jehová 'a yib'n̈ chon̈b' Moab.
Currently Selected:
Jer 48: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
