Hab 3
3
A slesl win Habacuc
1An Habacuc in tic, schecb' in Dios, atn jun in lesl tic.
2Mamin Jehová, a wal yic tzwab'n yab'xil smasnil tas tzlaj a b'o', caw wal tzsat in c'ojl yu'uj. B'o tas 'a qui tiempoal tic, 'icha tas a b'ojnac 'a yic pecti cha. Wach'xam 'a scal yowl a c'ojol, palta ch'ox quil tas tz'aj yo'ch a c'ojl 'ayn̈ on̈.
3Ach Dios Cojxn̈ej ach Niwn El'chi, ach cot 'a lum tzaln tzcuch Parán 'a yol yic Temán. Xmacchj 'el smasnil satchan̈ yuj a tzictznial, ax smasnil tas 'ay 'a yolyib'n̈q'uinl tic, c'uxn xyal eb' swach' paxti 'ayach.
4Ach jaw 'a scal a tzictznial. Xlaj 'eltoc jub'ljoc raya 'a yol a c'ab'. A 'ix ch'oxn 'eli, to 'ay a poder c'ultac yaj o'oj.
5A yab'il 'ay smay, a b'ab'l s'at o'oj, ax 'aj tox ach 'e'cni, chaml tzujcani.
6A yic tzach 'och wa'an, caw tz'ib'x lum lum tic o'oj. Smasnil jun tzo'n̈ nacion̈, xlaj 'ib'x chan̈ eb' yuj xiwlal yic ach 'och q'ueln 'a eb'. A jun tzo'n̈ lum niwc witz 'ayc' xon 'a yictax pecti', 'ix laj poj eb' lu'um, 'ix lan̈chj 'ejm smasnil lum witz cha, atn 'a 'aj 'e'nc ach 'a yictax pecti'.
7'Ix wil yochcn eb' 'aj chon̈b' Cusán 'a somc'ojlal, ax eb' cajn 'a lum Madián, 'ix 'ochcn eb' 'a xiwc'ojlal.
8Mamin Jehová, man̈oc 'a eb' a niwc a xcot owal. Man̈oc 'a a mar xc'ac'b' 'och yowl a c'ojol, yic ach 'at ac' owal, yuj a satn 'el eb' 'ajc'ojol, 'icha to ach q'ue 'a yib'n̈ a chej, yet' 'a yojl a caruaje yic owal.
9'Icha to 'ix ej q'uet a jul-lab' 'a yol yet'ul, 'ix a'n lista yic tzach julwj yet'oc. Ax eb' a niwc b'eymal a', 'ix ac' b'icnc 'at sat lum lu'um.
10A yic xa ch'oxn a b'a, caw x'ib'x chan̈ eb' lum niwc witz yuj xiwlal. 'Ix cot yaxn̈ab' 'a satcha'an̈, ax a mar, til wal sc'an̈ chan̈ a', yic xq'ue wan chel-loc a 'a cha'an̈.
11Ax c'u yet' 'uj, 'ix 'och wan eb' sb'eyi, yic 'ix 'elt jupljoc a jul-lab' cha, caw 'ix q'ue wan jupljoc a lanza.
12Yet' wal yowl a c'ojol, xa te'n can 'ejm lum lum tic. Yet' wal a c'a'lc'ojlal xa te'n can 'ejm jun tzo'n̈ xo nacion̈.
13Ach 'elt colwjoc 'a a chon̈ab', yet' 'a win rey sic'b'il 'el o'oj, ax win syajlil eb' 'anma maysch'olnil 'ix a te'cn 'ejmi. 'Ix a satn 'el schon̈b' winac, masnto sat 'ejm yopiso winac.
14A eb' yajl yaj 'a scal eb', mun a syamc'ab' eb' yic owal, a 'ix ac' milnc chamoc yic xjaw lemnjoc eb' cob' wul on̈ satli. Caw 'ix tzalj eb', 'icha junc mach tznib'n milnc cham junc 'oltac 'anma tzc'ub'j 'el sb'a.
15'Icha to ach b'ey 'a yib'n̈ a mar yet' a chej, yuj cha, til wal x'ib'x can chan̈ a niwquil mar cha.
16A yic xwab'n smasnil tas 'oj jawc 'a quib'n̈ chi 'on̈, caw in xiw cha'an̈. 'Ix 'ib'x chan̈ in ti'. Smasnil in niwnal, caw man̈x 'a yip, tzanxn̈ej 'aj in telwi. Wach'xam 'ixta 'oj 'ajoc, palta caw junc'ojlaln̈ej waj in tan̈wni jun c'ual yic 'oj jawc yailal oj 'a yib'n̈ eb' tz'a'n owl quet' on̈.
17-18An tic, caw 'ay in tzaljc'ojlal oj Jehová ach in Colmal. Wach'xam matz nichn te higo, wach'xam matz satn te uva yet' te olivo, wach'xam may sat smasnil 'awb'en; wach'xam tzsat 'ejm no calnelu, yet' no wacx 'a yol scolal, palta 'oj waln̈j in wach' paxti 'ayach.
19Mamin Jehová Wajlil, ach tzac' wip. Tzac' yip woc sec tztac' in b'ey 'icha no c'ultquil chej, tzin e'n q'ue 'a cha'an̈, 'a 'aj wach' in colchji.
B'itnaxc cab' jun b'it tic yuj win tzjucb'tzan b'it, yet' jun tzo'n̈ yamc'ab ch'an̈ 'aych 'a 'a.
Currently Selected:
Hab 3: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
