Dt 6

Jun niwquil checnb'il caw 'ay smay

1'Ix yaln pax Moisés 'ixtic:

Atn wal jun tzo'n̈ checnb'il tic, ley yet' cuynb'il tzyac' Jehová qui Diosalec wal 'ayex, sec a jun tzo'n̈ tic 'oj e b'eylb'oc 'a sat lum lum 'oj eyico'oc cha. 2Yic wach' 'oj e xiw 'a Jehová qui Diosalec, 'oj eyiclc smasnil schecnb'il, sley yet' smasnil scuynb'il yic 'ayx 'ec' 'a yolyib'n̈q'uinl tic yet' eyunnal, eyiechiquin, sec 'oj najtxb'oc e q'uinal. 3'Ab'tec wal ex wit chon̈ab', caw tze b'eylb'ej jun tzo'n̈ checnb'il tic sec wach' 'oj eyel'chi. 'Oj niwtjoc e b'isul, ax eyoch niwc chon̈b'al 'a sat lum lum caw wach' cha, 'icha yutjnac Jehová qui Diosalec yaln 'a eb' qui mam quichmec.

4'Ab'tec wal ex wit israelal, cojn Jehová qui Diosalec, may junc xo.

5Chamc'ojlejc Jehová qui Diosalec yet' smasnil e c'ojol, yet' smasnil e nab'en yet' smasnil eyip.

6A jun tzo'n̈ paxti tzwalcn 'ayx tic, molc can 'a e nab'en. 7'A junjn c'u, tze cuyn eb' eyunnal 'a jun tzo'n̈ paxti tic. Tzeyalb'tan̈j 'a yol eyatut, 'a yol b'e, 'a yic tzex waycn 'ejmi yet' pax 'a yic tzex q'uexwa'an. 8'A'c 'och jun tzo'n̈ checnb'il tic 'a e c'ab' yet' 'a snan̈l e sat, 'icha to ch'oxnb'il tz'ajch 'ayex. 9Tz'ib'jec 'och 'a spiralil eyatut yet' 'a spuertail e chon̈ab'.

Xyal Moisés to tzyiclx sley Dios

10A Jehová qui Diosalec, a 'oj eyi'n 'och 'a sat lum lum 'aj ya'jnac sti ya'n 'a eb' qui mam quichmec, atn 'a Abraham, Isaac yet' 'a Jacob. A jun lum cha, caw niwc jun tzo'n̈ chon̈b' 'ay 'a 'a, caw wach' pax yilxi, palta man̈oc ex e b'ojnac. 11A eb' te n̈a 'ay ta', b'ut'n yet' tas wach' 'ay 'a yojol, palta man̈oc ex b'ut'jnac. 'Ay a 'uc'b'il a joyb'il, palta man̈oc ex joyjnac. 'Ay te uva yet' te olivo 'awb'il ta', palta man̈oc ex 'awjnac. Toxn̈ej 'oj e c'ux tas 'ay 'a jun lugar cha, ax e b'ut'j wal si'mb'il. 12A yic 'oj 'el'choc jun cha, tzeyil wal e b'a, xeya't wal sat e c'ojl 'a Jehová, yujto a on̈ 'i'nec 'elt 'a Egipto 'a 'aj 'ayn̈ec 'och mosoal. 13Cojn 'a Jehová Dios tzex xiwi, a tzeyac' servil. Cojn sb'i tze b'inej, yic tze ya'n junc e ti'. 14Man̈ ex 'och tza'n yuj sdiosal eb' 'anma cajn 'a e tz'ey. 15A Jehová qui Diosalec 'ayc' wal 'a qui calec, 'ay smay tzcot yowl 'ayex. Toto tzeyal e b'a 'a jun tzo'n̈ comn dios cha, ax ex satn 'el 'a jun 'ejmn̈ej 'a sat lum lum cha.

16Man̈ eyac' prowal Jehová qui Diosalec, 'icha wal eyutjnac 'a Masah. 17Yicljec smasnil schecnb'il, smasnil sley yet' scuynb'il xyac' 'ayn̈ec. 18A cab' tas wach' tze b'o'o. Tojln̈ej cab' tzeyutj e b'a 'a sat Jehová, sec wach' tzex 'el'chi, ax eyica'an lum lum 'aj ya'jnac sti ya'n 'a eb' qui mam quichmec. 19A eb' 'ajc'ojl yajch 'ayex, 'oj 'at eb' 'elc yuj Jehová, 'icha yutjnac yaln cani.

20Toto 'ay junc c'ual, 'oj sc'anb'c eb' eyunnal 'ayx 'ixtic: ¿Tas wal tzyal 'el'ch jun tzo'n̈ checnb'il tic, yet' ley 'ix ya'cn Jehová Dios 'ayn̈ec? toto xchi eb'. 21Tze pac 'a eb' 'ixtic: An̈ tic on̈, mosoaln̈ej cajch 'a win sreyl Egipto pecti', man̈ quico'oc qui b'a on̈. Ax Jehová on̈ 'i'n 'elt 'a jun lugar chi yet' spoder. 22An̈ tic on̈, 'ix quil wal jun tzo'n̈ niwc milagro caw satjub'tac yilxi, 'ix sch'ox Jehová yil win rey cha, yet' pax 'a smasnil eb' yit chon̈b' winac. 23Palta an̈ xo tic on̈, on̈ yij 'elt Jehová 'a jun lugar cha, on̈ yi'n cot 'a jun lum lum 'aj ya'jnac sti ya'n 'a eb' qui mam quichmec, yic tzya'n lum quico'oquec. 24'Ix ya'n Jehová qui Diosalec qui yiclc smasnil jun tzo'n̈ schecnb'il tic, sec wach' tzon̈ tan̈wxec yu'uj. 'Ay cab' yel'ch 'ayn̈ec, sec wach' yec' cujec, a pax tz'a'n qui tzatzil, 'icha cajc ticnec. 25Yuj cha, toto wach' tzcutjec qui yiclni jun tzo'n̈ checnb'il tic 'a yojltac Jehová qui Diosalec, wach'n̈ec 'a sat, xe chi 'a eb', xchi Moisés.

Currently Selected:

Dt 6: CSS

Highlight

Copy