Heb 13

A tas tzcutjec qui b'eyb'al

1Man̈ cactquec can qui chamc'ojlan qui b'a, yujto quit creyentealec qui b'a. 2Qui nac coti, to yowlal wach' tzcutjec qui b'a 'a eb' tzlaj 'ec' 'ayon̈. 'Ay eb' 'ixta yutjnac sb'a, palta man̈ yojcoc eb', toto ángel eb' 'aj wach' yutjnac sb'a eb' cha.

3Qui nac cot eb' 'aych 'a preso, 'icha cab' to preso cajc yet' eb'. Qui nac cot pax eb' tz'ajx syailal, yujto an̈ec tic, lajn on̈ yet' eb'. Lemb'il 'oj 'ajxc pax qui yailal yet' eb' jun xo.

4A yic tzqui'nec qui b'a yet' quistl junjn on̈ec, 'ay cab' yel'ch jun 'ijb'al chi 'a qui satec. Yowlal cojn 'a quistl junjn on̈, cojn ta tzca'c 'och qui nab'en. Yujto a Dios 'oj b'eyc'ojlanc eb' tzb'on 'ajmulal. Wach'xam eb' 'ayx yitb'eyum, wach'xam eb' manto, 'oj 'ajxcn̈ej 'och 'a yib'n̈ eb'.

5Man̈ cojxnoc 'a tumn 'aj tzca'c 'och qui nab'en qui sayni. Tzalj coyc cab'n̈ej yet' tas 'ay 'ayn̈ junjn on̈ec, yujto yaljnac Dios 'ixtic: Ma'oj ex wactc cani, may b'a'n̈ 'oj e can e ch'ocoj, xchi. 6Yuj cha, caw matz on̈ xiwc caln 'ixtic:

A Cajlil, a tzcolwj wet'oc. Yuj cha, caw matz in xiw yuj tas 'oj in yutc eb' wit 'anma'il, xqui chi.

7Tze na cot eb' laj 'e'nc ex scuyu', eb' laj aljnac 'el spaxti Dios 'ayex. Tze na coti, tas 'ajnc eb' yuj swach' b'eyb'al. 'Icha yutjnac eb' ya'n 'och sc'ojl 'a Dios, 'ixta tzeyutj e b'a jun xo.

8A Jesucristo, lajnn̈ej snab'en 'a yictax pecti', ticnec, yet' 'a yic b'aq'uin̈. 9Man̈ e cha 'ijxoc 'at e b'a yuj jun tzo'n̈ tzann̈j chuc cuynb'ilal tzalxi. Caw wach' toto tz'ajx ste'nal qui nab'enec yuj swach'c'ojlal Dios tzyac' 'ayn̈ec. Al jun tzo'n̈ comn checnb'il tzyal yuj tas tzqui c'uxu, matz tac' tzte'nb'i qui nab'enec yu'uj. Yujto a jun tzo'n̈ checnb'il cha, may jac yopiso sb'on snab'en eb' tzb'eylb'ani.

10Palta an̈ec xo tic, chuc jun qui xajmb'alec. Ax eb' ya'mal 'och sti eb' quit israelal 'a Dios, eb' 'a'jnac servil 'a jun scajnub', may yaln eb' yic schin jun xajmb'al tic. 11Yujto a win sat ya'mal 'och sti eb' 'anma 'a Dios, a tz'i'n 'och schic'l jun tzo'n̈ no noc' 'a jun cuarto caw yicn̈ej Dios yaj sch'ocoj. Ax 'a sti 'el camplamento 'aj 'ayc' eb' cha, ata tz'a jun tzo'n̈ noc' cha. 12An̈jtona', 'ixta 'ajnc Jesús yab'n syal scham pax 'a sti 'el chon̈ab', sec wach' yuj wal schiq'uil, tz'elcn smul eb' 'anma'. 13Yuj cha, 'elcoyc 'a 'aj 'ijxnac 'el Jesús 'a sti 'el chon̈b' cha, tzyal 'el'chi, to tzchaj qui c'ojl qui patquilx can 'el 'icha 'ajnc spatquilx can 'el Jesús. 14Yujto man̈oc 'a yolyib'n̈q'uinl tic 'ay junc qui chon̈b'ec 'ay 'a jun 'ejmn̈ej. Palta 'ay jun qui chon̈b'ec tot 'oj jawoc. Atn jun chi wan qui tan̈wniec. 15Yuj cha, smasnil tiempo yowlal tzcalc wach' paxti 'a Dios yuj Jesucristo. A yet' qui ti', tzcalc swach'l Dios. A jun tzcalc tic, atn jun qui xajmb'al tzca'c 'a 'a. 16Man̈ ca'c satc qui c'ojl qui b'on jun tzo'n̈ wach'il, tzon̈ colwjec pax 'a eb' quit 'anma'il. Yujto a jun tzo'n̈ tic, qui xajmb'al yaj 'a sat Dios, caw tzalj yet'oc.

17Caw tzeyiclj tas tzyal eb' tzex 'a'n cuenta. Yiclum tzeyutj e b'a 'a eb'. Yujto a eb' cha, wan ex stan̈wni eb'. Yojc eb', chajtlto 'oj yac' eb' scuenta 'a Dios. Wach' tzeyutj e b'a, sec tzalj eb' yiln jun munljel cha, sec matz cus eb'. Toto tzeyac' cus eb' yuj e tenmtaquil, caw man̈ wach'c eyico'.

18Leslwan̈c cuj on̈, yujto tzqui na'a, to wach' tzcutj qui nab'en on̈. Tzqui nib'j on̈, caw wach' tzcutj qui b'eyb'al 'a smasnil tiempo on̈. 19An xo tic, caw tzin tew 'at 'ayex, caw tzex leslwi wu'uj, sec 'oj stac' in c'ochx 'ayx jun 'ejm xo muc'uc.

Tz'ajx 'at stzatzl sc'ojl eb'

20A Dios 'a'm junc'ojlal. A 'a'jnac pitzwc pax Cajlil Jesucristo 'a scal eb' chamnac. A Jesucristo, 'icha 'Ilm Calnelu yaj 'ayn̈ec, caw niwn yel'chi. Yuj schiq'uil, 'ix 'el'ch jun strato Dios 'aycn 'a jun 'ejmn̈ej. 21Tzin nib'ej, yuj schic'l cha, tzwach' b'oj Dios e nab'en, sec wach'n̈j 'oj eyutc e b'a, tze b'on 'icha tznib'ej. Tzin nib'j paxi, yuj Jesucristo caw wach' tzon̈ 'ajc 'a sat, sec tzalj quet'ec. Niwn cab' yel'ch Cristo 'a smasnil tiempo. 'Ixta cab' tz'aji.

22Ex wu'tac, ex wanab', tzin tew 'at 'ayex, caw niwn tzeyutj e c'ojl 'a jun tzo'n̈ paxti tzwalb't 'ayx tic, yic tzwa'n e nab'enoc. Janc'n̈ej tas tzwalb't 'ayx 'a jun in carta tic. 23Tic tzwalb't 'ayex, a cu'tac Timoteo, x'el 'a libre. Toto 'oj jawc 'a tic muc'uc, 'oj 'at wet'oc, ax 'at ex wilnoc.

24Tic tzwa't stzatzl sc'ojl junjn eb' schecb' Dios tzex 'iln ta'. Tzwa'n pax 'at stzatzl e c'ojl e masnil ex yic xo Dios wet'oc. Yet' pax eb' 'aj Italia, tic tzya't pax eb' stzatzl e c'ojol.

25Tzin nib'ej, tzyac' Dios swach'c'ojlal 'ayx e masnil ta'. [Ya' cab'i'.]

Currently Selected:

Heb 13: CSS

Highlight

Compare

Copy