Ec 6
6
1'Ay jun tas man̈ wach'c nachji tzb'o 'a qui calc tzwil 'a yolyib'n̈q'uinl tic, caw cusc'ojlal yilxi: 2Toq'ue tzyac' Dios sricoal junc 'anma' yic tzq'ue'ch yet' smasnil tas 'ay 'a 'a, palta ax tz'aji, matz 'ajx yac' sgana yet' jun tzo'n̈ cha, chucx junc 'anma tzyac' tzaljoc sc'ojl yet'oc. A jun tic, caw wal nab'an̈ej, cusc'ojlal yic tzqui nan coti. 3Wach'xam 'ay junc winc 'ay junc ciente yunnal, caw niwn pax yab'lil tzyil 'a yolyib'n̈q'uinl tic, palta toto matz yac' pax tzaljoc sc'ojl yet' tas wach', toxn to man̈ wach'c 'oj 'aj smucxi. A tzin na an tic, yel xo wach' yic junc 'e'lti 'unn 'a yib'n̈ jun winc cha. 4Wach'xam a jun 'unn cha, ton̈j tzsat 'ejmi, may 'aj tzb'inax jab'oc, 5matz yil xon jac sacq'uinal, may tas tzyojquej 'eli, palta yel xo wach' yilj 'a yib'n̈ jun winc cha. 6Toxn̈ej tzyil jun winc chi chab'oc mil ab'il, palta matz yac' sgana yet' tas wach' 'ay 'a a'. Ax 'a yic slajub', junn̈j 'aj 'oj c'och eb'.
7A smasnil qui munljelec tzqui b'o'o, cojn yuj yoch yopiso 'a qui niwnal, tzqui b'onec, palta may b'a'n̈ tz'och wan qui nib'nec tas tzqui nib'ej. 8¡Toc 'ay swach'l yic junc jeln 'a yib'n̈ pax junc may snab'en! Toto meb'a on̈ec, ¡toc 'ay tzcac' ganar yic tzcojcanec 'el qui'n b'ey qui b'a yet' eb' quit 'anmal 'a swach'il!
9Yel xo wach' jab' cab' tas 'ay 'ayn̈ec, 'a yib'n̈ pax to tzqui nib'jec nan̈loc xo. A jun tic, caw nab'an̈ej paxi, lajn wal 'icha yic tzcob' qui pechnec qui b'a yet' 'ic' yic tzcob' ca'lnoc qui yamni. 10A tas 'ayc' ticnec, toxn tzalx xon 'a pecti'. An̈ 'anman̈ec tic, cojc xon tas cajec. Matz tac' qui tenec qui b'a yet' qui Mam Dios yujto 'ec'b'al yip 'a quib'n̈ec. 11Yel ton tas tzalxi: A 'aj niwn tas tzcalec, 'ay paxti man̈x 'a yel'chi, may jac tas wach' qui'nec 'a spatquil yic niwn tas tzcalc cha. 12May junc on̈ec cojtac tas junc tz'och qui wach'loc, yic 'ayn̈ec 'ec' 'a yolyib'n̈q'uinl tic. A qui q'uinlec may jac yel'chi, lajn yec' 'icha junc wewen. ¡Toc 'ayt mach 'oj alnc cab'ec tas tzb'o 'a yolyib'n̈q'uinl tic yic chamnc on̈c xo!
Currently Selected:
Ec 6: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
