Jue 11
11
Win Jefté
1'Ay jun winc tzcuch Jefté, ata cajn 'a yol yic Galaad, caw wal jeln 'a owal. A jun winc tic, yune jun 'ix 'ajmul 'ix, yunnal win Galaad sb'i. 2Palta ax 'ix yistzil win Galaad cha, 'ay pax yune 'ix 'aljnac. 'Ix laj q'uib' chan̈ ewinac, ax x'aji, spechn 'el ewin win Jefté chi 'a yol yatut smam cha. Xyaln ewinac to may jac tas tzyac' ewin 'a 'a, yujto chuc snun winac. 3Yuj cha, 'ix 'at win Jefté 'elc 'a ewin yu'tac cha, axta xc'och cajn 'a yol yic Tob. Ax 'a jun lugar cha, ata smolb'tzej jun tzo'n̈ ewin 'isaj, caw tu tas tzb'o eb'. Junn̈j xyutj sb'a yet' ewinac, a win x'och syajlilc eb'.
4'Ix 'ec' wal jab' tiempo, ax x'aji, 'ix c'och eb' amonita yac' owl yet' eb' israel cha. 5Yuj cha, snan eb' yajl 'a scal eb' yic Galaad cha, to tz'at yac' eb' cotx Jefté 'a yol yic Tob. 6'Ix yaln 'at eb' 'ixtc 'a 'a:
—Cotn̈ muc'uc, tzqui nib'ej to ach tzach 'och qui yajliloc yic tzca'nec owl yet' eb' amonita, xchi eb'.
7'Ix ta'w cot Jefté 'a eb' 'ixtic:
—Ax tic, chacb'iln 'el eyu'uj. 'Ix eyac' pural in e pechn 'el 'a yatut in mam. ¿Tas yuj at yic tzeyiln to wan e lajw 'eli, tzex jaw 'ayin? xchi 'a eb'.
8'Ix yaln eb' yajl 'a Galaad chi 'ixtc 'a 'a:
—Totn tzquila to wan qui lajw 'eli, yuj cha, tzach wul qui saync quila', tzqui nib'ej to tzach 'at quet'oc, yic tzca'nec owl yet' eb' amonita cha. Tzach ca'n 'och yajlilc 'a quib'n̈ qui masnil an̈ 'aj Galaad on̈ tic on̈, xchi eb'.
9—Toto tze nib'j tzin eyij 'at wac' owl yet' eb' amonita cha, q'uinloc tzyac' Jehová eb' 'a yol in c'ab', to 'ixta', tom yel 'oj in eya'ch eyajloc, xchi 'a eb'.
10'Ix ta'w eb' yajl chi 'ixtc 'a Jefté:
—A sat Jehová tzcaln cani, to 'oj qui b'o 'icha tzal cha, xchi eb' 'a 'a.
11Yuj cha, 'ix 'at Jefté yet' eb', ax eb' chon̈b' cha, 'ix ya'ch eb' win Jefté chi syajliloc. Ax 'a Mizpa cha, ata 'ix scha alj pax Jefté jun tzo'n̈ spaxti chi 'a yojltac Jehová, atn jun tzo'n̈ xyal 'a eb' 'aj Galaad chi 'a yic b'ab'el. 12Xlajw cha, 'ix schecn 'at Jefté jaywn̈ eb' schecb' 'a win sreyl eb' amonita, yic tz'at sc'anb'noc eb' 'ixtic: ¿Tas tza na 'a in patic, yuj cha, tzach jaw wul ac' owl wet' 'a sat in lum tic? xchi 'at 'a 'a. 13Ax win sreyl eb' amonita cha, 'ix spacn cot win 'ixtc 'a eb' schecb' win Jefté:
—A yic ex cot ax israel ex chi 'a Egipto, 'ix wul e to'nc 'ec' qui lum on̈, atn lum tzcot 'a sti a Arnón masnto tzc'och lum 'a sti a Jaboc yet' lum 'ay 'a sti a Jordán. A ticnec, 'actjn̈ej can pax lum 'a yib'n̈ 'a'nc'ojlil, xchi.
14'Ix scha 'a'n pax 'at Jefté jun tzo'n̈ xo schecb' 'a win sreyl eb' amonita cha. 15'Ix 'at yalnc eb' 'ixtc 'a winac:
—A Jefté 'ixtc wal tzyutj yalni: An̈ israel on̈ tic on̈, may slum eb' moabita tzquij 'eq'ui, may pax yic eb' amonita quijnac 'eq'ui. 16A yic quelt 'a Egipto, a 'a lum cusltac lum 'aj on̈ b'ey coti, yic on̈ jaw 'a sti a Chac Mar, masnto on̈ c'och 'a Cades. 17Ata 'ix ca' cot qui checb' 'a win sreyl Edom, xcaln 'a win 'ixtic: Comnoc tzon̈ a chaj 'ec' 'a sat lum a lum tic, xqui chi 'a winac, palta ax win rey cha, ma'on̈ schaj 'e't xon winac. 'Ix qui c'ann pax 'e't qui b'a 'a lum yic win sreyl Moab, an̈jtona', ma'on̈ schaj 'e't pax winac, yuj cha, on̈ canx can 'a Cades on̈. 18Xlajw cha, on̈ laj oyy 'ec' 'a lum cusltac lu'um. C'uxn xcoymtej sti slum eb' 'aj Edom yet' lum yic eb' 'aj Moab, masnto on̈ jaw 'a stojlal 'aj tzq'uel c'u 'a Moab cha. Axta 'on̈ 'och wa'an, on̈ can 'a sc'axpil 'ec' sti a Arnón, ma'on̈ c'axw 'e't 'a 'a. Yujto ata tz'el yich smacb'en Moab. 19Yuj cha, xca'n 'e't qui checb' 'a win Sehón, atn win sreyl eb' amorreo 'a chon̈b' Hesbón, xcaln 'ixtc 'a win on̈: Comnoc tzon̈ a chaj 'ec' 'a sat a lum tic, sec tojl tzon̈ c'och 'a lum quic chi 'on̈, xqui chi 'a on̈. 20Palta ma'ix schaj win Sehón yab' tas xcal on̈, ma'on̈ schaj 'e't win 'a sat slum cha. A yico', to 'ix syamb'tzej smasnil soldado, axta xc'och sb'o scamplamento 'a Jahas, 'ix ya'n owl quet' on̈. 21Palta ax Jehová qui Diosal on̈, a 'ix 'a'n win Sehón 'a yol qui c'ab' yet' eb' schon̈b' cha, yic xca'n ganar eb' on̈. 'Ixta x'aj slajw 'el win Sehón yet' eb' soldado. Ax smasnil slum eb' amorreo 'a jun chon̈b' cha, 'ix 'ochcn lum quico'oc on̈. 22'Ix quique'ej lum tzcot 'a sti 'a niwquil a Arnón, masnto tzc'och lum 'a sti a Jaboc, tzcot lum 'a lum cusltac lu'um, masnto tzjaw lum 'a sti a Jordán. 23Ax ticnec, ¿tom tze nib'j e to'x 'ec' slum eb' amorreo 'ic'b'il 'ec' yuj Jehová, a 'a'jnac lum 'ayn̈ on̈? 24Q'uinloc a Quemós e diosal ax tic, a tz'a'n junc tas eyico'oc, ¿tom matz eyalch junc chi eyico'oc? 'Ixta pax caj an̈ tic on̈. A tas tzyac' Jehová qui Diosal quico'oc, atn tzcalch pax quico'oc on̈. 25¿Tom tze na ax tic, to yel xo wal jeln ex 'a yib'n̈ Balac, win yunnal Sipor, sreyl Moab? Toc xyac' win yowlal lum lum chi 'ayon̈. 26An̈ israel on̈ tic, 'ayx 'oxe ciente ab'il qui cajn chon̈b' Hesbón yet' yaldeail, xqui cajn pax chon̈b' Aroer yet' jun tzo'n̈ xo aldea 'a stz'ey, xqui cajn eb' lum chon̈b' 'ay 'a sti a Arnón. ¿Tas yuj man̈oc ta e c'anb'jnac lum 'a yic jun tiempoal cha? 27An tic, may tas tu xin b'o 'ayex. Palta ax tic, ax tu tas wan e b'oni, tzex jaw wul eyac' owl quet' on̈. Yuj cha, a cab' Jehová 'oj qui b'eyc'ojlan eyet'oc, xchi Jefté, xchi eb' 'a win rey cha.
28Wach'xam 'ixta 'ix yutj yalni, palta ax win rey cha, ma'ix schaj yab' tas xyal Jefté.
'Ix ya'cn Jefté sti'
29Yuj cha, 'ix 'och Yespíritu Jehová 'a Jefté, 'ix syamn 'och s'ati, 'ix 'ec' 'a yol yic Galaad yet' 'a yol yic Manasés. 'Ix 'ec' pax 'a Mizpa 'a yol yic Galaad cha, 'ix smolb'tzan eb' soldado, xc'och yac' owl yet' eb' amonita. 30Xlajw sc'och Jefté 'a jun lugar cha, xya'n sti 'ixtc 'a Jehová: Toto tzac' eb' amonita tic 'a yol in c'ab', 31an xo tic, a junc mach tzb'ab'l 'elt 'a yol watut yic tzin wul schanoc 'a yol b'e, yic tzin c'ochx 'a owl tic, atn jun chi tzwac' tz'a xajmb'al-l 'aych Mamin Jehová, xchi.
32'Ix 'at Jefté yet' eb' soldado yac' owl yet' eb' amonita cha, ax Jehová 'ix 'a'n eb' 'a yol sc'ab' eb', yic tz'ajx ganar eb' yuj eb'. 33Til wal eb' 'anma chi smil cham Jefté yet' eb' soldado. 'Ay eb' xlaj chamcn 'a chon̈b' Aroer, 'a chon̈b' Minit yet' 'a chon̈b' Abel-keramim. A 'a scal jun tzo'n̈ chon̈b' tic, ata 'ay junc'l xo cotc chon̈b' 'aj 'ix yac' ganar eb' owal. 'Ixta x'aj eb' amonita chi yajx ganar yuj eb' israel cha.
'Ix yisl win Jefté
34Ax yic xlajw owl cha, 'ix pax Jefté 'a yatut 'a Mizpa, ax jun c'otn yisil, a 'ix x'elt chanoc sc'ochi. Xoj schan̈lwi 'ix yet' spandereta yuj stzaljc'ojlal. Cojn wal jun yisl win cha, may junc xo snul'j 'ix. 35A yic 'ix yiln sb'a win 'a jun c'otn yisl cha, 'ix stzilnjat win spichul yic tzch'oxn 'el win scusc'ojlal. 'Ix yaln win 'ixtc 'a 'ix:
—¡'Ay wisil! Caw wal tza'ch in cusc'ojlal tzwab'i. Ach wal tza loc cot yailal 'a wib'an̈, yujto 'ay jun in ti 'ix wac' 'a Jehová, to yowlal tzwac' 'el'choc tas xwal cha, xchi winac.
36'Ix ta'w 'ix 'a smam chi 'ixtic:
—Mamin, toto 'ay tas 'aj 'ix a ta'wj a ti a'n 'a Jehová, a cab' wet' tzac' 'el'choc tas 'ix al 'a cha. Yujto tox 'ix colwj Jehová et'oc yic x'a'n ganar eb' amonita 'a owal. 37Cojn tas tzwal 'aych mamin, to tzac' chab'oc 'ujl in permiso yic tzin b'eyc' can yet' eb' 'ix wit cob'staquil, sec tzin mol 'o'cn yet' eb' 'ix 'a lum jolmctac witz, yujto 'oj in cham 'a 'ichn̈jta', ma'in nupn xoni, xchi 'ix.
38Yuj cha, 'ix ya'n Jefté chab' 'ujl spermiso jun yisl cha. A 'a jun tiempoal cha, 'ix b'eycn 'ec' 'ix cob's chi yet' eb' yit cob'sal chi 'a lum jolmctac witz. 'Ix 'oc' 'ix si'mb'il yujto tzcham 'ix 'a yic mantzac nupni. 39Xlajw sb'eyc' can 'ix 'a chab' 'ujl cha, 'ix pax 'ix 'a yatut smam cha; xlajw cha, 'ix ya'n 'el'choc win sti ya'jnac 'a Jehová. A 'ix cob's cha, may xon junc winc sc'umej 'ix. 40Yuj cha, 'ix 'ochcn jun chi sb'eyb'aloc eb' israel. A yic tzjaw junjn ab'il, smasnil eb' 'ix cob'stac, tzyam sb'a eb' 'ix chan̈e c'u yic tz'oc' eb' 'ix yuj snanb'il cot 'ix yisl Jefté cha.
Currently Selected:
Jue 11: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
