Ec 4
4
1'Ix wa'n 'at in nab'en 'a jantc tz'aj eb' 'anma yixtx 'a yolyib'n̈q'uinl tic. 'Ix wilni to caw wal tz'oc' eb', palta may mach tz'a'n sniwnal sc'ojl eb', yujto a eb' 'ay yopiso cha, a eb' tz'ixtn eb' yit 'anmal cha. 2Yuj cha, xwalni to yel xo wach' yic eb' chamnc xo 'a yib'n̈ eb' pitznto. 3Wach' yic eb' mantzac alji, yujto mantzac yil eb' tas jun tzo'n̈ maysch'olnil tzb'o 'a yolyib'n̈q'uinl tic.
4Xwiln paxi, 'ay 'aj caw tzcob' quixtquec qui b'a qui munlji yic tzcob' qui nib'noquec q'ue'ch qui b'a yet' tas 'ay 'ayn̈ec. Nab'an̈ej jun tzon̈ munljel cha, yujto lajn wal 'icha yic tzcob' qui pechnec qui b'a yet' 'ic' yic tzcob' ca'lnoc qui yamni.
5'Ay 'aj tzalxi to cojn eb' may snab'en, an̈j eb' may jac tas tzb'o'o, tzya' cham sb'a eb' yuj wejel. 6Palta an xo tic tzwal pax 'ixtic: Yel xo wach' jab' wal tas 'ay 'ayn̈ec toto tzaljc'ojlal cajec, 'a yib'n̈ to cob' niwn tas 'ay 'ayn̈ec, palta yel xo tzquixtjec qui b'a qui sayni, xin chi.
7'Ix wiln junx tas tzuj 'a yolyib'n̈q'uinl tic, to caw nab'an̈ej. 8'Ay mach sch'ocoj, may xon junc yunnal, mto may junc yu'tac, palta matz 'ilj xon jac smunlji, matz 'och wan sayn 'ec' sricoal. May 'aj tzyec sna jac 'ixtic: ¿Mach yu'uj tzwixtn in b'a in munlji? ¿Tom 'ay mach 'aj 'oj can jun tzo'n̈ tic wu'uj? ¿Tas yuj may jac tzaljc'ojlal tzwila? tom xchi. A jun cha, nab'an̈ej.
A mol munljel
9Wach' toto tzmol munlj chawn̈oc 'anma', 'a yib'n̈ junc mach tzmunlj sch'ocoj, yujto niwn tas tzyij eb' 'a smunljel 'ixta'. 10Toto tz'ejm junoc, ax junx chi tz'i'n cha'an̈. Ax pax jun sch'ocj cha, toto tz'ejmi, toc 'ayt mach 'oj 'i'noc cha'an̈. 11An̈jtona toto 'ay chawn̈oc 'anma junn̈j tzwayi, tzmol 'a'j eb' sq'uixnal 'a jun jun. Palta ax junc mach sch'ocoj, may tz'aj sq'uixnj cha'an̈. 12A junc mach sch'ocoj, yajn̈ej tz'ajx ganar yuj junc 'ajc'ojol, palta ax yic chawn̈ sb'ey eb', tztac' ste'wtzan sb'a eb', 'icha junc lasu 'oxe yol sat, man̈ comnoc tzn̈i'chji.
Wach' yic win meb'a 'ay snab'en
13Yel xo wach' yic junc win quelm to meb'a to 'ay snab'en, 'a yib'n̈ pax junc win rey 'ichm xo to may snab'en, man̈xtzac schaj yab' junc nab'en. 14-15Wach'xam meb'a win quelm cha yic x'elt 'a preso, palta x'och reyal. Ax xwilni to smasnil eb' 'anma tzalni to wach' a win quelm chi tz'ochcn reyl sjelc win 'ichm winc cha. 16Wach'xam til wal sb'isl 'anma stzalj ya'n 'och win quelm chi reyal, palta ax yic b'aq'uin̈, man̈x 'a mach 'oj alnoc wach'l winac. An̈jtona jun tic, caw nab'an̈ej paxi, yujto lajn wal 'icha yic tzcob' qui pechnec qui b'a yet' 'ic' yic tzcob' ca'lnoc qui yamni.
Currently Selected:
Ec 4: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
