Stg 2

Lajnn̈ej tzcutjec qui nab'en

1Ex wu'tac, ex wanab', toto yel 'aych qui c'ojl 'a Cajlil Jesucristo, atn jun caw niwn yel'chi, yowlal jun lajnn̈ej tzcutjec qui nab'en 'a smasnil 'anma'. 2Q'uinloc 'ay junc rico tz'och 'a 'aj tzqui yamc qui b'a, 'aych junc scolc'ab' nab'a oro, caw wach' yaj yet' spichul. Tzlajw cha, tz'och pax junc meb'a', caw maysch'olnil yilx yet' spichul. 3Q'uinloc cojn jun wach' yaj yet' spichl chi tzqui chamc'ojlejec, tzcalnec 'ixtc 'a 'a: 'Emn̈ wocn 'a jun c'an̈tz caw wach' tic, xqui chic 'a 'a. Ax 'a jun meb'a cha, tzcalnec 'ixtc 'a 'a: Wach' aj lin̈n 'a cha, mto tzach 'em wocn 'a sat lum tic 'a qui tz'ey tic on̈, xqui chic 'a 'a. 4Toto 'ixta tzcutjec qui b'a, wan qui nani, mach 'ay yel'ch 'a qui calec, mach pax ma'ay. Wan ca'nec 'och qui b'a juezal, caw maysch'olnil jun qui nab'enec cha.

5Ex wu'tac, ex wanab', chamc'ojlb'ilx wu'uj. 'A'c 'och e chicn 'a junx tic. A eb' meb'a 'a yolyib'n̈q'uinl tic, atn eb' tzsi'x 'elt yuj Dios, sec wach' tzya'ch eb' sc'ojl 'a 'a. Yuj cha, 'icha to rico tz'aj eb' 'a sat, yujto a 'oj 'i'nc 'at eb' 'a yol sc'ab'. A ya'jnac sti', chajtlto 'ixta 'oj yutc eb' 'ay schamc'ojlal 'a 'a. 6Palta ax xo, may yel'ch eb' meb'a 'a e sat. Palta ¿mach eb' tzon̈ 'ixtnec, tzon̈ yi'nec 'at eb' 'a yojltac eb' yajl tze na'a? Atn eb' rico. 7A eb' cha, ton̈j tzb'uchwj eb' 'a Cristo, jun niwn yel'chi, atn jun 'ayn̈ec yico'.

8Palta 'ay jun sley qui Reylec, tz'ib'b'il can 'a Ch'an̈ U'un̈, ata tzyal 'ixtic: Chamc'ojlejc eyit 'anma'il, 'icha tzeyutj eya'iln e b'a junjn ex, xchi. Toto tzqui yiclj tas tzyal sley tic, caw wach' tzcutjec qui b'a. 9Palta toto man̈ jun lajnoc tzcutjec qui chamc'ojlan smasnil, toto 'ixta', caw tz'och qui mulec. A jun ley tic tzalni, to tz'och qui mul 'a 'a. 10Wach'xam tzqui yicljec smasnil sley Dios, palta toto 'ayt junc matz qui yicljec, tzyal 'el'chi, wan qui te'nec can 'ejm sley chi smasnil. 11A Dios aljnac 'ixtic: Man̈ e b'o 'ajmulal, xchi. Tzyaln paxi: Man̈ e mil cham eyit 'anma'il, xchi. Caw a Dios aljnac schab'il. Yuj cha, wach'xam matz qui b'oc 'ajmulal, palta toto tzqui mil cham junc quit 'anma'il, tzyal 'el'chi, wan qui te'nec can 'ejm sley Dios. 12Yuj cha, yowlal wach'n̈j tzcutjec qui paxtini, wach'n̈j tzcutjec qui b'eyb'al. Yujto 'ay junx ley tzon̈ colnec 'el 'a libre. Yuj jun ley cha, 'oj on̈ sb'ocyaj Dios. 13Toto matz 'o'ch qui c'ojlec 'a eb' quit 'anma'il, ax Dios, ma'oj 'o'ch sc'ojl 'ayn̈ec jun xo, yic 'oj on̈ sb'oncyaji. Palta toto tz'o'ch qui c'ojlec 'a eb' quit 'anma'il, to 'ixta', 'oj 'o'ch pax sc'ojl Dios 'ayn̈ec yic 'oj on̈ sb'oncyaji.

Man̈ colb'ilc tzcala*r* to 'aych qui c'ojlec 'a Dios

14Ex wu'tac, ex wanab', toto tzcalec, to 'aych qui c'ojlec 'a Dios, palta man̈ wach'c tzcutjec qui b'a, ¿tom 'ay yel'chi? Toto 'ixta tzcutjec ca'n 'och qui c'ojl 'a Dios, ¿tom 'oj qui colchjec? 15Q'uinloc 'ay junc quit creyentealec, caw may spichul, may jac tas tzc'uxu. 16Q'uinloc tzcalc 'ixtc 'a 'a: 'Ixic, may a pena. Q'uixnjan̈, b'ut'jan̈, q'uinloc xqui chic 'a 'a. Palta toto may jac tas tzca'c 'a 'a, 'a tas 'ay sc'a'l tz'och yu'uj, ¿tom 'ay yel'chi? 17An̈jtona', toto ton̈j tzcob' ca'c 'och qui c'ojl 'a Dios, palta man̈ wach'c tzcutjec qui b'a, nab'an̈ej tzcob' ca'c 'och qui c'ojl 'a 'a.

18Palta tecn 'ay mach 'oj alnc 'ixtic: Ach tic cojn tza'ch Dios 'a a c'ojol, an xo pax tic, a tas wach' 'a tzin b'o'o, 'oj schioc. Palta an tzwala, may mach tztac' sch'oxni, chajtlto yel tzya'ch sc'ojl 'a Dios, toto man̈ wach'c tzyutj sb'a. Palta 'ay pax eb', yujn̈ej wach' tzyutj sb'a eb', tzch'oxn 'el eb', to yel 'aych sc'ojl eb' 'a Dios. 19'Ay eb' tz'a'n 'och 'a sc'ojol, to junn̈j Dios. Wach' ton cob' tzna eb'. Palta an̈jtona', 'ixta pax ewin demonio, tzya'ch cob' ewin 'a sc'ojol, palta caw tz'ib'x ewin yuj xiwlal. 20Palta 'ayex 'icha wal to may e nab'en, nachj cab' 'el jun tzo'n̈ tic eyu'uj. Toto tzcob' cala to 'aych qui c'ojl 'a Dios, palta man̈ wach'c tzcutj qui b'a, toxn may yel'chi, may qui colnb'il yu'uj. 21A qui mam quichm Abraham 'a pecti', yijnac 'at jun yunnal Isaac sb'i, yic ya'n xajmb'al-l snani, 'icha yaljnac Dios 'a 'a. Yuj wal tas sb'ojnac Abraham cha, yoch wach'l 'a sat Dios.#Stg 2.21 A jun 'ab'x tic, tz'ilchj pax 'a Génesis 22.1-13. 22Nachj cab' 'el eyu'uj, chajtlto yujn̈ej to ya'jnac 'och Dios 'a sc'ojol, tztac' sb'on jun chi 'ixta'. At yic sb'on jun cha, xcheclj 'eli, chajtlto caw yel 'aych sc'ojl 'a Dios. 23Yuj cha, tz'el'ch tas tzyal 'a Ch'an̈ U'un̈, 'a 'aj tzyal 'ixtic: A Abraham, 'ix ya'ch sc'ojl 'a tas xyal Dios. Yujn̈ej cha, yaln Dios to wach' 'a sat, xchi. An̈jtona', tzyaln pax 'a Ch'an̈ U'un̈, chajtlto a Abraham cha, swach'c'ojl sb'a yet' Dios.

24Yuj cha, nachj cab' 'el eyu'uj, to man̈ cojnoc yuj tzca'c 'och qui c'ojl 'a Dios wach'n̈ec 'a sat, palta yuj pax tas wach' tz'el qui b'onec yuj cha, wach'n̈ec 'a sat. 25'Ixta pax jun 'ix Rahab sb'i 'a pecti', atn jun 'ix 'ajmul 'ix. Ya'jnac 'ix sposada eb' schecb' eb' quit israelec. Xlajw cha, schecn pax 'at 'ix eb' 'a junx b'e, sec matz yamchj eb'. Yuj wal tas sb'ojnac 'ix cha, yoch 'ix wach'l 'a sat Dios.#Stg 2.25 A jun 'ab'x tic, tz'ilchj pax 'a Josué 2.1-21. 26Toto cob' tzca'c 'och qui c'ojl 'a Dios calni, palta man̈ wach'c tzcutjec qui b'a, may yel'ch tas tzcalc cha. Lajn 'icha sniwnal junc chamnc 'anma man̈x 'a spixan.

Currently Selected:

Stg 2: CSS

Highlight

Compare

Copy