Ez 47
47
Jun a tzpac' q'uet 'a yol yatut Dios
1Xlajw cha, in yi'n pax 'och jun winc chi 'a yol sti yatut Dios. Ax xwilni, a 'a yaln̈ smarcoal sti puerta q'ueln 'at 'a 'aj tzq'uel c'u, ata tzpac' q'uet jun a', ax 'a stojlal 'aj tzq'uel c'u cha, ata tz'atcn a', tz'ec' a 'a snan̈l yamq'uil yatut Dios, tz'ec' a 'a stojlal sur yic yet'l xajmb'al. 2Xlajw cha, in yi'n pax 'el 'a yol sti jun puerta tzcan 'a stojlal norte, xya'n wac' wuelta 'a spatc 'el yatut Dios, masnto 'a jun puerta 'ay 'a stojlal 'aj tzq'uel c'u. Ax xwilni a 'a stz'ey jun puerta cha, 'a stojlal sur, ata tzq'uel jab' a cha. 3'Ix 'el jun winc chi yet' jun ch'an̈ yic 'echtab'. 'Ix yechtan 'el jun o'e ciente metro, axta in yij 'ec' jun winc chi 'a yojl a'; 'ix q'ue'ch a a chi 'a sjaj woc. 4Xlajw cha, xyechtan pax junx o'e ciente metro, axta in yij pax 'eq'ui; ax jun a cha, 'ix q'ue'ch 'a sjolm in penec. 'Ix yechtan pax junx o'e ciente metro, axta in yij pax 'eq'ui. A jun a cha, 'ix q'ue'ch to 'a in nan̈al. 5'Ix yechtan win junx o'e ciente metro, ata b'i'an, man̈xtzac stac' quec' 'a yojl a'; caw wal xab' yich jun niwn a cha. Cojn toto tzon̈ noxwi, tztac' queq'ui, toto ma'ay matz tac'a. 6Yuj cha, xyaln 'ayn 'ixtic: Tzcham wal eln jun tic, xchi 'ayin.
Xlajw cha, in yi'n meltzjoc 'a stitc jun a cha, 7ax xwilni, til wal jun tzo'n̈ te te 'ib'ctac yaj 'a sti jun a cha, 'ayn̈j eb' te 'a schapaq'uil sti a'. 8'Ix yaln 'ayn 'ixtic: A jun a tic tz'atcn 'a stojlal 'aj tzq'uel c'u, 'oj c'och a 'a sch'olnal a Jordán, ax stupch a 'a sti a Mar Muerto, ax a mar cha, 'oj b'o a yuj a'. 9Tzann̈j 'aj 'oj c'och yoctc a a tic, 'oj b'ocn eb' a a c'a yu'xi; ax spitzw e no chay 'a yojl eb' a a cha, til wal jun tzo'n̈ xo no noc' 'oj pitzwc 'a yojl eb' a'. 10Til wal eb' yamn chay 'oj jawc 'a sti a mar 'a En-gadi masnto 'oj c'och eb' 'a En-eglaim, ax laj ya'nc eb' tacjoc schim 'a sti a cha. Til wal 'oj 'aj no chay 'a yojl a', 'icha e no 'ay 'a yojl a Mar Mediterráneo. 11Palta ax 'aj 'ay eb' a chic' a', yet' 'a eb' lum yaxlu'um, ma'oj b'o eb' a', 'oj cann̈j eb' a 'ixta', sec ata 'oj q'uetoc 'atz'am. 12A 'a sti a a chi 'a schapaq'uil, ata 'oj q'uib' chan̈ smasnil te 'awb'ente tzlox sat, ax te xil chi 'oj 'och remelal. 'A junjn 'uj ax ya'n te sat, ma'oj pucl pax xil te', yujto a 'a scal yib' te', ata tz'ec' a tz'elt 'a yol yatut Dios. 'Oj loxoc sat eb' te', ax yoch te xil chi remelal, xchi 'ayin.
A smon̈jonal jun nacion̈ cha
13-14'Ix yaln Jehová 'ayn 'ixtic: Atn 'a tic 'oj c'och smon̈jonal smacl lum eb' yin̈tl Israel 'oj smacloc, atn lum wa'jnac in ti wa'n 'a eb' e mam eyichm pecti'. Lajnn̈ej tzeyutj e pojn 'ec' lum 'a junjn 'in̈tal. (A eb' yin̈tl José, chac'aj lum yic eb' chi 'oj 'ajxoc.) A jun nacion̈ tic, e macl lum yaji.
15A smon̈jonal 'a stojlal norte, atn tic: Tzcot lum 'a sti a Mar Mediterráneo, tz'ec' lum 'a chon̈b' Hetlón, 'a chon̈b' Zedad, 16'a chon̈b' Berota yet' 'a chon̈b' Sibraim. A jun tzo'n̈ chon̈b' tic, ata 'ay eb' 'a snan̈l Damasco yet' chon̈b' Hamat. Tz'ec' pax lum 'a chon̈b' Hazar-haticón, jun smon̈jon sb'a yet' chon̈b' Haurán. 17Atn jun mon̈jon tic 'ay 'a stojlal norte, jun tzcot 'a sti 'a Mar Mediterráneo masnto 'a chon̈b' Hazar-enán, ax 'a stojlal norte chi tzcan smon̈jonal chon̈b' Damasco yet' Hamat.
18A smon̈jonal lum 'a stojlal 'aj tzq'uel c'u, tz'atn̈j 'a chon̈b' Haurán yet' 'a chon̈b' Damasco masnto 'a chon̈b' Tamar jun 'ay 'a sti a Mar Muerto. Tz'ejmn̈ej jun mon̈jon chi 'a sti 'a Jordán, atn jun a chi 'aych smon̈jonalc lum chon̈b' Galaad yet' lum Israel.
19Ax 'a stojlal sur, tz'atx smon̈jonal chi 'a chon̈b' Tamar, tz'ec' 'a 'aj 'ay a spac'b'a Meriba-cades, tz'e'x 'a 'aj 'ay jun ch'oln yic Egipto masnto 'a a Mar Mediterráneo.
20An̈jtona pax smon̈jonal 'a stojlal 'aj tz'em c'u, tz'atn̈j 'a sti a Mar Mediterráneo, a 'ay 'a smon̈jonal Egipto masnto 'a stojlal 'aj tz'el yich smon̈jonal lum chon̈b' Hamat.
21An Jehová in, an tzwala: A jun lum tic tze po'jc 'a e cal ax yin̈tl Israel ex tic. 22Tzeya'ch suerte 'a yib'n̈ lu'um, sec tzcheclji 'aj tzcan e macl junjn 'in̈tal ex, tzeya'n pax yic eb' chuc chon̈b'al cajn 'a e cal, mto yunnal eb' 'aljnac 'a yol e chon̈ab'. A yic tze pojn e lum cha, tzeyac' yic eb' chuc chon̈b'al chi eyet'oc, sec 'ay slum eb' chi 'a scal eb' yin̈tl Israel. 23A tzyal 'aja 'in̈tal ax israel ex tic 'aj cajn eb' chuc chon̈b'al cha, ata tzchaj eb' slum cha.
Currently Selected:
Ez 47: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
