Ex 31

Eb' tzb'on scajnub' Dios

(Ex 35.30; 36.1)

1'Ix yaln pax Jehová 'a Moisés 'ixtic:

2'Ilto, a 'a scal eb' yin̈tl Judá, ata xin sic' 'elt win Bezaleel, win yunnal Uri yixchicn can Hur. 3'Ix wa'ch Wespíritu 'a 'a, xwa'n sjelnal, sec tzyojquej 'el sb'on tzann̈j munljelal. 4'Oj nachjoc 'el yu'uj, tas tz'aj yechl junc munljel tzb'o 'a oro, 'a plata mto bronce. 5Wach' 'oj yutc sb'on q'uen q'uen wach' yilxi, wach' 'oj yutc sb'on 'och 'a yet'ul, wach' pax 'oj yutc sb'on eb' te te 'a tzann̈j tz'aj sb'o'i. 6Ax 'a scal eb' yin̈tl can Dan, ata xin sic' 'elt pax win Aholiab yunnal Ahisamac, a 'oj colwjoc yet'oc. Smasnil eb' 'ay xon sjelnal, 'ix in wach' 'a'j sjelnal eb', sec a eb' 'oj b'onc jun tzo'n̈ xwal 'aych tic: 7-10Mantiado 'aj tzin chaj in b'a eyet'oc yet' smasnil syamc'ab'il, te scaxail in trato yet' smacl yib'an̈, te mexa yet' syamc'ab'il, jun yet'l cantil nab'a oro yet' syamc'ab'il, yet'l xajmb'al yic incienso; yet'l xajmb'al 'aj tz'a smasnil no xajmb'al yet' smasnil syamc'ab'il, q'uen palagan yet' sb'achnub'al yalan̈, te pichl caw wach' tz'aj sjalxi, atn te 'oj ya'ch Aarón yet' eb' yunnal, yic 'aych eb' 'a yopiso ya'n 'och sti eb' 'anma 'ayin. 11Ax sb'on eb' jun perjuma to wicn̈ej tz'ajcni, tzb'on pax eb' jun incienso caw su'q'ui sjab' tz'och 'a yojl in cajnub'. Wach' tzyutj eb' sb'on 'icha wal tzwutj waln tic, xchi Dios.

Sc'ul 'iljelal

(Ex 35.1-3)

12'Ix yaln pax Jehová 'a Moisés 'ixtic:

13Al 'a smasnil eb' et israelal to yowlal tzyiclj eb' sc'ul 'iljelal, yujto a jun c'u cha, wic yaji. A jun cha, a 'aycn 'och sch'oxnb'ilc in trato eyet' 'a smasnil tiempo, sec wach' tzeyojquej 'eli, to an Jehová in tic, an ex in si'cn 'och wico'oc. 14A jun c'u cha, niwn cab' yel'ch 'a e sat. A mach matz yiclni jun sc'ul 'iljelal cha, tojln̈ej schami. An̈jtona', toto 'ay mach tzmunlj 'a jun c'u cha, 'ajx cab' 'och 'a yol sc'ab' chamel. 15A 'a waque c'u tztac' tzex munlji, palta ax 'a yucl c'u tzex 'ilji, yujto an Jehová in, wic yaj jun c'u cha. Tzann̈j mach tzmunlj 'a sc'ul 'iljelal cha, tojln̈ej cab' schami. 16E masnil, yowlal tzeyiclj sc'ul 'iljelal, yujto a jun tic, sch'oxnb'il in trato eyet' 'a jun 'ejmn̈ej. 17Jun 'ejmn̈ej tzcan jun ch'oxnb'il tic 'a in cal eyet' ax israel ex tic, xchi Dios.

Yujto waquen̈ej c'u 'ix munlj Jehová yic sb'on satcha'an̈ yet' lum lum tic, ax 'a yucl c'u, 'ix 'ilji.

18A yic 'ix lajw spaxtin Jehová yet' Moisés chi 'a lum jolm witz Sinaí, 'ix ya'n chapachn̈ q'uen q'uen 'a 'a, q'uen 'ajtil tz'ib'b'il 'och schecnb'il. Caw a Dios 'ix tz'ib'n 'och jun tzo'n̈ checnb'il chi 'a eb' q'ue'en.

Currently Selected:

Ex 31: CSS

Highlight

Copy