Ez 32
32
Lajn sreyl Egipto 'icha junc noc'
1A 'a b'ab'l c'u yoch slajchwil 'uj yic slajchwil ab'il xo qui jaw 'icha presoal, ata xyal Jehová 'ayn 'ixtic: 2Ach 'anma', a ticnec b'itnej jun b'it yic chaml tic 'ixtc 'a yib'n̈ win sreyl Egipto:
Ach faraón, lajn ach 'icha junc no quelm león 'ay 'a scal jun tzo'n̈ xo nacion̈; lajn ach pax 'icha junc no niwquil noc' 'ay 'a yojl a mar; tzach b'alb'n 'ec' 'a yojl eb' a b'eymal a', ax oc tzma'n tatb'oc a'.
3An Jehová in, an tzwal 'ixtic: 'Oj wac' syam sb'a jun tzo'n̈ 'anma 'a sti a cha, ax in juln 'at in chim 'a eb'an̈, 'oj a can 'a yojl in chim cha, ax eb' 'anma chi 'oj a to'n q'uet 'a sti a'. 4An xo 'oj ach in jucb't 'a sat lu'um, ax a can t'ocn 'a sat lum cha. 'Oj ach wa'ch ste'nub'oc e no 'usej, ax e no calte'al noc' 'oj chinc 'a chib'jal. 5'Oj wac' b'ut'joc 'el eb' lum jolmctac witz yet' a chib'jal wan sc'a cha, ax laj sb'ut'j 'el lum pan̈n yuj a niwnal. 6'Oj b'ey a chic'l 'a sat lum lum tic, ax syamn sb'a 'a yich eb' lum niwc witz, 'oj b'ut'joc 'el sb'e eb' a a 'a ch'olctac yuj a chic'l cha. 7A yic 'oj ach in satnc 'el cha, 'oj 'och q'uic'q'uinl 'a satcha'an̈, ax stup yoc c'anal; 'oj 'och 'asn 'a sat c'u, ax stup pax yoc 'uj. 8An Jehová in, an tzwala. A mulojoc, ax in tupn sc'a'l jun tzo'n̈ tas tzyac' sacq'uinlal 'a satcha'an̈, ax yoch q'uic'q'uinl 'a yol a chon̈ab'. 9A yic 'oj c'och ab'xil 'a jun tzo'n̈ xo nacion̈ man̈ ojcoc, 'oj wac' cus chan̈ eb' yuj tas tzach 'aj 'a satli. 10A mulojoc, ax wa'n 'ejm xiwc'ojlal 'a scal jun tzo'n̈ xo chon̈ab'; caw 'oj satcn sc'ojl sreyl jun tzo'n̈ chon̈b' cha, yic 'oj 'ec' jupljoc wespada 'a yojltac eb'. A yic 'oj a satl cha, caw 'oj xiw eb', yujto 'ay smay scham pax eb'.
11An Jehová in, an tzwal 'ixtic: 'Oj jawc win sreyl Babilonia yet' eb' soldado yic tzach satn 'eli. 12Ax eb' 'anma cha, 'oj wac' eb' 'a yol sc'ab' eb' 'a'm owl caw may sniwnc'ojlal, a eb' 'oj satnc 'el eb'; ax satn pax 'el eb' sb'inab'ilal Egipto, caw niwn 'anma 'oj chamoc. 13'Oj in satl smasnil no cajb'en noc' tz'u'n eb' a a cha, man̈x 'a b'a'n̈ 'oj te'x tatb'oc eb' a yuj eb' 'anma', mto yuj no noc' cha. 14'Ixta to b'i'an, ax syaxb' pax eb' a a cha, caw wach' 'oj b'ey lab'b'oc eb' a 'icha aceite. 15A yic 'oj wactn can Egipto 'a sictaquil, 'oj cham eb' 'anma', yet' no noc', caw cusltac 'oj 'ajcn jun nacion̈ cha. Atta 'oj in yojcoc 'el eb' to an Jehová in, to cojn in ton Dios in.
16A jun tic b'it yic chamel, 'oj sb'itnoc eb' 'ix 'ix 'a jun tzo'n̈ xo nacion̈, yic 'oj 'oc' eb' 'ix yuj Egipto, yuj pax eb' 'anma 'oj chamoc. An tzwal jun tzo'n̈ tic, xchi Dios.
'Aych Egipto 'a yol sc'ab' chamel
17A yic olajn̈e xo c'u yoch slajchwil 'uj yic slajchwil ab'il quijx cot 'icha presoal, 'ix yaln Jehová 'ayn 'ixtic: 18Ach 'anma', b'itnej jun b'it yic chaml tic, yujto til wal eb' soldado 'aj Egipto 'oj chamoc, yet' eb' soldado yic jun tzo'n̈ nacion̈ 'oj c'och eb' 'a scal eb' yit chamnquil cha:
A eb' caw jelan, 'oj telwc 'ejm eb', ax sc'och eb' 'a campusan yet' eb' 'ayx 'ec' chi ta'.
19Ach yajal, caw wach' cob' elxi, palta 'oj a c'och teln 'a scal eb' man̈ schon̈b'oc Dios, xa chi.
20'Oj cham eb' 'anma chi 'icha 'ajnc eb' chamnc yuj owal. Tecn xo 'och q'uen espada chi 'a eb' 'anma chi smasnil. 21Ax yic 'oj c'och eb' yet' eb' rey chamnc xo, ax yaln eb' rey 'ayc' chi ta 'ixtic: ¡'A, sjaw ewin xcham yuj owal! Ewin ma'ix 'a'n 'och sc'ojl 'a Dios, 'oj can teln sniwnal eb' 'a tic quet'ec, 'oj xchic eb'.
22Ata 'ayc' win sreyl Asiria yet' smasnil eb' soldado, oyn 'och eb' 'a stz'ey winac, atn eb' chamnc yuj owal. 23Mucb'il can 'ejm eb' 'a xab'l yich sjul-l eb' chamnac, oyn can 'och eb' soldado 'a stz'ey win sreyl Asiria cha. Atn eb' 'a'jnac 'ejm xiwc'ojlal 'a scal eb' 'anma 'a yolyib'n̈q'uinl tic, palta chamnc eb' yuj owl cha.
24Ata mucb'il win sreyl chon̈b' Elam, oyn 'och smasnil eb' soldado 'a stz'ey, atn eb' chamnc yuj owal. Teln 'ec' sniwnal win 'a scal eb' 'anma chamnc yuj owl cha, atn eb' man̈ wico'oc, eb' 'a'jnac 'ejm xiwc'ojlal 'a scal eb' 'anma 'a yolyib'n̈q'uinl tic, palta man̈x 'a yel'ch x'aj sc'och eb' 'a scal eb' chamnc cha. 25Teln can 'ec' sniwnal win rey chi 'a scal eb' soldado cha, oyn can 'och sniwnal eb' 'a stz'ey eb' chamnc yuj owl cha. Atn eb' 'a'jnac 'ejm xiwc'ojlal 'a scal eb' 'anma 'a yolyib'n̈q'uinl tic, palta ax ticnec, man̈x 'a yel'ch yaj eb' 'a scal eb' chamnc yuj owl cha, yujto man̈ wico'oc eb'.
26Ata teln 'ec' sniwnal pax win sreyl Mesec yet' win sreyl Tubal, ax eb' soldado eb' chamnc 'a owal, oyn 'och eb' 'a stz'ey eb', yujto ya'jnac 'ejm eb' xiwc'ojlal 'a scal 'anma 'a yolyib'n̈q'uinl tic, a eb' cha, man̈ wico'oc eb'. 27A eb' cha, junn̈j yajcn eb' yet' eb' caw jeln chamnc yuj owl 'a pecti', eb' mucb'il yet' syamc'ab' yic owl cha. A 'a yaln̈ sjolm eb' ata cann̈c can yespada eb', scancn smul eb' chi 'a yib'an̈, yujto caw xib'txnac eb' 'anma 'a yolyib'n̈q'uinl tic yuj eb'.
28Palta ach xo ach sreyl Egipto, a 'a scal eb' man̈ wico'oc, ata 'oj a c'och telan, atn eb' chamnc yuj owal.
29Ata 'ayc' win sreyl Edom yet' eb' niwc yajal. Caw jeln cob' yutjnac sb'a eb', palta ax ticnec, ata teln 'ec' eb' 'a scal eb' chamnc yuj owl cha. Atn eb' man̈ wico'oc mucb'il 'a 'aj 'ay yet'l eb' chamnac.
30A pax ta 'ayc' eb' xlaj yac' yajlil 'a stojlal norte yet' pax eb' yic Sidón. Caw jeln xlaj cob' yutc sb'a eb', xlaj xib'tn eb' 'anma', palta ax ticnec, junn̈j yaj eb' yet' eb' chamnc yuj owl cha, yujto man̈ wico'oc eb'. Caw wal tzyac' eb' sq'uixwloc 'a scal eb' chamnc cha, man̈x 'a yel'ch yaj eb' 'a scal eb'.
31An Jehová in an tzwala: a yic 'oj yilnc sb'a win faraón 'a eb' chamnc 'ayc' chi ta', 'oj yic' sniwnal sc'ojol, yujto c'uxn 'oj cham eb' soldado chi yet' 'a owl cha. 32An xwac' yac' 'ejm win faraón chi xiwc'ojlal 'a scal 'anma 'a yolyib'n̈q'uinl tic; palta ax ticnec, teln xo 'ec' win 'a scal eb' chamnc yet' smasnil eb' soldado. Atn eb' xcham yuj owal, eb' man̈ wico'oc, xchi Dios.
Currently Selected:
Ez 32: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
