Dt 29
29
1Atn jun tzo'n̈ paxti tic xyac' Jehová yal Moisés 'a eb' yit chon̈ab', yic 'ayc' eb' 'a yol smacb'en lum Moab; atn strato Dios chi sb'ojnac yet' eb' israel yic 'ayc' eb' 'a yich witz Sinaí.
Jun tzo'n̈ tennb'ilal tzyal Moisés
2'Ix ya'n Moisés syam sb'a smasnil eb' yit chon̈b' cha, 'ix yaln 'a eb' 'ixtic:
Ax tic, eyiljnac smasnil tas sb'ojnac Jehová 'a win sreyl Egipto, yet' 'a eb' 'aych yajlil yet' winac, yet' 'a smasnil eb' 'anma 'a jun nacion̈ cha. 3Testigo ex a jun tzo'n̈ yailal, yet' 'a jun tzo'n̈ tas satjub'tac yilx sch'oxjnac 'a eb' 'anma cha. 4Palta mantzac yac' Jehová eyojcoc 'eli, mantzac yac' pax nachjoc 'el eyu'uj tas wal tzyal 'el'ch jun tzo'n̈ tic. 5Chawinc ab'il ex wij b'ey 'a lum cusltac lu'um, palta ma'ix lajw 'el e pichul yet' pax e xan̈ab'. 6Ma'ix e waj pan, ma'ix eyu'j yal uva, ma'ix eyu'j junc xo tas jawnc xo sti', sec wach' tznachj 'el eyu'uj, to a Jehová a qui Diosalec.
7A yic on̈ jawc 'a jun lugar tic, 'ix 'elt win Sehón sreyl chon̈b' Hesbón yac' owl quet'ec, yet' win Og sreyl chon̈b' Basán, palta xlajw 'el eb' cujec. 8Xqui'nec can 'ec' slum eb', xca'n lum yico'oc eb' yin̈tl Rubén, eb' yin̈tl Gad, yet' spacl eb' yin̈tl Manasés. 9Yuj cha, caw tzeyiclj jun strato tic, tze b'eylb'ani, sec wach' 'oj 'aj 'el'ch smasnil tas 'oj e b'o'. 10A ticnec yamn cajc qui masnil 'a yojltac Jehová qui Diosalec: Ex yajl eyaj 'a junjn 'in̈tal, ex 'ichmtac winac, ex 'ay eyopiso, smasnil ex winac, 11ex 'unin, ex 'ix, yet' e masnil ex chuc chon̈b'al cajn ex 'ec' 'a qui cal tic on̈, ex c'atztzum yet' ex cuchm a'. 12Ya' sb'a yamn cajec, wach' tzeya'cn e ti eyiclni strato Jehová Dios tzb'ocn quet' ticnec. 13A ticnec b'i'an, tzeyojquej can 'eli, chajtlto tzex 'ochcn schon̈b'oc Jehová, ax tz'ochcn pax e Diosaloc, 'icha yutjnac ya'n can sti 'a Abraham, 'a Isaac yet' 'a Jacob, atn eb' qui mam quichmec. 14Palta man̈ cojnoc eyet' ax tic tzb'o Jehová jun strato tic, 15an̈jtona locn pax eb' eyin̈tl man̈toc 'ayc' 'a yojltac Jehová quet'ec 'a jun c'u tic. 16Ax tic, eyojc wal si'mb'il tas on̈ 'aj que'c cajn 'a Egipto, eyojc paxi, tas on̈ 'aj que'tec 'a jun tzo'n̈ nacion̈ 'a 'aj on̈ b'eyec. 17'Ay 'ajtil xlaj quilc jun tzo'n̈ yechl comn dios, jun tzo'n̈ to yajb'il yuj Jehová, atn jun tzo'n̈ b'ob'il yet' te te', yet' q'uen q'ue'en, yet' plata, yet' oro. Atn 'a jun tzo'n̈ chi tzyal sb'a eb' 'anma cajn ta'. 18Comnoc may junc mach 'a qui calc tic, winac mto 'ix, mto eyunnal, mto eyisil, mto junc 'in̈tal eb' quit chon̈b'ec tz'actn can Jehová qui Diosalec, yic tzyaln sb'a 'a sdiosal jun tzo'n̈ xo nacion̈ cha. Comnoc may junc ex lajn ex 'icha junc yib' te tzq'uib' swol, caw c'a sat tzyac'a, tzcham 'anma yu'uj.
19A yic tzlajw eyab'n tas tz'ajcn jun trato tic, jun 'aj tzeya'cn e ti', toq'ue 'ay junc mach 'a e cal tzyal wach'l sb'a, tznan 'ixtic: An tic, wach'xam tzin b'o maysch'olnil 'icha tas tzin nib'ej, palta wach' tz'aj 'el'ch smasnil tas tzin b'o'o, toto xchi. To 'ixta', atn jun chi tzlocn can cot pax 'a eyib'n̈ e masnil. 20A Jehová man̈x 'oj yac' niwnc'ojlal, palta tojl xoj ya'n cot yowl sc'ojl 'a yib'n̈ jun 'anma cha. A smasnil yowl sc'ojl Dios alb'il can 'a yojl ch'an̈ un̈ tic, a 'oj jawc 'a yib'an̈, ax satn 'el yin̈tl jun 'anma chi 'a sat lum lum cha. 21A Jehová a 'oj pojnc 'el jun 'anma chi 'a scal smasnil eyin̈til, yic tzya'n 'och yailal 'a yib'an̈. Yuj cha, smasnil jun tzo'n̈ yailal tz'ib'b'il can 'a ch'an̈ un̈ yic trato 'ajtil tz'ib'b'il can smasnil ley, c'uxn 'oj jawc jun tzo'n̈ tic 'a yib'an̈. 22A eb' eyin̈tl b'aq'uin̈ yet' eb' chuc chon̈b'al 'oj cot 'a najat, 'oj yil eb' smasnil jun tzo'n̈ yailal cha, yet' jun tzo'n̈ yab'il 'oj ya' cot Jehová 'a yib'n̈ lum lum cha, 23'oj yil eb', chajtlto a jun lum cha, c'uxn tz'anc smasnil, cojn azufre, yet' 'atz'm 'ay 'a 'a. Man̈x 'a tas tztac' yawx 'a lu'um, man̈x 'a xon tas 'oj yac'a. Man̈x 'a sc'ultcal 'oj pac'oc 'icha wal 'ajnc slajw 'el chon̈b' Sodoma, Gomorra, Adma yet' Zeboim. Atn jun tzo'n̈ chon̈b' chi 'ix yac' Jehová lajwc 'el yet' yowl sc'ojol.
24Yuj cha, smasnil eb' 'anma 'a yolyib'n̈q'uinl tic, 'oj sc'anb'lac eb' 'a 'ixtic: ¿Tas laj yuj 'ixtc xyutj Jehová jun chon̈b' tic? ¿Tas laj wal yuj yel xo niwquil xyutj ya'n cot yowl sc'ojl 'a yib'an̈? 'oj schic eb'. 25Ax spacx 'a eb' 'ixtic: Yujto xyactj can eb' strato Jehová, atn sDiosal smam yichm eb', jun sb'ojnac strato yet' eb' yic yi'n 'elt eb' 'a Egipto. 26'Ix laj ya'nc 'ejm sb'a eb' 'a jun tzo'n̈ comn dios, xlaj yaln sb'a eb' 'a 'a, jun tzo'n̈ man̈ yojcoc eb' 'a yic pecti', jun tzo'n̈ to man̈oc Jehová 'ix 'a'n 'a eb'. 27Yuj cha, 'ix cot yowl Jehová 'a yib'n̈ lum lum tic yuj eb', xya'n cot smasnil jun tzo'n̈ yailal tz'ib'b'il can 'a ch'an̈ un̈ tic. 28Xpechx 'el eb' 'a sat slum yuj yowl sc'ojl Dios, yuj cha, xpechx can 'at eb' 'a scal jun tzo'n̈ xo nacion̈, 'icha wal tas wan yuj tic, 'oj xchic jun tz'a'n spac cha.
29'Ay jun tzo'n̈ tas man̈ cojcoc: A jun tzo'n̈ cha, yic Jehová qui Diosalec yaji; 'ay pax jun tzo'n̈ tas tz'ajx cojcoc 'eli, tz'ajx pax yojcoc 'el eb' cunnalec, sec tzqui yicljec 'a smasnil tiempo; atn smasnil checnb'il yet' jun ley tic.
Currently Selected:
Dt 29: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
