Dt 24
24
Ley 'a yib'n̈ pojjb'ail
1Toto 'ay junc winc tznupn yet' junc 'ix 'ix, tzlajw cha, ax 'a spatquil xo, tzyiln sb'a winac, to 'ay tas palta 'a 'ix, yuj cha, man̈xtzac snib'j win tzcan 'ix yet'oc. Tzpojn sb'a win yet' 'ix, palta yowlal tzyac' win yun̈al yic pojjb'al 'a 'ix. Tzlajw cha, tzyi'n can 'elt win 'ix 'a yol yatut. 2A yic tox spoj sb'a 'ix yet' win cha, tztac' snupn pax 'ix yet' junc xo winac. 3Palta toto a pax junx win cha, man̈xtzac snib'j win tzlaj sb'a yet' 'ix, tzya'n pax win yun̈al yic pojjb'al 'a 'ix, tzpechn 'el win 'ix 'a yol yatut, mto tzcham pax winac. 4Toto 'ixta tz'aj 'ix, man̈xtzac stac' yi'n sb'a 'ix yet' win sb'ab'l 'ichmil chi jun 'ejm xo, yujto caw man̈ wach'c jun chi 'a sat Jehová. Yuj cha, man̈ eyixtc 'el lum lum 'oj yac' Jehová qui Diosalec eyico'oc.
A jun tzo'n̈ xo ley
5Toto 'ay junc winc tot nupnnac yet' yistzil, matz tac' s'at 'a owal, matz tac' pax yoch win 'a junc xo 'opisoal, libre tzcan win junc ab'il 'a yatut, yic tzya'n win tzaljoc sc'ojl yet' yistzil cha.
6Man̈ e c'ancn junc smulino, mto junc scha junc mach tz'och majn tumn 'ayex, mto yuj smajnub'loc junc xo tas; yujto a jun cha, lajn 'icha to tzqui tenchwan swa jun 'anma'.
7Toto 'ay junc mach tzyel'j junc yit chon̈ab', yic tz'och smeb'a'oc, mto yic tzchon̈n 'eli, yowlal tzcham jun 'ixta tzb'o cha, sec 'ixta tz'aj satl jun maysch'olnil chi 'a e cal.
8Toto 'ay mach 'aj tzpitzw jun yab'il tzcuch lepra, yowlal tzeyiclj sleyl tzyal eb' ya'mal 'och sti eb' 'anma 'a Dios, atn eb' yin̈tl Leví. Tzeyiclj smasnil jun tzo'n̈ checnb'il 'ix walcn 'ayex, yet' pax 'a eb' levita cha. 9Nac coti, tas x'aj María 'a yol b'e yuj Jehová qui Diosalec, yic queltec 'a Egipto.
10Toto tzeyac' e tumn smajnc junc eyit 'anma'il, man̈ ex 'och 'a yol yatut yic tzeyi'n 'elt junc tas yuj smajnub'lc e tumn cha. 11A eyico', to tzex can 'a sti n̈a, tze tan̈wni yi'n 'elt tas 'oj yac' 'ayx yuj smajnub'l e tumn cha. 12Palta toto caw meb'a jun 'anma chi 'aj tzeyac' e tumn majnil, q'uinloc a junc spichl tzyac' 'ayex, caw matz tac' eyi'n 'ec' junc 'ac'wl 'a yib'n̈ jun smajnub'l chi tzya'cn 'ayx cha. 13A yic wanto wal yem c'u, tzeya'n can pax meltzjoc 'a 'a, toq'ue a tzyac'q'ue 'a yib'an̈ yic tzway 'a jun 'ac'wl cha. Toto 'ixta tzeyutej, a jun 'anma cha, 'oj yal wach' paxti 'a eyib'an̈, tojl pax tas tze b'o 'a sat Jehová Dios.
14Man̈ eyixtc junc meb'a 'anma tzmunlj 'ayex, toxn̈ej eb' eyit chon̈ab', mto eb' chuc chon̈b'al 'ayc' 'a e cal, man̈ e macch wan stojl eb'. 15Tojc sc'u eb' e majn 'a junjn yemc'ual, yujto a eb' meb'a', yowlal tzman eb' tas tzc'ux 'a junjn c'u. Toto ma'ay, 'oj yal sb'a eb' 'a Jehová, ax yochcn jun chi e muloc.
16Matz tac' yajx 'och chaml 'a yib'n̈ eb' mamb'il, mto eb' nunb'il yuj smul yunnal tz'ochi; an̈jtona', matz tac' yajx 'och chaml 'a yib'n̈ eb' 'unnab'il, yuj smul smam snun. Junjn 'anma', tzcham yuj smul.
17Man̈ e b'o tas man̈ tojloc 'a eb' chuc chon̈b'al 'ayc' a e cal, yet' 'a eb' meb'a 'unn chamnc smam, yet' pax 'a eb' 'ix 'ix chamnc yichmil. Man̈ eyi'c spichl eb' 'ix yuj smajnub'loc junc tas. 18Man̈ eyac' sat 'a e c'ojol, yujto an̈ec tic, on̈ 'e'c mosoal 'a Egipto, ax Jehová Dios a on̈ 'i'nec 'elta, yuj cha, tzwaln can 'ayex, to tzeyiclj smasnil jun tzo'n̈ tic.
19A yic tzex polw trigo, yic tze si'n syam sb'a 'ixim, toto tzcan jun yuchc 'ixm 'a scal yoc eyu'uj, man̈ ex meltzjoc 'a e patc e sayx 'ixim. Can cab' 'ixim, sec a eb' chuc chon̈b'al 'ayc' 'a e cal, mto eb' meb'a 'unn chamnc smam, mto eb' 'ix 'ix chamnc yichmil, a eb' 'oj 'ec' si'nc 'ixim, sec 'oj yac' Jehová qui Diosalec syaxil 'a yib'n̈ smasnil tas tze b'o'o.
20A yic tze ch'inn sat te olivo, man̈ ex meltzjoc e mitz'c te sat chi 'a sc'ab'. A te tzcan eyuj cha, can cab' te yico'oc eb' chuc chon̈b'al, yico'oc eb' meb'a 'unn chamnc smam yet' yuj eb' 'ix 'ix chamnc yichmil. 21A yic tze ch'inn sat te uva 'awb'il eyu'uj, man̈ ex meltzjoc 'a e patc e mitz'c te sat cha. A te tzcan eyuj cha, can cab' te yico'oc eb' chuc chon̈b'al, yico'oc eb' meb'a 'unn chamnc smam, yet' yuj eb' 'ix 'ix chamnc yichmil. 22Nac coti, chajtlto an̈ec tic, on̈ 'e'c mosoal 'a Egipto; yuj cha, tzwaln can 'ayex, to tzeyiclj smasnil jun tzo'n̈ checnb'il tic.
Currently Selected:
Dt 24: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
