Os 13
13
'Oj lajwc 'ejm chon̈b' Israel
1A yic xpaxtin eb' yichm wincal chon̈b' Efraín 'a scal eb' israel 'a yic pecti', caw 'ay yel'ch eb' 'a sat jun tzo'n̈ xo eb' yit israelal. Ax ticnec ex yin̈tl Efraín, 'oj e cham yuj e mul xeya'chi, yic x'at eya'nc 'emmquilal 'a jun yechl Baal.
2An̈ja sniwtj eya'n 'och e mul. Tzlaj e b'onc q'uen plata e diosaloc, a tzyal tas tznachj eyu'uj, 'ixta tzeyutj e b'on junc yechl cha. Tzlajw cha, tzeyaln 'a eb' 'anma 'ixtic: 'A'c e xajmb'al 'a 'a, xe chi. Tzlaj e tz'ub'n 'elt sti jun yechl wacx cha.
3Yuj cha, lajn 'oj eyaj 'icha 'asn 'ay 'ejm 'a sq'uin̈b'ial, 'icha pax chicb'chan̈ tz'em 'a 'ac'wal, to yajn̈ej tzsatcha'an̈. Lajn ex pax 'icha te tzab' tz'ijx 'at yuj 'ic', mto 'icha te tab' tz'el 'a swentnul cusnu.
4'Ix yaln Jehová eyuj 'ixtic: An Jehová e Diosal in, yictax 'ayc' eb' e mam eyichm 'a Egipto, may junc xo tas xya'ch eb' sdiosaloc, palta cojn in. Cojn in ton sColmal eb' waji.
5Caw wach' wutjnac in tan̈wni eb' 'a lum cusltac lu'um, 'a 'aj caw 'ay c'ac'.
6Palta a yic ya'n sobra tas tzc'ux eb', 'ix sb'an̈n sb'a eb', in 'atcn 'a satc'ojlal yuj eb'. 'Ixta pax ex ax tic.
7Yuj cha, 'icha wal junc no león, 'ixta 'oj wutc in b'a 'ayex, mto 'icha junc no leopardo tz'em lachn 'a yol b'e.
8'Oj welt jomnjoc 'a e sat 'icha junc no snun oso tz'ijx 'el yune 'a 'a, 'oj ex in ch'iychtoc can ta', 'icha tzyutj no león, mto 'icha tzyutj junc xo no calte'al noc' sch'iychtan schib'ej.
9'Oj ex wac' satl ax israel ex tic, may xon mach 'oj stac' yi'n 'ec' 'a eyib'an̈.
10Ax tic, e c'anjnac e reyal, yet' eb' tzex jucb'tzani, palta ¿tom a eb' tztac' stan̈wni e chon̈b' tic?
11Caw 'ay cot wowl 'ayex yic xwa'n eb' e reyl cha, an̈jtona', 'ay cot wowl 'ayex, yic xwi'n 'el ewin 'a yopiso.
12Caw checl yaj e mul ex 'aj Efraín. 'Ix stz'ib'x can e maysch'olnilal.
13Ex 'aj Israel, xc'och sc'ul e nan e b'a, palta may xon jac e nab'en. Lajn ex 'icha junc 'unn matz uj stoljb'tzan sb'a 'a yol sc'ojl snun, yuj cha, matz tac' xon yalji.
14¿Tom 'oj ex in colcn 'el 'a yol sc'ab' yet'l chamel? Ma'ay. An 'oj ex wac' xiw 'a chaml cha, ax e satx 'el yu'uj. Man̈x 'oj 'o'ch pax in c'ojl 'ayx ex 'aj Efraín.
15Wach'xam 'oj e niwtj chan̈ 'a scal eb' eyit israelal, palta 'oj cot wowl 'ayex. Lajn 'oj 'aj scot 'icha tacn̈ 'ic' tzcot 'a cusltac lum 'aj tzq'uel c'u, yuj cha, 'oj tup chan̈ eb' a spac'b'a' yet' eb' a c'ob'a'. Ax eb' 'ajc'ojl yajch 'ayex, a eb' 'oj 'i'nc 'at smasnil e ricoal.
16A eb' 'aj Samaria, 'oj jawc pax yailal 'a yib'n̈ eb', yujto tenmtac tzyutj sb'a eb' 'ayin. 'Oj milxoc cham eb' yet' q'uen espada. A yunnal eb', 'oj ma'xoc 'ejm eb' 'a sat lu'um, sec tzcham eb'. A eb' 'ix 'ix yet'x yune', 'oj tecxoc 'elt yol sc'ojl eb' 'ix, xchi Dios.
Currently Selected:
Os 13: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
