3 Jn 1
1
A swach'c'ojlal win Gayo
1An tic anciano in, tic tzin tz'ib'j 'at jun in carta tic 'aych wu'tac Gayo. Caw tzach in chamc'ojlej yet' smasnil in c'ojol.
2Ach chamc'ojlb'il wu'uj, wojtac caw wach' yaj a nab'en 'a sat Dios. Tzin leslwi 'a Dios o'oj, sec caw wach' ec 'a smasnil tas, caw wach' pax a c'ojol, 'icha yaj xon a nab'en. 3A yic xwul yalnc eb' cu'tac 'ayn o'oj, caw xjaw in tzaljc'ojlal 'a tic. Yujto xwul yal eb', to caw 'aych ab' a nab'en 'a jun cuynb'il caw yel. Cojn jun ab' yel tic tza b'eylb'ej. 4A yic tzwab'ni, chajtlto a eb' chajnac Cristo wu'uj, an̈ja sb'eylb'an eb' jun cuynb'il caw yel, yuj cha, caw tzin tzalji. May junc xo 'aj tzjaw in tzaljc'ojlal 'ixta', yujto 'icha to wunnal eb'.
5Ach chamc'ojlb'il wu'uj, caw wach' xon tzotj a nab'en ta tzwab'i. Tzach laj colwj ab' 'a eb' quit creyenteal. Wach'xam man̈ ojcoc eb', palta 'ixta ab' tzotj a b'a 'a eb'. 6'Ay eb' 'ix aln 'a sat eb' yic iglesia tic, chajtlto caw 'ay a chamc'ojlal ta'. Comnoc tzach colwj 'a eb', yic tz'at eb' 'a 'ajtc tz'ati. Smoj 'ixta tzotj a colwj 'a eb', yujto 'ixta tznib'j Dios. 7A eb' cha, yujn̈ej ya'n servil eb' Jesucristo tz'ec' eb'. May junc tas tzchaj eb' 'a eb' man̈ creyenteoc. 8Yuj cha, qui cuentaec qui colwj 'a eb'. Toto 'ixta', locn on̈c wan qui munlj pax yet' eb', yic tz'ec' yalnc 'el eb' jun cuynb'il caw yel.
A sb'eyb'al win Diótrefes
9In tz'ib'jnacx 'at jun in carta 'ayx tzeyam e b'a ta'. Palta a win Diótrefes, tznib'j xoj win axn̈ej tzex 'a'n mandar ta'. A tas tzcal on̈, caw may yel'ch 'a sat winac. 10Yuj cha, a yic 'oj in c'och 'ayx ta', 'oj wala', tas smul winac. Yujto ton̈j tz'ec' yac' win jun tzo'n̈ 'es 'ayx 'a qui patc on̈. Man̈ cojnoc jun tzo'n̈ chi tzyal winac. Matz chaj pax win jun tzo'n̈ eb' cu'tac tzc'och 'ayx ta'. Toto 'ayx tze nib'j tze chaj eb', caw 'ay yowlal yuj winac. An̈jtona tzex scaw pechj 'el win 'a scal eb' yic iglesia cha.
11Ach chamc'ojlb'il wu'uj, man̈ a b'eylb'oc sb'eyb'al eb' maysch'olnil. Cojn sb'eyb'al eb' wach' tza b'eylb'ej. Toto wach' tzcutj qui b'eyb'al, yic on̈ xo Dios. Palta a eb' maysch'olnil sb'eyb'al, toxn man̈ yojcoc eb' Dios.
A swach' b'eyb'al Demetrio
12Ax cu'tac Demetrio, wan yaln eb' smasnil yuj swach'il, yujto chequel to caw tzyiclj jun cuynb'il caw yel. An̈jtona', an̈ tic on̈, tzcal wach'l on̈. Eyojtac a tas tzcal on̈, caw yel.
Tz'ajx 'at stzatzl sc'ojl eb'
13Til to wal jun tzo'n̈ xo tas tzin nib'j tzwal 'aych ta', palta matz in tz'ib'j 'at 'a jun in carta tic. 14Yujto tzin na'a, toq'ue 'oj stac' in 'at ach wila'. Atta 'oj in wach' alc can jun tzo'n̈ xo tas 'ayach.
15'Ay cab' a junc'ojlal ta'. A eb' a wach'c'ojl 'a tic, tic tzya't eb' stzatzl a c'ojol. Tic tzca't stzatzl sc'ojl junjn eb' qui wach'c'ojl ta 'on̈.
Currently Selected:
3 Jn 1: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.