Dt 17

1A no wacax, no calnelu mto no chiwo 'ay tas palta 'a sniwnal, man̈ eyac' no xajmb'al-l 'a Jehová qui Diosalec. A jun tzo'n̈ noc' cha, yajb'il no yuj Jehová.

2Toto a 'a scal jun tzo'n̈ chon̈b' 'oj yac' Jehová eyico'oc cha, ata tz'el speclal junc winac, mto junc 'ix to 'ay tas tu tzb'o'o, tenmtac 'a strato Jehová, toto tzb'o jun tzo'n̈ 'oj wal tic: 3toto tz'at yal sb'a 'a junc comn dios, mto tzyac' 'ejm sb'a 'a 'a, toto tzyal sb'a 'a c'u, 'a 'uj, 'a jun tzo'n̈ c'anal, atn jun tzo'n̈ waljnac, to may mach tzyac' 'ejm sb'a 'a 'a, 4toto tzeyab' speclal jun cha, tze c'anb'j eyab' si'mb'il. Toto yel 'ay jun maysch'olnil chi tzb'o 'a e cal, 5a jun winc cha, mto junc 'ix tzb'on jun maysch'olnil cha, yowlal tzeyij 'el 'a sti 'el chon̈ab', axta tze julcn cham yet' q'uen q'ue'en.

6A jun chaml cha, tz'ajx 'och 'a yib'n̈ junc mach toto 'ay chawn̈oc mto 'oxwn̈oc testigo tz'iln jun 'anma cha. Palta toto cojn junc mach tzyac' testigoal sb'a yuj junc mul cha, matz tac' yoch chaml 'a yib'n̈ jun 'anma cha. 7A eb' testigo cha, a eb' tzb'ab'l jul q'uenan jun 'ay smul cha. 'Ixta b'i'an, tzjul q'uenan eb' chon̈b' chi smasnil, sec 'ixta 'oj 'aj yel jun maysch'olnil chi 'a e cal.

8Toto 'ay junc tas tz'ajx e b'eyc'ojloc, palta caw 'ajltac snachj 'el eyu'uj, 'icha owl yic chamel, yic lajwel, mto junc xo comn owl tzq'ue wan 'a yol e chon̈b' cha, tzex 'at mu'c 'a jun lugar sic'b'il 'el yuj Jehová qui Diosalec. 9Tze mol aln yet' eb' ya'mal 'och e ti 'a Dios, atn eb' yin̈tl Leví, tzeyaln pax 'a eb' juez 'aych 'a yopiso, tze c'anb'n 'a eb', tas tz'aj jun owl cha. Ax eb' 'oj alnoc tas tz'aj sb'oyaji. 10Ax xo tzeyac' 'ejm sb'omb'il chi 'a scal eb'. 'Icha tzyutj eb' 'ay yopiso chi yaln 'ayex, 'ixta tzeyutej. 11'Icha wal tzyutj eb' yaln cha, 'ixta tzeyutj eya'n 'ejm jun ley cha, may wal jac tze jel-l 'a 'a. 12Palta toto 'ay mach tz'ec' 'a yib'an̈, tzb'onyaj junc chi 'a mun yico', man̈ 'ichaoc tzyutj win ya'mal 'och e ti chi yalni, atn win 'aych ya'malc servil Jehová qui Diosalec, mto tz'ec' 'a yib'n̈ 'icha tzyutj win juez chi yalni. A jun 'ixta tzyutj sb'a cha, tojln̈ej schami, sec 'ixta tz'aj yel maysch'olnil chi 'a e cal. 13A yic 'oj yab'nc eb' 'anma yab'xil jun cha, 'oj xiw eb' sb'onyaj junc tas 'a mun yico'.

Checnb'il 'a eb' tz'och reyal

14A yic tox ex c'och 'a sat lum lum 'oj yac' Jehová Dios eyico'oc cha, 'a yic tox 'ix 'e'cn lum eyu'uj, yic 'ayx tiempo e cajn lu'um, toq'ue 'oj eyal 'ixtic: A ticnec b'i'an, tzqui nib'ej to 'ay junc qui reyl tzon̈ jucb'tzani, 'icha yaj jun tzo'n̈ xo chon̈b' 'a qui la'nil tic, 'oj e chioc. 15A junc quit chon̈b' tzeya'ch e reyloc 'a yol e nacion̈ cha. Yowlal a Jehová qui Diosalec tzsi'n 'eli. Man̈ eya'ch junc chuc chon̈b'al e reyloc, yujto man̈ quit chon̈b'oquec qui b'a yet'oc. 16Palta a junc e reyl cha, man̈ niwnoc cab' no chej tzyamb'tzej, may cab' eb' winc tzchecb't 'a Egipto yic tz'at yi'nc cot eb' nan̈locx no chej cha. A Jehová yaljnac can 'ixtic: May cab' b'a'n̈ 'oj e meltzj 'a jun b'e tic, xchi. 17An̈jtona', man̈ niwnoc cab' yistl win tzyi'aj, sec ma'oj juwc snab'en win yuj eb' 'ix. Man̈ niwnoc cab' q'uen oro, mto q'uen plata tzyamb'tzej.

18A yic tz'och jun rey chi 'a yopiso, 'oj yac' 'eltoc scopiail jun tzo'n̈ cuynb'il tic, ata tz'elt 'a jun b'ab'l copia 'aycn 'a yol sc'ab' eb' ya'mal 'och sti eb' 'anma 'a Dios, atn eb' yin̈tl Leví. 19Yowlal 'ay junc scopia win tzcan 'a 'a, yic wach' a chi tzcuyn̈j 'a junjn c'u, sec 'ay cab' yel'ch Jehová Dios 'a sat, 'ay pax yel'ch jun tzo'n̈ cuynb'il tic 'a 'a. Yowlal tzb'eylb'ej jun tzo'n̈ checnb'il tic, 20sec ma'oj sna', to yel niwn yel'ch 'a yib'n̈ eb' yit chon̈ab', ma'oj yi'l pax snab'en 'a jun tzo'n̈ checnb'il tic. Toto 'ixta 'oj yutoc, najtl 'oj yac' yajlil 'a yib'n̈ eb' quit chon̈b'ec, xchi Moisés.

Currently Selected:

Dt 17: CSS

Highlight

Copy