2 R 20
20
'Ix yab'ilan Ezequías,*r* palta b'oxnc pax sc'ojol
(2 Cr 32.24-26; Is 38.1-8)
1A 'a yic jun tiempoal cha, caw ow ya'n syailal Ezequías, jab'xoj ma'ix chami. Ax Isaías yunnal Amós, win schecb' Dios, 'ix 'at win 'at yila', 'ix yaln win 'a 'ixtic:
—Tox 'ix yal Jehová 'oj 'ixtic: A ticnec, b'ocn yaj tas 'ay 'ayach, yujto 'oj a chami, man̈x 'oj b'oxc a c'ojol, xchi Dios, xchi.
2Xlajw cha, 'ix meltzj 'och q'ueln Ezequías 'a sat yich n̈a cha, 'ix leslwi 'ixtc 'a Jehová: 3Tzin tew 'aych Mamin Jehová, to tza na coti chajtlto wach' 'ix wutj ach wa'n servil, xin b'on tas tzchaj a c'ojol, xchi 'a slesal. 'Ix 'oc' wal si'mb'il.
4Ax x'aji, mantzac 'el'ch Isaías 'a spacl snan̈l yamq'uil sdespacho win rey cha, 'ix yaln pax Jehová 'ixtc 'a 'a: 5Meltzjan̈, 'at al 'a Ezequías syajlil in chon̈ab', to an Jehová in, e Diosal in yet' e mam 'ichm David, an tzwal 'ixtic: Tox 'ix wab' a lesal, 'ix wil yelt yal a sat oq'ui, yuj cha, 'oj wac' b'oxc a c'ojol, ax chab'ej tzach 'at 'a watut an Jehová 'in tic. 6'Oj wac' junc xo olajn̈e ab'il a q'uinal. 'Oj ach in col yet' Jerusalén tic 'a yol sc'ab' sreyl chon̈b' Asiria. An 'oj in tan̈wc jun chon̈b' tic, yuj in chamc'ojlal 'a in checb' David yuj pax in b'inaxi, xchi Dios, xechi 'a 'a, xchi.
7Xlajw cha, 'ix ya'n pax Isaías chi tenxoc b'o jac sat te higo 'ix sucx 'och 'a sat jun syab'il win rey cha, 'ix b'ox can sc'ojl winac. 8A yic mantzac b'ox sc'ojl win Ezequías c'anb'n win 'a Isaías 'ixtic:
—¿Tas junc senya 'oj wila' yic tznachj 'el wu'uj to a Jehová 'oj 'a'n b'oxc in c'ojol, yet' pax yic 'oj in 'at 'a yatut Jehová 'a chab'j cha? xchi 'a 'a.
9—Atn jun senya 'oj sch'ox Jehová 'aych tic, sec wach' 'oj nachjc 'el o'oj, to 'oj 'el'choc tas 'ix yala: Ach 'oj ala', toto tz'at lajn̈c'ajoc swewenal yoc c'u 'a yojltac, mto tzmeltzj lajn̈c'ajoc 'a spatic yic tzch'oxn hora 'a sat q'uen reloj, xchi Isaías.
10'Ix ta'w Ezequías 'ixtic:
—A yic tz'at wewen 'a yojltac man̈ 'ajltacoc. Palta ax pax wewen tzmeltzj 'a spatic, caw 'ajltac jun cha, xchi.
11Xlajw cha, 'ix tew Isaías 'a Jehová, ax Jehová 'ix 'a'n meltzj lajn̈c'aj jun wewen chi 'a spatic, jun tz'ec' 'a sat sreloj Acaz.
Schajnac Ezequías*r* eb' checb'il cot 'a Babilonia
(2 Cr 32.27-31; Is 39.1-8)
12A yic jun tiempoal cha, a rey Merodac-baladán, yunnal Baladán, sreyl Babilonia, 'ix yab' yalxi to xyab'ilan Ezequías, yuj cha, 'ix schec cot jun tzo'n̈ eb' schecb' wul yac' jun ch'an̈ carta yet' jun siylab' 'a 'a. 13Caw wal chab'il sjaw eb' schecb' chi yuj Ezequías. Xlajw cha, 'ix sch'oxn 'a eb' tas molb'il yuj 'a yol yatut, atn q'uen plata, q'uen oro, perjuma, aceite caw wal wach' yet' 'a 'aj molb'il yamc'ab' yic owal, yet' jantcn̈ej tas 'ay 'a 'a. C'uxn 'ix sch'ox 'ilxoc smasnil. 14Xlajw cha, 'ix 'at Isaías win schecb' Dios 'a win rey Ezequías, 'ix sc'anb'n 'a 'ixtic:
—¿'Ajtil 'ix cot jun tzo'n̈ winc tic? ¿tas xchi eb' 'ayach? xchi.
—'Ix cot eb' 'a jun nacion̈ caw najat, atn 'a Babilonia, xchi Ezequías cha.
15—¿Tas xwul yil eb' 'a a despacho tic? xchi Isaías 'a 'a.
—'Ix yil eb' smasnil tas 'ay 'a in despacho tic yet' jantcn̈ej tas molb'il wu'uj. C'uxn xin ch'ox 'a eb' smasnil, xchi Ezequías cha.
16—'Ab' tas tzyal spaxti Jehová: 17'Oj jawc wal sc'ual, to a smasnil tas 'ay 'a a despacho, jantcn̈ej tas molb'il can yuj eb' a mam echam yet' eco, c'uxn 'oj 'ijxoc 'at smasnil 'a chon̈b' Babilonia. 18An̈jtona', 'oj 'ijxoc pax 'at eb' en̈til, ax yijx 'el yitb'eym swincal eb', ax yoch eb' ya'malc servil win reyl Babilonia cha, xchi Dios 'ayin, xchi Isaías 'a Ezequías.
19—A jun paxti 'ix al 'ayn yuj Jehová, caw wal wach', xchi Ezequías cha. 'Ix yal 'ixta', yujto a snani to 'ay junc'ojlal yic 'ayt 'och 'a yopiso cha.
Schaml Ezequías
(2 Cr 32.32-33)
20Ax jantc to yab'xil Ezequías, yet' jun tzo'n̈ niwn yel'ch 'ix 'el sb'oni, 'icha yuj jun tanque, yet' tasm 'ix yutj yi'n 'och a a 'a yol chon̈ab', a jun tzo'n̈ cha, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl Judá. 21A yic xcham Ezequías cha, ax jun yunnal tzcuch Manasés, a 'ix 'ochx can reyl sjeloc.
Currently Selected:
2 R 20: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
