Am 2
2
A chon̈b' Moab
1A Jehová tzaln 'ixtic: A wal eb' 'aj Moab, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb'. Sn̈usjnac eb' sb'acl eb' sreyl Edom, masnto 'ochnc tan̈il yuj eb'.
2Yuj cha, 'oj wac' n̈usxoc tz'a chon̈b' Moab, ax jun c'ac' chi 'oj satnc 'el jun tzo'n̈ cuartel 'a Queriot. 'A scal 'aw yic owal, yet' 'a yic wan yutz'x trompeta, ax scham eb' 'aj Moab.
3'Oj in mil cham sreyl eb' yet' pax eb' yit yajlil, xchi Jehová.
A chon̈b' Judá
4A Jehová tzaln 'ixtic: A wal eb' aj Judá, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb'. Spatquilj can 'el eb' in cuynb'il, ma'ix syiclj eb' in ley. A yic eb', to xyac' eb' 'emmquilal 'a jun tzo'n̈ comn dios, atn jun tzo'n̈ 'aj ya'jnac eb' smam yichm eb' 'emmquilal.
5Yuj cha, 'oj wac' n̈usxoc tz'a Judá, ax jun c'ac' chi 'oj satnc 'el jun tzo'n̈ cuartel 'a Jerusalén, xchi Jehová.
Yailal 'a yib'n̈ chon̈b' Israel
6A Jehová tzaln 'ixtic: A wal eb' israel tic, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb'. A eb' meb'a wach' snab'en 'a scal eb', 'in tzchon̈x 'el eb' yuj eb', yujn̈ej to matz techj stojn eb' sb'oc 'a eb', wach'xam yujn̈ej jun mojn̈oc xan̈ab'.
7Caw tz'ixtx eb' meb'a yuj eb', man̈ wach'c tzyutj eb' sb'on yaj eb' tz'ixtx cha. Q'uixweltac in b'inax yuj eb', yujto a win mamb'il, yet' win 'unnab'il, junn̈j 'ix 'ix tzmuln ewin yet'oc.
8A te pichl tzchaj eb' smajnnub'loc stumin, a 'a yib'n̈ te' ata tz'ec' c'otn eb' smuln 'a yojltac yet'l xajmb'al sdiosal eb'. Tzc'uxn eb' schib'l wal tz'ajx 'a jun tzo'n̈ comn dios cha. A yet' q'uen tumn tzchaj eb' multail, a chi tzyac' eb' manc yan̈, tzlajw cha, tz'u'w 'an̈ eb' 'a yol yatutal sdiosal cha.
9An Jehová in, an tzwala, to in satjnac 'el eb' amorreo, yuj wa'n slum eb' 'ayex. Wach'xam niwc stel eb' 'icha te c'ute', wach'xam tzatz eb' 'icha te jiy, palta 'oj in satl eb' 'a jun 'ejmn̈ej.
10Palta ax tic, wijnac 'elt eb' e mam eyichm 'a Egipto, chawinc ab'il wijnac b'ey eb' 'a lum cusltac lu'um, yuj wa'n slum eb' amorreo chi 'a eb'.
11In si'jnac 'och jun tzo'n̈ eb' eyin̈tl in checb'oc, ax jun tzo'n̈ xo eb', wa'jnac 'och eb' nazareoal yic tz'och eb' wico'oc. ¿Tom man̈ yelc jun tzo'n̈ tic ex israel?
12Palta ax tic, xeyac' pural yu'w 'an̈ eb' xya'ch sb'a nazareoal cha, xe tenn pax 'och wan eb' in checb' tzaln 'el in paxti'.
13Yuj cha, 'oj wac' syam sb'a yailal 'a eyib'an̈, caw 'oj e c'ac'w yu'uj, lajn 'oj eyaj 'icha sn̈uch'ch'i junc careta yuj yal-l 'ixm trigo.
14A 'a yic jun c'ul cha, a eb' jeln xon sb'eyi, man̈x 'oj stac' s'at eb' 'eloc, a eb' caw 'ay yip, man̈x 'a jac yip eb' ta', a eb' soldado caw tec'an, man̈x 'oj colchjoc eb'.
15A eb' tzjulwj yet' jul-lab', man̈x 'oj techjoc yuj eb'. An̈jtona eb' tz'a'n carela, man̈x 'oj colchjoc eb'. 'Ixta pax eb' 'oj 'at 'elc cob' 'a yib'n̈ chej.
16An Jehová in, an tzwala: a wal 'a yic jun c'u cha, a eb' cob' jeln xon ya'n owal, caw 'oj sjulcn 'el eb' syamc'ab' cha, ax s'at eb' 'eloc, xchi Dios.
Currently Selected:
Am 2: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
