Ez 8
8
Xch'oxx yil win Ezequiel*r* tas tzb'o eb' 'aj Jerusalén
1A 'a o'e yoch swacl 'uj yic swacl ab'il, wocn in 'ejm 'a sti watut, oyn 'och eb' yichm wincal chon̈b' Judá 'a wojltac. A yic cha, 'ix japx spoder Jehová Cajlil 'ayin, 2ax xwilni, 'ay jun 'icha yilx 'anma lin̈n 'ec' 'a in tz'ey. A 'a yaln̈ 'emt snan̈al, lajn wal yilx 'icha c'ac', ax 'a yib'n̈ q'ue snan̈l cha, caw wal tzictzni yilx 'icha q'uen bronce. 3A jun 'icha 'anma cha, 'ix ya' cot sc'ab' 'a in jolom, 'ix stzucn chan̈ xil in jolm cha. Ax Yespíritu Dios in t'un̈n cha'an̈, in yi'n 'at 'a Jerusalén yic tzch'oxn wil tas 'ay ta'. A 'a yojl 'och sti spuertail yatut Dios, jun 'ay 'a sti 'amc' 'a stojlal norte, ata 'ay yet'l jun comn dios tzuntzn cot yowl sc'ojl Jehová. 4A 'a jun lugar cha, ata 'ayc' stzictznil qui Diosalec an̈ israel on̈c tic, 'icha wal xwutj wiln 'a lum pan̈n 'a'lic 'a yic b'ab'el. 5Xlajw cha, xyaln 'ayn 'ixtic: Ach 'anma', 'ixc q'ueln 'a stojlal norte, xchi 'ayin.
Ax yic in 'at q'ueln 'a stojlal norte cha, 'ix wilni, to a 'a stz'ey spuertail yatut Dios cha, 'a 'aj 'ay jun yet'l xajmb'al, ata 'ay jun yechl comn dios tzuntzn cot yowl sc'ojl Jehová.
6'Ix yaln 'ixtc 'ayin: Ach 'anma', ¿tzam el wal tas yajb'entac tzb'o eb' et israelal tic? Atn wal yuj jun tzo'n̈ tic, tzwi'n 'el in b'a 'a in cajnub', palta 'ayt wal tas yel xo wal yajb'entac 'oj in ch'ox ela', xchi 'ayin.
7Xlajw cha, in yi'n 'at 'a yol sti yamq'uil yatut, ax xwilni 'ay jab' oln 'a spac'b'il yich cha. 8'Ix yaln 'ayn 'ixtic: Ach 'anma', lewltej jun oln cha, sec 'oj och ta', xchi 'ayin.
Xin lewltan jun oln cha, axta x'ilchj jun puerta wu'uj. 9Xlajw cha, xyaln pax 'ixtc 'ayin: 'Ochan̈, tzel nab'an tas wal syajb'entacl tzyutj sb'a eb' 'anma cha, xchi. 10Ax in 'ochchi, 'ix wilni to a 'a yojl cha, ata tz'ib'b'il 'och yechl smasnil no noc' tzjuc sb'a, yet' no yajb'entac yilxi, yet' pax smasnil jun tzo'n̈ yechl 'aj tzyal sb'a eb' wit israelal cha. 11A 'a yojltac jun tzo'n̈ yechl cha, ata oyn 'och 70 eb' yichm wincal chon̈b' Israel yal sb'a. A 'a scal eb' cha, ata 'ayc' Jaazanías win yunnal Safán. C'uxn yet' eb' stz'ab'c'ac' smasnil, caw wal tzq'uic'b' 'ejm stab'l incienso yuj eb'.
12Yuj cha, xyaln 'ixtc 'ayin: Ach 'anma', ¿tzam el wal tas tzc'ultac b'oj eb' et israelal tic? Junjn eb' 'ichmtac winc cha, wocn 'och eb' yal sb'a 'a 'aj b'achn 'elt sdiosal cha. Am wal snan eb' to matz wil eb', 'actb'ilx can jun nacion̈ tic wuj snan eb', xchi 'ayin. 13'Ix yaln pax 'ayn 'ixtic: 'Ayt wal jun tzo'n̈ xo tas yel xo wal yajb'entac 'oj in ch'ox ela', xchi 'ayin.
14In yi'n 'at pax 'a jun puerta yic 'amc' tzcan 'a stojlal norte, ax in c'och ta', 'ix wilni, 'ay jun tzo'n̈ eb' 'ix 'ix wocn 'ejmi, wan yoc' eb' yuj schamlil jun yechl comn dios tzcuch Tamuz.#Ez 8.14 Tamuz, atn junx sb'i jun comn dios Baal. 15Xlajw cha, xyaln 'ixtc 'ayin: Ach 'anma', ¿tzam el wal jun tzo'n̈ tic? 'Ayt pax jun tzo'n̈ xo tas yel xo wal yajb'entac 'oj in ch'ox el 'a yib'n̈ jun tzo'n̈ tic, xchi.
16In yi'n 'at 'a yol sti yamq'uil yatut Dios, ax 'a yol 'och sti puerta cha, 'a sla'nil 'aj 'ay yet'l xajmb'al, ata 'ay 25 eb' winac. A yichspatquil eb' 'aycn cot 'a stojlal yatut Dios, axta q'ueln 'at eb' 'a stojlal 'aj tzq'uel c'u, cumn 'ejm eb' yal sb'a 'a c'u. 17'Ix yaln pax 'ixtc 'ayin: Ach 'anma', 'ix el am wal tas tzb'o eb' 'anma tic. Man̈ cojnoc 'a chon̈b' Judá 'aj tzb'o eb' tas yajb'entac tic, palta to xb'ut'j 'el lum lum tic yuj smaysch'olnilal eb', 'icha to xc'och sjab' smul eb' chi 'a in n̈i', yuj cha, tzuntzn cot wal eb' yowl in c'ojol. 18'Oj wa' cot wal yowl in c'ojl 'a yib'n̈ eb', man̈x 'a in niwnc'ojlal 'a eb'. Wach'xam 'oj cob' 'el yaw eb' yaln sb'a 'ayin, palta ma'oj wab' tas tzyal eb' cha, xchi Dios 'ayin.
Currently Selected:
Ez 8: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
