Ez 39
39
Xlajw 'el win Gog
1Ach 'anma', al 'a win Gog to an Jehová in, an tzwal 'ixtic: Ach Gog, yajl cob' aj 'a Mesec yet' 'a Tubal, tzwal ab'i', to 'ajc'ojl xo wajch 'ayach. 2'Oj ach wi' cot 'a stojlal norte, c'ojnc'ojnil 'oj aj a coti, ax a jaw wuj 'a eb' lum jolmctac witz 'a yol yic Israel. 3Ax in ma'n wecchjoc jun a jul-lab' et' 'a a surito, 'oj in ma'cn 'el tzicnjoc jun tzo'n̈ a cotc jul-lab' et' 'a yol a c'ab' 'a a wach'. 4'Oj lajwc cha, ax ach wa'n 'a yol sc'ab' chaml yet' eb' a soldado yet' pax smasnil eb' yic jun tzo'n̈ xo nacion̈ ajun et'oc. 'Oj a chamcn yet' eb' 'a lum jolmctac witz cha, ax no 'usej yet' smasnil e no calte'al noc' 'oj a chin yet' eb'. 5Sactzicnac 'oj 'ajcn e niwnal 'a eb' lum 'a'lic cha. An Jehová in, an tzwal jun tic to 'ixta 'oj eyaji. 6'Oj wa' cot c'ac' 'a yib'n̈ a nacion̈, atn Magog yet' 'a yib'n̈ eb' chon̈b' tzaljc'ojlal yajc 'a sti a mar. 'Ixta 'oj 'aj yojcan 'el eb' chon̈b' cha, to an Jehová in, to cojn in ton Dios in. 7'Ixta 'oj wutc in ch'oxn in poder 'a eb' in chon̈ab', sec man̈x b'a'n̈ 'oj b'uchxoc eb'. Ax jun tzo'n̈ xo nacion̈, 'oj yojcoc 'el eb', to an Jehová in, to cojn in ton Dios in, sDiosal in Israel. 8A tas waljnac 'a pecti', wan xo sjawi, an Jehová in, an tzwala to yowlal 'oj 'el'choc, xchi Dios, xa chi.
9Ax smasnil eb' israel cha, 'oj 'eltoc eb' sic' syam sb'a smasnil yamc'ab' yic owl chi 'oj can cha, atn q'uen jul-lab', smacl sat jul-lab', cotc espada, lanza yet' jun tzo'n̈ xo yamc'ab', ax jun tzo'n̈ chi 'oj sc'atztzoc eb' 'a uque ab'il. 10An Jehová in, an tzwala. Man̈x yowlalc 'oj 'at eb' israel chi say sc'atztz 'a najat, man̈x 'oj 'at yic' eb' sc'atztz 'a calte', yujto a jun tzo'n̈ yamc'ab' yic owl chi 'oj sc'atztzoc eb'. 'Ixta wal 'oj yutc eb' yi'n can pax 'ec' tas 'oj wul yi'cc eb' 'ajc'ojl chi 'a eb'.
A 'aj 'oj mucxoc win Gog
11A 'a jun tiempoal cha, 'oj wac' jun yet'l win Gog 'aj 'oj mucxoc yet' eb' soldado 'a yol yic Israel, atn lum pan̈n 'a'lic 'ay 'a 'aj tzb'ey eb' 'anma tzcot 'a stojlal a Mar Muerto. Man̈x 'oj stac' sb'ey 'anma 'a jun b'e cha yuj eb' mucb'il chi ta'. 'Oj sb'o eb' 'anma chi sb'i jun lugar cha, Lum Pan̈n 'A'lic 'aj mucb'il Gog yet' eb' soldado, 'oj schic eb'. 12Ax eb' israel cha, uque 'uj 'oj yac' eb' smucn eb' chamnc cha, 'ixta to b'i'an, ax sb'ox can slum eb' cha. 13Smasnil israel 'oj colwjoc eb' smucn eb' chamnc 'anma cha. An Jehová in an tzwala. To caw wal 'oj naxoc cot jun c'u chi yuj in chon̈ab', yujto ata 'oj in ch'ox 'ilxoc in poder 'a scal eb'. 14'Oj lajwc uque 'uj cha, ax si'x jaywn̈ocx eb' winc 'oj tojxoc. 'Oj laj 'ec' saync eb' yila', 'aj 'ayt sniwnal eb' 'anma chi mantzac laj mucxi. Ax eb' 'oj mucnc can jun tzo'n̈ sb'acl eb' mantzac mucx cha, sec 'ixta 'oj 'aj sb'ox can slum eb' cha. 15A yic 'oj 'ec' eb' saywjum cha, toto 'ay junc sb'acl 'anma tz'ilchj yuj eb', ton̈j 'oj ya'cn 'ejm eb' junc yechl 'a stz'ey jun b'ac cha, ax eb' mucwjum chi tz'ec' si'noc, ax smucn eb' 'a Lum Pan̈n 'A'lic 'aj mucn Gog yet' eb' soldado. 16'Ixta wal 'oj 'aj sb'ox can lum lum cha, xchi Dios 'ayin. (An̈jtona', 'a 'a sla'nil lum pan̈ cha 'ay pax jun chon̈ab', 'oj 'ajxoc can sb'ioc. Lum Yic Eb' Soldado).
17'Ix yaln pax Jehová 'ixtic: Ach 'anma', al 'a e no 'usej yet' 'a e no calte'al noc' to chib'j tzchi'a, smolb'tzoc cot cab' sb'a e no 'a lum jolmctac witz yic chon̈b' Israel, to 'oj wac' schi e no jun tzo'n̈ xajmb'al 'oj in b'o ta', 'oj wac' schi e no chib'ej, ax yu'n e no chic'. 18'Oj schi e no schib'jal eb' soldado, ax yu'n e no schic'l eb' syajlil jun tzo'n̈ chuc chon̈b'al cha, 'icha tzyutj eb' 'anma schin no xajmb'al caw b'aq'uech, no mam calnelu, no quelm calnelu, no chiwo yet' e no quelm wacx yic Basán. 19A jun tzo'n̈ xajmb'al 'oj in b'o cha, 'oj wac' schi e no xepual eb'. Caw 'oj b'ut'joc e no si'mb'il, ax wa'n yuc' e no schic'l eb', 'oj q'ue 'a sjolm e no', 'icha xo 'u'm 'an̈ 'oj 'aj e no yu'uj. 20'Oj lajwc cha, ax wa'n b'o jun niwn wa'el. 'Oj wac' b'o schib'jal e no schej, yet' schib'jal eb' soldado 'ay q'ue 'a yib'n̈ no', yet' pax yic eb' syajlil jun tzo'n̈ xo chon̈ab', sec 'oj wa e no si'mb'il, caw 'oj b'ut'joc e no'. An Jehová in, an tzwala.
Tzyam sb'a eb' israel jun 'ejm xo
21'Ixta wal 'oj wutc in ch'oxn in jelnal 'a sat jun tzo'n̈ xo nacion̈. 'Oj yil wal jun tzo'n̈ chuc nacion̈al cha, tas 'oj wutc in b'eyc'ojlwi. 22A 'a jun tiempoal cha, yet' 'a yojltac, ata 'oj yojcoc 'el eb' israel, to an Jehová in, sDiosal in eb'. 23Ax jun tzo'n̈ chuc nacion̈al cha, 'oj yojcoc 'el eb' to yuj stenmtacl eb' israel, 'ix 'ijx 'at eb' 'icha presoal 'a junc xo lugar. Yujto man̈ yiclumoc xyutj sb'a eb' 'ayin, yuj cha, xwi'n 'el in sat 'a eb', xwa'n 'ajxc ganar eb' yuj eb' 'ajc'ojl cha, til wal eb' xcham yuj owal. 24'Icha wal xyutj eb' ya'n 'och smul 'ayn yuj stenmtacl cha, 'ixta xwutj in b'a 'a eb', 'ix wij 'el in sat 'a eb'.
25Palta ax ticnec, an Jehová Yajl in, an tzwal 'ixtic: Caw wal tz'o'x 'och in c'ojl 'a eb' israel, atn eb' yin̈tl can Jacob. 'Oj wa'x in wach'c'ojlal 'a eb' jun 'ejm xo, yic tz'ijx chan̈ in b'i. 26-27An 'oj in molb'tzoc cot eb' 'a jun tzo'n̈ nacion̈ 'ajc'ojl yajch 'a eb' cha. Ax scanx cajn eb' 'a sat slum 'a tzaljc'ojlal, man̈x 'a mach 'oj xib'tnoc eb'. 'Ixta wal 'oj wutc in ch'oxni to cojn in ton Dios in. Til wal jun tzo'n̈ xo nacion̈ 'oj 'ilnoc jun cha. 'Ixta to b'i'an, ax yecn q'uixwc sb'a eb' israel yuj stenmtacl x'och 'ayin. 28An xwa't eb' 'icha presoal 'a jun tzo'n̈ nacion̈ cha, an pax 'oj wi'x cot eb' jun 'ejm xo 'a sat slu'um. May wal junc eb' 'oj wactcan 'a jun tzo'n̈ nacion̈ cha, sec 'oj yojcoc 'el eb' to an Jehová in, sDiosal in eb'. 29Man̈x 'oj wi'l in sat 'a eb', yujto 'oj wa'x in poder 'a yib'n̈ eb' israel jun 'ejm xo. An Jehová in, an tzwala, xchi Dios.
Currently Selected:
Ez 39: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
