2 Ts 2
2
Jun win syajlil maysch'olnil
1A ticnec ex wu'tac, ex wanab', 'oj calb't eyab' on̈, chajtl 'oj 'aj sjaw Cajlil Jesucristo, ax on̈ smolb'tzanc yet'oc. Tzon̈ tew 'at 'ayx on̈, 2man̈ e comn 'a'c somchjc 'el e nab'en, toto 'ay eb' tzaln 'ayex, to jawnacx Cajlilec. Wach'xam tzyal eb' to a Yespíritu Dios xch'oxn 'a eb', mto mun tzyal eb' sch'ocoj, man̈ ex 'och 'il yuj eb'. Toxn̈ej tzyal eb', to xc'och qui carta 'a eb' on̈, man̈ e cha eyab'i'. 3Caw man̈ e cha 'ixtxoc paxti e b'a. Yujto a 'a yic mantzac jaw Cajlilec, 'ay jun tiempoal, til wal mach 'oj sutmj pax 'och 'ajc'ojlal 'a Dios. Atta 'oj checljoc 'el jun win syajlil maysch'olnil. A win cha, yowlal 'oj 'ajxc can 'at 'a yailal. 4A jun cha, 'oj yac' owl yet' Dios. 'Oj chichnoc pax 'och 'a jantcn̈ej tas tzalx 'och diosal, yet' 'a jantcn̈ej tas 'aj tzyal sb'a eb' 'anma'. 'Oj 'em wocn 'a yol yatut Dios, ax yaln 'och sb'a Diosal.
5Caw tze na coti yic 'ayn 'ec' eyet' ta', yic waln can jun tzo'n̈ tic 'ayex. 6Eyojtac, tas matz chan jawc jun winc cha. Palta at 'a yic 'oj jawc stiempoal, atta 'oj checljoc 'el winac. 7To 'ay jun maysch'olnil wan smunlj 'a c'ultaquil. C'ultac tzmunlj ticnec, masnto 'oj 'ijxc 'el jun wan stenn 'och wa'an. 8At wal ta 'oj checljoc can 'el jun win syajlil maysch'olnil cha. Palta a Cajlilec, 'oj yutz'c cham yet' yic'. A yic 'oj jawc Cajlilec 'a scal stzictznial, ax satcn 'ejm win yu'uj. 9A yic 'oj checljoc 'el jun win syajlil maysch'olnil cha, ax Satanás, 'oj cob' ya'ch sb'a yet' winac. 'Oj cob' ya'ch spoder 'a winac. Yuj cha, 'oj cob' sb'o win jun tzo'n̈ milagro yet' jun tzo'n̈ xo tas tzch'oxn 'el spoder. Palta caw 'esn̈j jun tzo'n̈ cha. 10Til wal maysch'olnil 'oj sb'o winac, ax yixtn paxti win eb' 'anma 'oj satcn 'eli. 'Oj satcn 'ejm eb', yujto matz nib'j eb' tzya'ch sc'ojl 'a jun cuynb'il caw yel, sec tzcolchj eb'. 11Yuj cha, a Dios 'oj chan 'ixtxoc paxti eb', sec 'oj ya'ch eb' sc'ojl 'a jun 'es cha. 12Jantcn̈ej eb' matz nib'j tzya'ch sc'ojl 'a jun cuynb'il caw yel, 'oj 'ajxc can 'at eb' 'a yailal, yujto tzalj eb' yet' tas maysch'olnil.
Sic'b'iln̈ecx 'el yuj Dios
13Ex wu'tac, ex wanab', chamc'ojlb'ilx yuj Cajlilec. Yowlal caw tzca'n̈j yuj diosal 'a Dios eyuj on̈, yujto yictax pecti', sic'b'ilx can 'el yuj Dios quet' on̈, sec tzex colchj yuj Yespíritu. A tzex 'i'n 'och yico'oc Dios. Yuj cha, tzex colchj quet' on̈, yujto tzeya'ch pax e c'ojl 'a jun cuynb'il caw yel. 14Yuj jun wach' 'ab'x yic colnb'il 'ec' caljnac 'ayx on̈, a Dios ex 'awtn 'och yico'oc, sec wach' 'oj tz'acwc e wach'l 'icha swach'l Cajlil Jesucristo.
15Yuj cha, ex wu'tac, ex wanab', caw te'n tzeyutj e b'a. Caw man̈ eyac' sat e c'ojl 'a jun tzo'n̈ cuynb'il 'ec' caljnac can 'ayx on̈, yet' jun tzo'n̈ xo tz'ib'b'il 'at 'ayx cuj on̈. 16A Cajlil Jesucristo yet' qui Mam Dios, caw 'ay schamc'ojlal 'ayn̈ec. Yuj wal swach'c'ojlal, tzya'n sniwnal qui c'ojlec 'a smasnil tiempo. Tzya'n pax ca'c 'och swach'l chi yipc qui c'ojol. 17Tzqui nib'j on̈, a tzwach' 'a'n tzaljc'ojlal 'a e pixan. Tzya'n pax e te'nal, sec wach' jantcn̈ej tas tzeyala, yet' tas tze b'o'o, caw wach' 'a sat.
Currently Selected:
2 Ts 2: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
