Is 16
16
'Oj 'at scol sb'a eb' 'aj Moab
1A eb' 'anma cajn 'a lum cusltac lum yic Sela, 'oj ya' cot eb' no calnelu 'a jun mach yajl yaj 'a yib'n̈ eb' 'aj Sión.
2Ax eb' 'aj Moab tzc'och scol sb'a 'a sti a niwn a Arnón, lajn 'oj yutc sb'a eb' 'icha no ch'ic tz'at 'elc 'a so'.
3Ax yaln eb' 'ixtc 'a eb' 'aj Sión: Na'ec tas tzon̈ eyutj on̈ e colni, ax tzex 'och qui colmalc on̈. 'Icha junc te 'ay yen̈l 'a chimc'ual, 'ixta cab' tzeyutj on̈ e c'ub'n 'el 'a eyen̈ul. 'Icha tzyac' junc tas 'a 'ac'wal, man̈ checloc, 'ixta tzon̈ eyutj an̈ tzon̈ 'atcn 'elc tic on̈, man̈ on̈ e ch'ox on̈.
4Tzon̈ e chaj 'och 'a e cal, tzon̈ e c'ub'j 'el 'a eb' tzon̈ sayn 'ec' on̈. Matz on̈ e ch'ox 'a eb' on̈, 'oj schic eb' 'aj Moab cha.
A yic 'oj lajwc 'ec' jun yailal cha, yet' 'a yic 'oj 'el jun tz'a'n lajwc 'el jun nacion̈ tic,
5ax jun yin̈tl can David, a 'oj 'ajxoc yopiso reyal. 'Oj yac' yajlil 'a scal 'anma yet' schamc'ojlal. Caw wach' 'oj yutc sb'on yaj eb' 'anma 'a stojlal, yajn̈ej ax tzb'onyaj eb'.
6Cojquec wal si'mb'il tas x'aj yi'n chan̈ sb'a eb' 'aj Moab, caw sb'an̈ sb'a eb', caw tu tas xlaj yal eb', palta man̈ yelc tas xyal eb' cha.
7Yuj wal cha, smasnil eb' 'aj Moab 'oj 'oc' eb' yuj snacion̈ cha, ax scus eb' smasnil yuj te tacn̈ sat uva tzcot 'a Kir-hareset 'a pecti'.
8A te 'awb'en uva 'a Hesbón yet' 'a Sibma, 'oj tacjoc 'el te', yujto xlaj te'x can 'ejm te yuj eb' yajl jun tzo'n̈ xo nacion̈. A te sc'ab' cha, 'ayt c'och te sn̈i chi 'a Jazer, tzc'och to potn te 'a lum cusltac lu'um, masnto tzc'och te 'a sti a mar.
9Yuj cha, 'oj 'oc' eb' 'anma chi yuj te uva 'a Sibma, yuj te yic Jaser, ax yelt yal sat eb' yuj te uva yic Hesbón yet' yuj te yic Eleale. A 'a scal yawb'ente eb' 'anma cha, ata 'oj 'el yaw eb' yuj owal.
10A tzaljc'ojlal yet' 'el-l 'aw 'oj sat 'ejmi. Man̈x 'a mach 'oj 'el yaw mto 'oj b'itnoc 'a scal te 'awb'en uva cha, man̈x 'a pax mach 'oj ste'l yal uva 'a ste'lab'. Smasnil 'aw cha, 'oj sat 'ejmi.
11Yuj cha, caw wal tzcus in c'ojl yuj tas 'oj 'aj slajw 'el eb' 'aj Moab yet' eb' 'aj Kir-hareset.
12Wach'xam 'oj cob' 'at eb' 'aj Moab chi yal sb'a 'a lum tzalctac, mto 'oj cob' 'at yic' 'ejm sb'a eb' 'a yol yatutal 'aj tzyam sb'a, a jun cha, man̈x 'a xon jac tas tzb'o yu'uj.
13Atn jun tzo'n̈ tic yaljnac can Jehová 'a yib'n̈ Moab 'a pecti'. 14Ax ticnec, tzyaln pax 'ixtic:
Yab'm wal 'oxab', 'icha wal sb'isn junc munljum jantc xo tiempo smunlji, 'ixta wal sb'isx sc'ul slajw 'ejm tas 'ay 'a eb' 'aj Moab. Til wal 'anma 'oj satli; jaywn̈ xoj eb' 'oj canoc, man̈x 'a yip eb' scoln sb'a 'a owal, xchi Dios.
Currently Selected:
Is 16: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
