2 S 2
2
'Ajxnac 'och David sreyloc Judá
1Xlajw cha, sc'anb'n David 'a Jehová 'ixtic;
—¿Tom tztac' in 'at 'a junc eb' chon̈b' 'ay 'a yol yic Judá? xchi.
—N', tztac' a 'ati, xchi Jehová.
Yuj cha, sc'anb'n pax David jun 'ejm xo:
—¿'Aj 'ay junc chon̈b' 'aj smoj in 'ati? xchi.
—A 'a chon̈b' Hebrón tzach 'ati, xchi.
2Yuj cha, 'ix 'at David yet' eb' 'ix yistl schawn̈il ta': Atn 'ix Ahinoam 'aj Jezreel, yet' 'ix Abigail, atn 'ix yistl can win xi'lb'a Nabal 'aj Carmel. 3'Ix yi'n 'at pax David chi eb' winc ajun yet'oc. 'Ix 'at eb' yet' yistzil, yet' yunnal, yet' pax yisil, axta xc'och cajn eb' 'a Hebrón yet' 'a jun tzo'n̈ chon̈b' 'a yol yic Hebrón cha. 4Xlajw cha, 'ix jaw ewin yin̈tl Judá 'a David, 'ix ya'n can 'och eb' David chi sreyloc.
Ax yic xyab'n David chajtlto a eb' 'aj Jabes 'a yol yic Galaad, a eb' mucjnac Saúl, 5yuj cha, 'ix schecn 'at David chi jun tzo'n̈ eb' schecb' 'at yal 'a eb' 'ixtic: Ya' cab' Jehová syaxilal 'a eyib'an̈, yujto caw 'ix 'o'ch e c'ojl 'a Saúl, atn jun eyajlil, wach' eyutjnac e mucni. 6A ticnec jun, ya'cab' Jehová swach'c'ojlal yet' schamc'ojlal 'a eyib'an̈. An̈jtona pax an tic, wach' 'oj wutc in b'a 'ayex, yuj jun tas xe b'o cha. 7Palta ax ticnec jun, caw 'a'c eyip, tzaljan̈ec, man̈ ex xiwoc, yujto wach'xam xcham Saúl, atn jun eyajlil, palta ax eb' yin̈tl Judá, a eb' in 'a'n 'och sreyloc, xchi 'at 'a eb'.
Owl 'a scal eb' israel yet' eb' 'aj Judá
8Ax win Abner yunnal win Ner, syajlil eb' soldado yic Saúl, a win 'ix 'i'n 'at win Is-boset yunnal Saúl chi 'a Mahanaim, 9axta 'ix ya'ch can win reyl 'a yib'n̈ Galaad, 'a Gesuri, 'a Jezreel, a Efraín, 'a Benjamín yet' 'a smasnil chon̈b' Israel. 10Chawinc ab'il sq'uinl win Is-boset yunnal can Saúl yic 'ix schan 'el win yich ya'n reyl 'a chon̈b' Israel. Chab' wal ab'il ya'jnac win reyal. Palta ax eb' yin̈tl Judá, a David xya'ch eb' sreyloc. 11'Ixta x'aj David yoch sreyloc eb' yin̈tl Judá 'a uque ab'il yet' waque xo 'ujal, a jun chon̈b' 'aj xyac' reyal, atn 'a chon̈b' Hebrón.
12Xlajw cha, 'ix 'el Abner 'a Mahanaim, axta xc'och 'a chon̈b' Gabaón, ajun eb' soldado win Is-boset yet'oc. 13Ax pax Joab win yune 'ix Sarvia, x'el yet' eb' soldado David 'a chon̈b' Hebrón, axta schaj sb'a yet' Abner 'a 'aj tzyam sb'a a a yic Gabaón. A chamacn̈ eb' soldado cha, 'ix 'och wan eb' 'aj tzyam sb'a a a cha, junjn macn̈ eb' 'a junjn sc'axpil 'ec' a'. 14Yuj cha, 'ix yaln Abner chi 'a Joab 'ixtic:
—Cot cab' jaywn̈oc eb' quelmtac winc yac' owl 'a cojltac, xchi.
—B'o c'ab' 'icha tzal cha, xchi Joab.
15Yuj cha, 'ix 'elt eb' yac' owal. Lajnn̈ej sb'isl yic eb' xyac' jun jun: lajchwan̈ eb' yic Benjamín 'aych yet' Is-boset win yunnal Saúl, lajchwan̈ pax eb' yic David x'elta. 16Junjn eb' 'ix syam eb' sjolm junjn eb' 'ajc'ojl cha, 'ix steclan 'och eb' yespada 'a scostil, caw junn̈j x'aj eb' scham smasnil. Yuj cha, a jun lugar 'ay 'a yol yic Gabaón cha, 'ix scuchcn 'Aj X'och Tecjb'a. 17Caw wal niwquil x'aj yoch owl yuj eb' 'a jun c'u cha, ax Abner yet' eb' soldado israel, caw x'ajx ganar eb' yuj eb' soldado David. 18Ata 'ayc' 'oxwn̈ ewin yune 'ix Sarvia: atn ewin tic, win Joab, win Abisai yet' win Asael. A win Asael tic, caw jeln sb'ey win 'icha no c'ultquil chej. 19'Ix 'ochn̈j tza'n win Asael chi yuj Abner, caw man̈xtzac 'elcn win 'a spatc winac. 20A yic xyiln 'at Abner chi win 'a spatic, 'ix yaln 'a win 'ixtic:
—¿Ach chi 'ach Asael? xchi.
—An toni, xchi winac.
21—'Ochn̈ wan in a pechn b'eyc'oc. A cab' junc win in checb' chi tza yamcoti, tzlajw cha, tze'n can 'ec' smasnil tas yet' winac, xchi.
Palta ax Asael cha, ma'ix snib'j x'och wan spechn Abner cha. 22Yuj cha, 'ix yaln pax Abner chi 'a win jun 'ejm xo:
—'Ochn̈ wan in a pechn b'eyc'oc, mto tza nib'j wal tzin ec pural ach in miln cham can 'a sat lum tic. Toto 'ixta', ¿tas to wal 'oj wutc in ch'oxn in b'a 'a win o'tac Joab? xchi.
23Yujto a Asael, ma'ix snib'j xon x'el 'a spatc Abner cha, yuj cha, ax yoc slanza Abner chi 'ix stecch 'a sc'ojl win Asael cha, 'ix c'axw 'el'ch 'a yichspatic, 'ix telw 'ejm win 'a yet'l cha, 'ix chami. Ax smasnil eb' 'anma tzc'och 'a jun lugar 'aj xcham Asael cha, tz'och wan lin̈n eb' yilni.
24Palta ax Joab yet' Abisai 'ix 'ochn̈j tza'n eb' yuj Abner. A wal yem c'u 'ix c'och eb' 'a sjolm lum witz yic Ama, jun 'ay 'a yojltac 'at Guia, 'a 'aj tz'at jun b'e yic lum cusltac lum yic Gabaón. 25Ata syam sb'a eb' yin̈tl Benjamín yet' Abner, junxn̈ej 'ix 'aj eb' soldado chi smasnil 'a sjolm jun lum witz cha. 26'Ix 'awj 'at Abner chi 'a Joab, xyaln 'ixtic:
—¿Tom ma'oj och wan a miln cham eb' 'anma tic? ¿Tom man̈xtzac a na jab'oc, chajtlto a jun tic, cojn somc'ojlal tzyij cot 'ayon̈? ¿B'a'n̈ wal 'oj al 'a eb' 'anma tic, yic tz'och wan eb' spechn b'eyc' eb' yit chon̈ab'? xchi.
27'Ix ta'w Joab, xyaln 'ixtic:
—Wal 'a sb'i Dios tzwaln 'ayach, toc wal ma'ix ala to 'ixta', an tic yet' eb' wican tzca'n̈j owl eyet'oc masnto tzq'uin̈lb'i q'uic'an, xchi.
28Yuj cha, 'ix yutz'n Joab no sch'ac calnelu, ax smasnil eb' chon̈ab', 'ix 'och wan eb', man̈x 'ic 'och tza'n eb' yuj eb' yit israelal cha, man̈x 'ic yac' eb' owl yet' eb'. 29Xlajw cha, axta xb'ey Abner yet' eb' soldado 'a lum ya'lical Arabá 'a smasnil jun 'ac'wl cha. 'Ix sc'axptan 'ec' eb' a Jordán, 'ix 'ec' pax eb' 'a smasnil yol yic Bitrón, masnto xc'och eb' 'a Mahanaim.
30Ax Joab, 'ix 'och wan yoch tza'n yuj Abner, yuj cha, syamb'tzan smasnil eb' soldado. A yic sb'isn eb', 'ix yilni to 'ay b'aln̈lajn̈wan̈ eb' soldado David 'ix chamcni, 'ix chamcn pax win Asael. 31Palta ax eb' soldado David cha, 'ix smilcn cham eb' 360 eb' soldado yic Benjamín, atn eb' soldado win Abner.
32Xlajw cha, 'ix yi'n 'at eb' sniwnal Asael, axta smuc eb' 'a 'aj mucb'il smam 'a Belén. Ax Joab yet' eb' soldado 'ix b'eyn̈j eb' 'a smasnil jun 'ac'wl cha, ax yic xq'uin̈lb'i 'eli 'ayx 'ec' eb' 'a Hebrón.
Currently Selected:
2 S 2: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
