Dt 23

Jun tzo'n̈ 'anma*r* tz'ijx 'el 'a scal eb' chon̈ab'

1Toto 'ay junc winc pojnc sq'ue'en mto a swincal 'elnac, may yaln yic yoch 'a scal eb' chon̈ab' yic tz'och eb' 'emmquilal 'a Jehová.

2A junc mitz' 'unin yet' yin̈til,#Dt 23.2 A 'a hebreo tzyala, "masnto 'a slajn̈c'ajil yin̈til," palta a jun tic, tzyal 'el'ch paxi, " 'a smasnil tiempo." may xon b'a'n̈ 'ay yaln yic 'a scal eb' schon̈b' Jehová.

3A eb' amonita yet' eb' moabita yet' yin̈tl junjn c'aj eb', may b'a'n̈ xon 'ay yaln eb' yic 'a scal eb' schon̈b' Jehová, 4yujto a yic on̈ 'e't 'a sat slum eb', yic on̈ 'eltec 'a lum Egipto, ma'ix yac' xon eb' cu'c jac ya'al, may xon pax jac tas xyac' eb' qui c'uxu'. A yic eb', to 'ix stoj eb' Balaam win yunnal Beor, win cotnc 'a lum Petor 'a yol yic Mesopotamia, yic tzon̈ wul scatb'tzanec. 5Palta ax Jehová qui Diosalec, ma'ix schaj yab' tas 'ix yal Balaam. A scatb' cha, 'ix meltzj 'och qui wach'loquec yuj Jehová, yujto caw 'ay schamc'ojlal 'ayn̈ec. 6Man̈ e say tas tzex 'aj eyoch 'a junc'ojlal yet' eb', matz tac' tzex colwj 'a eb' yuj tas 'ay tz'och yuj eb' 'a smasnil tiempo.

7Palta man̈ e chacl eb' edomita, yujto quicanec to qui b'a yet' eb'. An̈jtona eb' 'aj Egipto, man̈ e chacl pax eb', yujto on̈ 'e'c jun tiempoal 'a sat slum eb' cha. 8A eb' yoxc'ajil yin̈tl eb' chi tz'alj 'a e cal, 'ayx yaln eb' yic 'a scal eb' schon̈b' Jehová.

Ley 'a yib'n̈ tas tz'aj*r* sacb'tzax camplamento

9A yic tzex 'och 'a owl yet' eb' 'ajc'ojl yajch 'ayex, yic tzex can 'a scal c'ultac, man̈ e b'o junc tas q'uixweltac yilxi. 10Toto 'ay junc mach 'a e cal, tztob' yin̈til yic waynac, yowlal tz'elcn jun chi 'a spatc 'el camplamento 'a jun c'u cha. 11A 'a yic wan yem c'u, wach' cab' tzyutj sb'icn 'el sb'a, ax 'a yic tox x'em c'u cha, tztac' yochx 'a yol camplamento.

12A yic tzex chulji, yowlal tze b'o junc lugar 'a 'aj wach' tzex chulj 'a spatc 'el camplamento cha. 13Yowlal tzeyij b'ey junc e te 'icha istaca, tzeyac' 'ejm 'a yol e pa, sec ax yic tzex 'at chuljoc cha, tze joy lum lum chi yet' te'. Tzlajw cha, tzex chulji, ax yic tzlajw e chulj cha, tze lan̈n can pax e chul chi yet' lum lum cha. 14Yujto a Jehová qui Diosalec ajun eyet'oc, 'ayc' eyet' 'a e camplamento. A tzex tan̈wni, tzcolwj pax eyet'oc yic tzeya'n ganar eb' 'ajc'ojl yajch 'ayex. Yuj cha, a jun e camplamento cha, yowlal cab' sac yaji, sec may cab' tas tu yilx tzyil Dios 'a 'a, to ma'ay, 'ay smay tzyij 'el sb'a 'a e cal.

A jun tzo'n̈ xo ley

15Toto 'ay junc smeb'a junc win patron̈ tz'at 'elc 'a 'a, tzlajw cha, tzc'och 'ayex, tzc'ann can sb'a eyet'oc, man̈ eyac' meltzjoc 'a spatron̈ cha. 16Can cab' 'a e cal cha, libre cab' si'lni 'aja junc chon̈b' 'aj tznib'j tzcan cajan, may cab' mach tztac' stzuntzn 'a 'aj tzcan cha.

17May cab' junc winac, mto junc 'ix quit chon̈b'ec tzya'ch sb'a 'ajmulal, yuj ya'n 'och sb'a 'emmquilal 'a jun tzo'n̈ comn dios. 18A q'uen tumn tzchaj eb' 'ix, mto eb' winc#Dt 23.18 A 'a hebreo tzb'inax "tz'i'," palta a jun tic, tzyal 'el'chi, eb' winc tzb'on 'ajmulal yuj yoch eb' 'emmquilal 'a jun tzo'n̈ comn dios. 'a spatquil yajmulal, man̈ e cha yac' eb' q'uen 'a junc 'aj ya'jnac eb' sti ya'n 'a Jehová Dios, yujto a jun b'eyb'al cha, caw yajb'il 'el yuj Dios.

19A yic tzeya'n e tumn majnil 'a junc eyit chon̈ab', man̈ e c'an yune e tumn cha, mto junc tas tzc'uxxi, mto tzann̈j junc xo tas tzmajnaxi, man̈ e c'an smajnub'al. 20Palta 'a junc chuc chon̈b'al 'ayc' 'a e cal, tztac' e c'ann smajnub'l junc tas tzeyac' smajnoc. Ax pax 'a eb' quit chon̈b' cha, man̈ e c'an smajnub'al sec a Jehová qui Diosalec, 'oj yac' syaxilal 'a yib'n̈ smasnil tas 'oj e b'o 'a sat lum lum 'oj 'och eyico'oc cha. 21A yic tzeya'n e ti eya'n junc tas 'a Jehová Dios, matz 'ec' cab' tiempo eya'ni. Toto ma'ay 'oj sc'anb'c 'ayex, ax yoch jun chi e muloc. 22Toto may junc tas 'aj tzeyac' e ti eya'ni, may e mul 'oj 'ochoc, 23palta toto tz'el wal 'a e c'ojl eya'n junc tas 'a Jehová Dios, yowlal tzeyac' 'el'choc e ti tzeyac' cha.

24A yic tzex 'och 'a scal smunljel junc eb' quit chon̈b'ec mto junc mach, tztac' e lon sat te uva 'ay 'a scal smunljel cha, palta matz tac' eyi'n jac eyic 'a yol e pa. 25Toto tzex 'och 'a scal strigo junc mach, tztac' e ch'inn e c'ux 'ixm sjolm cha, palta matz tac' e poln 'ixim yic tzeyi'ni.

Currently Selected:

Dt 23: CSS

Highlight

Copy