Is 25
25
B'it yic 'alj wach' paxti 'a Dios
1Mamin Jehová in Diosal ach; 'oj ach in b'itnoc yet' in wach' paxti', yujto caw xac' 'el'choc tas nab'il o'oj, caw satjub'tac yilxi, to wach' yajcn xon oj 'a yictax pecti'.
2'Icha wal junc b'ulc q'uen q'ue'en, 'ixta x'ajcn jun tzo'n̈ chon̈b' o'oj. A jun tzo'n̈ chon̈b' caw wach' yajch yipnub'al, a 'ix lan̈chj 'ejmi. 'Ix a ma'n pax lan̈chjoc sdespacho eb' 'ajc'ojl yajch 'ayon̈, man̈x 'a b'a'n̈ 'oj b'ox chan̈ jun 'ejm xo.
3Yuj cha, a eb' nacion̈ caw 'ay yip, 'ayx el'ch 'a sat eb' ticnec, ax eb' may sniwnc'ojlal, 'oj xiw eb' 'ayach.
4Yujto cojn 'aych 'aj tztac' scoln sb'a eb' meb'a', colwjum aj 'a eb' 'ay scusc'ojlal yuj tas 'ay sc'a'l tz'och yu'uj. A eb' 'anma may sniwnc'ojlal, lajn eb' 'icha yaxn̈ab' 'aych yic'al, lajn pax eb' 'icha yowl sma'wj yoc c'u. Palta ach tzon̈ a col 'a eb' on̈.
5'Icha wal yowl sma'wj yoc c'u 'a lum tacn̈ lu'um, 'ixta tzotj e'n 'ejm sb'an̈jb'al eb' 'ajc'ojl yajch 'ayon̈. 'Icha wal tz'aj sicb' yoc c'u yuj yen̈l junc 'asun, 'ixta wal tz'aj yactn eb' may sniwnc'ojlal chi yel yaw.
'Oj ya'ch Jehová jun niwn wa'el
6A Jehová tztac' yuj smasnil, a 'a tzaln Sión ata 'oj sb'o jun niwn wa'el. 'Oj yac' wa smasnil eb' nacion̈ ta', a jun schib'l wal cha, caw wal wach', ax ya'n yuc' eb' yal uva jawnac sti', atn jun yal uva to caw wach' yaj sb'o'i.
7A 'a lum tzaln cha, ata 'oj yi'l Jehová jun cusc'ojlal 'aych 'a yib'n̈ smasnil nacion̈, yujto 'icha junc nip tz'och b'a'n̈ 'a junc chamnac, 'ixta jun yailal cha.
8'Oj satl Jehová chaml 'a jun 'ejmn̈ej, ax sucn 'el yal sat smasnil eb' 'anma'. 'Oj satl pax sq'uixwel eb' schon̈b' 'a smasnil yolyib'n̈q'uinl tic, yujto 'ixta yaj yaln cani.
9A 'a yic jun c'ul cha, 'oj calc 'ixtic: Atn wal Jehová qui Diosalec tic, a ca'jnaquec 'och yipc qui c'ojol, yuj cha, on̈ scolnec. Ca'c wal tzaljoc qui c'ojol, yujto a 'on̈ colnec, 'oj qui chioc.
'Oj jawc yailal 'a yib'n̈ Moab
10A Jehová, a 'oj tan̈wnoc lum tzaln Sión, ya' sb'a ax chon̈b' Moab, wan ste'x can 'ejm 'icha tz'aj ste'x 'at te 'ac 'a scal stza no noc' 'a yol junc jul.
11'Icha to 'oj cob' sjen̈l Moab chi sc'ab', 'icha tz'ajl jen̈n sc'ab' junc mach tznoxwi, wach'xam 'oj cob' to yac' wal yip, palta 'oj sat 'ejm sb'an̈jb'al chi yuj Dios.
12Smasnil smuroal jun chon̈b' to caw niwc yaj sb'o'i, c'uxn 'oj smac' lan̈chjoc Jehová, caw choc' 'oj 'ajcn 'ejm b'uln 'a sat lu'um.
Currently Selected:
Is 25: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
