Esd 1

A sley win rey Ciro

(2 Cr 36.22-23)

1A 'a yic b'ab'l ab'il yoch Ciro reyl 'a Persia, ata x'el'ch tas ya'jnac Jehová yal-l Jeremías. A Jehová a 'ix aln 'a snab'en Ciro sreyl Persia, yic xya'n tz'ib'xoc jun ley, xya'n alxoc 'el 'ixtc 'a smasnil yol snacion̈: 2An Ciro in tic, sreyl in Persia, an tzwal 'ixtic: A Jehová Dios 'ay yic satcha'an̈, a x'a'n 'och smasnil nacion̈ 'ay 'a sat lum tic 'a yol in c'ab'. A 'ix aln 'ayin, to tzin b'o chan̈ junc yatut 'a Jerusalén 'a yol yic Judá. 3Yuj cha, tzann̈j ex to schon̈b' Jehová eyaji, colwjan̈ec, 'ixquec 'at b'oc chan̈ yatut Jehová e Diosal 'a Jerusalén 'a yol yic Judá. 4E masnil ex to 'ayxto can 'a jun lugar tic, ex to tzex paxi, colwj cab' eb' 'anma cajn 'a e tz'ey ya'n 'at q'uen plata, q'uen oro, no cajb'en noc' yet' tzann̈j tas 'ay 'a eb'. Ya't cab' pax eb' yofrenda to tz'el 'a sc'ojl ya'n 'at yuj yatut Dios 'ay 'a Jerusalén, xchi jun ley cha.

Meltzjnac jaywn̈ israel 'a Jerusalén

5Xlajw cha, 'ix ya'n lista sb'a eb' yajl yaj 'a scal eb' yin̈tl Judá muc'uc, yet' 'a scal eb' yin̈tl Benjamín, smasnil eb' ya'mal 'och sti eb' 'anma 'a Dios yet' jun tzo'n̈ xo eb' levita, atn smasnil eb' 'aj 'ix yal Dios 'a snab'en, to tz'at eb' 'a Jerusalén yic tz'at sb'onc pax chan̈ eb' yatut Jehová. 6Smasnil eb' cajn 'a stz'ey eb', 'ix colwj eb' ya'n q'uen plata, q'uen oro, no c'ajb'en noc' yet' tas 'ay 'a eb', yet' jun tzo'n̈ tas to chan̈ stojol, yet' smasnil tas to tz'el 'a sc'ojl eb' ya'ni. 7'Ay jun tzo'n̈ yamc'ab' yic yatut Jehová yijnac cot win Nabucodonosor 'a Jerusalén, ax 'a yol yatut sdiosal ya'jnac can 'ochi. A jun tzo'n̈ cha, 'ix ya'x meltzjoc win rey Ciro. 8'Ix yaln win 'a win Mitrídates molm tumn yaji, to tzyij 'elt jun tzo'n̈ yamc'ab' cha, tzb'isni, tzlajw cha, tzya'n 'a Sesbasar win gobernador 'a Judá. 9Atn sb'isl jun tzo'n̈ tic: 30 niwc vaso nab'a oro, jun mil niwc vaso nab'a plata, 29 cuchlub', 10ax 30 cotc vaso nab'a oro, 410 jun tzo'n̈ xo comn vaso b'ob'il yet' plata, yet' jun tzo'n̈ xo yamc'ab', tecn am 'ay junc mil. 11A sb'isl jun tzo'n̈ yamc'ab' oro yet' plata 'ay 5,400 'a smasnil. Smasnil jun tzo'n̈ tic, 'ix yij pax meltzjoc Sesbasar yic 'ix 'elt 'a Babilonia yet' eb' ajun yet'oc, 'ix c'ochx eb' 'a Jerusalén.

Currently Selected:

Esd 1: CSS

Highlight

Copy