Gn 42

C'ochnc eb' yu'tac José*r* manj trigo 'a Egipto

1Ax xyab'n win Jacob speclal to a 'a Egipto caw 'ay 'ixm trigo, yuj cha, xyaln win 'a eb' yunnal 'ixtic: ¿Tas tze b'o'o, ton̈j tzeyil-laj 'och e b'a? 2Xwab' speclal to a 'a Egipto caw wal 'ay 'ixm trigo. 'Ixquec 'at mannc qui trigo ta', sec wach' matz on̈ chamc yuj wejel, xchi.

3Xlajw cha, 'ix 'at lajn̈wan̈ ewin yu'tac win José manj trigo 'a Egipto. 4Ax win Benjamín yu'tac win José, ma'ix schaj 'at win Jacob chi winac, yujto sna win 'ixtic: Toq'ue 'ay tz'i'n win wunnal tic, xchi winac. 5Til wal jun tzo'n̈ xo ewin manm trigo x'at yet' ewin yunnal Jacob atn win tzcuch pax Israel, yujto 'ay wejl 'a yol yic Canaán.

6Ax José yajl yajch 'a Egipto cha, a tz'a'n 'elt 'ixm trigo 'a eb' manwjum tzlaj c'ochi. A yic xc'och eb' yu'tac 'a yojltac, x'em n̈ojn eb', masnto squil 'ejm eb' snan̈l sat 'a sat lu'um. 7Yajn̈ej xyojcan 'el José eb' yu'tac cha, palta 'icha to man̈ yojcoc sb'a yet' eb', 'ixta xyutj sb'a, ow xyutj paxtinc sb'a 'a eb':

—¿'Ajtil ex cot ax tic? xchi.

—On̈ cot 'a Canaán, to tzon̈ jaw manj trigo on̈, xchi eb'.

8Wach'xam a José xyojquej 'eli to yu'tac sb'a yet' ewinac, palta ax eb', ma'ix yojquej 'el eb'. 9Atta xnachj cot yuj José yuj swaych 'a eb' 'a yic pecti'. Xyaln 'ixtc 'a eb':

—Ax tic 'ilwjum ex, ton̈j tzwul eyila', toto 'ay 'aj wach' yoxt eb' 'ajc'ojl 'a jun chon̈b' tic, xchi.

10Yuj cha, xyaln eb' 'ixtic:

—May mamin, an̈ a checb' on̈ tic on̈, tzon̈ jaw manj trigo 'ayach. 11Qui masnil on̈ junn̈j qui mam on̈, cu'tacn̈ej qui b'a on̈, wach'n̈j qui nab'en on̈, may 'aj tzca'ch qui b'a 'ilwjumal on̈, xchi ewinac.

12—Man̈ yelc tzeyal ax tic, ton̈j tzwul eyila', toto 'ay 'aj wach' yoxt eb' 'ajc'ojl 'a jun chon̈b' tic, xchi José 'a eb'.

13Xyaln pax ewin 'ixtic:

—Ma'ay, an̈ tic on̈ mamin, lajchwan̈ qui b'ey on̈, cu'tacn̈ej qui b'a on̈, junn̈j qui mam on̈, ata cajn on̈ 'a Canaán. A win cu'tac slajb' 'unn on̈, 'aycn win yet' qui mam on̈, ax junx winac, man̈x 'a win 'ayc' quet' on̈, xchi ewinac.

14'Ix yaln pax José 'ixtc 'a eb':

—Caw yel tas xwal 'ayex, ax tic, ton̈j 'ilwjum ex. 15'Oj yal sb'a tas 'oj e can yuj jun tic: 'A sb'i win rey tzwaln 'ayex, may xon junc mach tztac' spax 'a tic, masnto tzjaw win eyu'tac slajb' 'unn cha. 16A ticnec, tzex 'at junc ex 'at eyi' cot winac; ax xo ax tic tzex cancn presoal 'a tic, yic wach' tzquila toto yel tzeyala. Palta toto man̈ yelc tzeyala, yel ton b'i'an to 'ilwjum ex, 'a sb'i win rey tzwaln jun tic 'ayex, xchi win 'a eb'.

17'Oxe c'u x'och ewin 'a preso yuj José cha. 18Ax 'a schab'jial xyaln José 'a ewin 'ixtic:

—An tic tzin xiw 'a Dios; toto tzeyiclj jun xwal 'ayx tic, tzex colchj 'eli. 19Toto yel tzeyala wach' ex, junxn̈ej ex tzex can 'a preso tic, ax jaywn̈oc ex tzex 'at 'a e chon̈b' cha, 'ijec 'at 'ixm trigo tic, sec tzwaj eb' eyunnal cha. 20Palta tzeyij cot win eyu'tac slajb' 'unn cha; 'ixta to b'i'an ax quilni toto yel tzeyala. To 'ixta', ma'oj e chami, xchi José 'a ewinac.

Syiclni eb' s'ati. 21Xlajw cha, xlaj yal-lanc eb' 'a junjn 'ixtic:

—Caw wal yel tu xcutjec qui b'a 'a win cu'tac José, ma'ix qui chajec cab'i', yic xtew 'och win 'ayn̈ec, sec tz'o'ch qui c'ojlec 'a 'a, ton̈j xquilec to caw 'ix cusi. Yuj ton am cha, tzjaw jun cusc'ojlal tic 'a quib'n̈ec, xchi ewinac.

22Xyaln win Rubén 'a eb' yu'tac 'ixtic:

—Waljnac 'ayex to matz 'och e mul 'a winac, palta ma'ix e chaj eyab' 'a tas xwala. A ticnec tic wal tzcot 'a quib'n̈ec yuj xchamlil winac, xchi winac.

23Ma'ix nachj 'el xon yuj ewinac toto wan yab'n José tas wan yaln eb' cha, yujto a 'a sti eb' 'aj Egipto tzpaxtini, chuc win tz'a'n 'och sti eb' a 'a. 24'Ix yi'n 'el sb'a José 'a stz'ey ewinac, syamn 'och yoq'ui. Xmeltzj pax coti, 'ix paxtin jun 'ejm xo. Xlajw cha, xyi'n 'el Simeón 'a scal eb', sat wal eb' xjalx can winac.

25Xlajw cha, xya'n José 'ajxoc b'ut'joc scoxtl eb' yet' 'ixm trigo cha, xya'n pax win 'ajxoc meltzjoc q'uen stumn junjn ewinac, xya'n 'ejm 'a sti scoxtl junjn eb', xya'n 'at pax tas tzc'ux eb' 'a yol b'e, 'ixta wal xyutj win eb'. 26Xya'n 'och ewin yictz e no sb'uru cha, xlajw cha, xpaxt ewinac.

27Ax yic xjaw ewin 'a 'aj xwayi, sjacn jun win sti scoxtal, xyi'n q'uet win jac strigo no sb'uru chi yalni. Ax xyiln winac to 'ay 'ejm q'uen tumn 'a yol sti scoxtl cha, q'uen xyac' win mannc strigo cha. 28Xyaln win 'a ewin yu'tac chi 'ixtic:

—'Iltec wali, xya'x meltzjoc ewin q'uen in tumin, 'ay 'ejm q'uen 'a sti 'in coxtl tic, xchi winac. Caw x'ib'x eb' smasnil yuj xiwlal, xyaln junjn eb' 'a 'ixtic:

—¿Tas yuj 'ixta tzon̈ yutjec Dios? xchi ewinac.

29Ax yic xjaw ewin 'a schon̈b' 'a Canaán, xyaln eb' 'a Jacob atn smam eb', yuj smasnil tas x'ec' 'a yib'n̈ eb'. Xyaln eb' 'ixtic:

30—A win yajl 'a jun chon̈b' cha, caw wal ow xyutj paxtinc sb'a win 'ayn̈ on̈, tolab' ton̈j tz'at quil 'elt 'a yol schon̈b' cha, 'icha to 'ilwjum on̈ yalni. 31Palta xcaln 'ixtc 'a win on̈: Caw wach'n̈ on̈, man̈ tuc qui nab'en yic tzon̈ 'eq'ui, man̈ on̈ 'ilwjumoc, 32lajchwan̈ qui b'eyi, junn̈j pax qui mam, jun win cu'tac on̈ man̈x 'a win 'ayc' quet'oc, ax junx win slajb' 'unin, 'aycn win yet' qui mam 'a Canaán, xqui chi 'a on̈. 33Xlajw cha, xyaln win syajlil jun chon̈b' chi 'ixtic: Toto caw yel wach' ex, can cab' junc win eyu'tac tic 'a tic, tzeyi'n 'at jac 'ixm trigo 'a eb' eyunnal wan scham yuj wejl cha. 34Palta yowlal tzeyij cot win eyu'tac slajb' 'unn chi wil 'a tic; 'ixta 'oj 'aj wojcan 'eli, chajtlto yel wach' e nab'en, man̈ ex 'ilwjumc tzyal cha, ax wa'n 'el win eyu'tac tic 'a libre, 'ixta to b'i'an, libre eyeq'ui, xchi winac, xchi eb'.

35Ax yic sjiyn ewin sti scoxtl cha, ax xyiln ewinac 'ay 'ejm q'uen tumn chi yet' yet'l 'a yol sti coxtl junjn ewinac, caw xiw chan̈ ewinac, xiw chan̈ pax win smam ewin cha. 36Yuj cha, xyaln win smam ewin chi 'ixtic:

—Caw tu tzin eyutj tzwab'i. Man̈x 'a junc wunnal tzcan eyu'uj, win José man̈x 'ayc 'ec' winac; an̈jtona 'ixta pax win Simeón, tze nib'n pax tzeyij 'at ni Benjamín tic. A mach tzyab' syail, an toni, xchi Jacob.

37Yuj cha, xyaln Rubén 'a smam 'ixtic:

—Man̈ ach xiw mamin, chaj 'at ni cu'tac tic quet' on̈. An tzwac' in b'a yuj na. Toto man̈xtzac japx ni wu'uj, tzta' cab' tza mil cham chawn̈ wunnal tic yuj na, xchi.

38Palta 'ix yaln win Jacob 'ixtic:

—Ma'oj 'at ni wunnal tic eyet'oc. 'Ilt win José chamnc winac, toq'ue 'ay pax tz'i'n junx ni tic 'a yol b'e, ax wal tz'och e mul, yic tzin cham an 'ichm in tic yuj cusc'ojlal, xchi winac.

Currently Selected:

Gn 42: CSS

Highlight

Copy