2 S 4
4
Milb'il cham win Is-boset
1A yic xyab'n win Is-boset, win yunnal can Saúl chajtlto xcham Abner 'a Hebrón, yuj cha, 'ix xiw cha'an̈, xiw chan̈ pax smasnil eb' israel 'aych yet'oc. 2Palta 'ay chawn̈ schecb' winac, yajl yaj eb' 'a jun b'uln̈ eb' 'elc'um. 'Ay jun win tzcuch Baana, junx win tzcuch Recab. Yunnal Rimón eb', win 'aj Beerot, yin̈tl can Benjamín ewinac. (A eb' 'anma cajn 'a Beerot, 'ojcab'il chajtlto yin̈tl can Benjamín eb'. 3A eb' 'anma b'ab'l cajjnac Beerot, 'atnc eb' 'eloc, ata c'ochnc eb' scol sb'a 'a Guitaim, ula 'anma yajc' eb' ta'.)
4(A Jonatán win yunnal Saúl, 'ay jun yunnal can win tzcuch Mefi-boset. A win tic, man̈ wach'c yoc win schab'il. Yujto a yic o'e xo ab'il sq'uinal, 'ix cot yab'xil a Jezreel to a Saúl yet' Jonatán tox 'ix cham eb' 'a owal. Yuj cha, 'ix me'x chan̈ Mefi-boset yuj jun 'ix 'ajcuenta sc'uytzani, xlajw cha, x'at 'ix 'elc yet'oc. Palta yujto caw xyac' 'ix 'ip s'at 'elc yet'oc, 'ix yactn 'el 'ix win 'unn cha, yuj cha, 'ixta x'aj win sjuw cani.)
5Ax eb' yunnal Rimón 'aj Beerot, atn Recab yet' Baana, 'ix 'at eb' 'a yatut win Is-boset. A wal yowb' c'ac' 'a yic chimc'ual 'ix c'och eb', c'uxn wal waync win 'a sat sch'at. 6Ax 'ix tan̈m sti puerta 'ayb't 'ix chayj trigo. Ax x'aji xcot swayn̈ 'ix ta', yuj cha, a yic xc'och Recab yet' Baana cha, 'ix 'och eb' 'a yol yatut Is-boset cha, may xon junc mach x'iln eb'. 7Ax yic x'och eb' 'a yol n̈a cha, 'ix yiln eb' c'otn 'ec' Is-boset sway 'a sat sch'at 'aj tzwayi. 'Ix smiln eb', stzu'n 'el eb' sjolom. Xlajw cha, xyi'n 'at eb' yet'oc. Smasnil 'ac'wl xb'ey eb' 'a jun b'e yic Arabá, 8yic tz'at ya'nc eb' 'a David, yujto ata 'ayc' 'a Hebrón. Ax yic xc'och eb', 'ix yaln eb' 'a win rey chi 'ixtic:
—Mamin rey, tic xquij cot sjolm win Is-boset 'ayach, win yunnal Saúl, atn jun 'ajc'ojl yajch 'ayach, jun snib'jnac ach smil chamoc. Palta ax ticnec, x'el 'a sc'ojl Jehová ya'n 'ayach, yic tza pacn a b'a 'a Saúl yet' 'a eb' yin̈til, xchi eb' 'a David.
9-11'Ix ta'w David chi 'a eb' 'ixtic:
—A yic xjaw jun winc 'ayn 'a Siclag, yic tzwul yalnc 'ayin, to a Saúl tox 'ix chami, a snani to tzin tzalj yet'oc, palta xwa'n yamxoc coti, 'ix wa'n milxoc chamoc. Atn jun spac chi xwac' 'a 'a, yuj jun 'ab'x xwul yal 'ayn cha. Yuj cha, tzwac' in ti 'a yojltac Jehová, atn jun in coln 'el 'a smasnil somc'ojlal, chajtlto e moj 'ixta wal 'oj ex wutc pax ax tic. Caw maysch'olnil tas xe b'o'o, xe mil cham jun winc to may jac smul 'a yic waync 'a sat sch'at 'a yol yatut. Yuj cha, an 'oj in pactzoc wal schamlil chi 'ayex, 'oj ex in satl 'a sat lum lum tic, xchi 'a eb'.
12Xlajw cha, 'ix yaln David 'a eb' soldado chajtlto tzmilx cham ewinac, yuj cha, stzu'x 'el sc'ab' ewinac, yet' yoc ewinac, st'un̈n can q'ue ewin sniwnal eb' chi 'a sti 'aj tzyam sb'a a a 'a Hebrón. Xlajw cha, xyi'n 'at eb' sjolm win Is-boset cha, axta smuc eb' 'aj mucn win Abner 'a yol yic Hebrón cha.
Currently Selected:
2 S 4: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
