2 R 17
17
'Ajxnac ganar chon̈b' Samaria
1A yic slajchwil ab'il xo yoch Acaz reyl 'a Judá, 'ix schan 'el win Oseas yunnal Ela ya'n reyl 'a chon̈b' Israel. B'aln̈e ab'il 'ix yac' reyl 'a chon̈b' Samaria. 2Palta caw maysch'olnil 'ix 'el sb'on 'a yojltac Jehová, wach'xam ma'ix c'och 'icha smaysch'olnilal jun tzo'n̈ eb' rey ya'jnac reyl 'a chon̈b' Israel 'a yaln̈taxi.
3A yic 'aych win Oseas reyal 'ix ya'n win Salmanasar sreyl chon̈b' Asiria owl yet' eb' israel, yuj cha, 'ix can eb' israel 'a yaln̈ schecnb'il winac yic tzya'n eb' stojlb'al 'a 'a. 4Palta a win Oseas cha, xyactj win ya'n stojlb'al a win Salmanasar 'icha xon 'a junjn ab'il. 'Ix checn 'at win schecb' a win So sreyl Egipto, yic tzcolwj win yi'n 'elt win 'a yaln̈ schecnb'il win sreyl Asiria cha. Yuj cha, 'ix ya'n Salmanasar yamchjoc Oseas, 'ix ya'n 'och 'a preso.
5Yajn̈j cha, 'ix smacn 'ec' win Salmanasar chon̈b' Israel chi smasnil, 'ix c'och yet' eb' soldado 'a chon̈b' Samaria yic tzya'n owl yet'oc. 'Ix 'och oyn eb' 'a spatquil jun chon̈b' chi 'a 'oxe ab'il. 6Ax yic sb'aln̈il xo ab'il yoch Oseas reyal, 'ix 'ajx ganar chon̈b' Samaria chi yuj eb' soldado Asiria. Xlajw cha, 'ix 'ijx 'at eb' israel 'a chon̈b' Asiria yu'uj. Xya'n pural win scan cajn eb' 'a chon̈b' Halah 'a yol yic Habor 'a sti a a yic Gozán, yet' 'a jun tzo'n̈ xo chuc chon̈b'al 'a yol yic eb' Medo.
7'Ixtnta 'ix 'aj eb' israel yujto 'ix 'och smul eb' 'a Jehová sDiosal, atn eb' yin̈tl eb' 'eln̈cta 'a Egipto, yic 'ix colx 'elt eb' 'a yol sc'ab' sreyl Egipto cha. Atn tic sb'ojnac eb': 'Ix ya'ch sb'a eb' 'emmquilal 'a jun tzo'n̈ comn dios, 8sb'eylb'ej eb' sb'eyb'al jun tzo'n̈ nacion̈ 'ix 'ijx 'el 'a sat lum lum yuj Jehová, yet' jun tzo'n̈ xo b'eyb'al 'ix sb'eylb'ej jaywn̈ eb' sreyl eb'.
9C'ultacl 'ix sb'o tas man̈ wach'c 'a sat Jehová Dios, 'ix sb'on chan̈ eb' jun tzo'n̈ macsej 'a jolmctac witz 'a junjn niwc chon̈ab', yet' 'a yib'n̈ smuroal 'aj tztan̈wx chon̈b' cha. 10An̈jtona', sb'on pax chan̈ eb' jun sch'oxnb'il sdiosal tzcuch Asera 'a jolmctac witz yet' 'a yich smasnil te te pim xi'il. 11Ata 'ix sn̈ustz'a eb' incienso 'a jun tzo'n̈ macsej 'a jolmctac witz cha, 'icha sb'eyb'al jun tzo'n̈ nacion̈ 'ix yij 'el Jehová 'a sat lum lum 'aj x'ec' eb'. Caw wal yel xo maysch'olnil tas 'ix 'el sb'on eb', 'ix stzuntzn cot eb' yowl sc'ojl Jehová. 12'Ix 'och eb' 'emmquilal 'a jun tzo'n̈ yechel, atn jun tzo'n̈ 'ix yac' Jehová yowlal, to matz tac' tz'och eb' 'emmquilal 'a 'a.
13Xlajw cha, schecn 'at Jehová eb' schecb' 'at yal 'ixtc 'a chon̈b' Israel yet' 'a Judá: 'Actjec can e tu b'eyb'al, tzeyiclni in checnb'il, in ley yet' smasnil in cuynb'il 'ix wac' yal eb' in checb' 'a eb' e mam eyicham, xchi. 14Palta ma'ix syiclj eb', caw wal pit 'ix yutj eb' snab'en 'icha eb' smam yichm eb' cha, yujto ma'ix ya'ch eb' Jehová sDiosal yipc sc'ojol. 15'Ix spatquilj can 'el eb' sley, yet' strato 'ix sb'o yet' eb' smam yichm eb', yet' schecnb'il y'ajnac 'a eb'. 'Ochnc pax tza'n eb' 'a spatquil jun tzo'n̈ comn dios to may jac yel'chi. A yuj jun tzo'n̈ cha, man̈x 'a jac yel'ch eb', cojxn stu b'eyb'al jun tzo'n̈ nacion̈ 'ay 'a stz'ey eb', a 'ix sb'eylb'ej eb', atn jun tzo'n̈ 'ay yowlal sb'eylb'an eb' yuj Jehová. 16'Ix yactn can eb' smasnil schecnb'il Jehová sDiosal, sb'on eb' chawn̈ yechl wacx tenb'il b'o'oc, sb'on pax eb' jun sch'oxnb'il sdiosal tzcuch Asera, 'ix 'och eb' 'emmquilal pax 'a jun tzo'n̈ c'anal yet' 'a Baal. 17An̈jtona', 'ix ya'n eb' tz'a yunnal yet' yisl xajmb'al-l 'a jun tzo'n̈ comn dios cha, scuyn sb'a eb' snan 'el junc paxti', yet' 'ajchumal, 'ix swach' 'a'j 'at sb'a eb' 'a scal maysch'olnil 'a sat Jehová. 'Ixtnta 'ix yutj eb' stzuntzn cot yowl sc'ojl Dios 'a yib'an̈.
18Yuj wal cha, caw 'ix cot yowl sc'ojl Jehová 'a chon̈b' Israel, 'ix yi'n 'el eb' 'a yojltac, palta cojxn̈ej jun 'in̈tal eb' 'ix cani, atn eb' yin̈tl Judá. 19Palta ma'ix syiclj pax eb' yin̈tl Judá chi schecnb'il Jehová sDiosal. A yic eb' to 'ix sb'eylb'ej eb' 'icha wal tas sb'eylb'ej eb' yit israelal eb' cha. 20Yuj cha, smasnil eb' yin̈tl Israel 'ix patquilx can 'el eb' yuj Jehová, 'ix 'och eb' 'a cusc'ojlal yu'uj, x'ajx 'och eb' 'a yol sc'ab' eb' chuc chon̈b'al yic tz'ixtx eb' yuj eb', masnto 'ix 'el eb' 'a yojltac. 21Yujto a Jehová x'i'n 'el eb' israel 'a yol sc'ab' eb' yin̈tl David, ax Jeroboam yunnal Nabat, a 'ix ya'ch eb' sreyloc. Ax win 'ix 'i'n 'el eb' yit israelal chi 'a Jehová, caw wal niwquil smul eb' 'ix 'ochi. 22'Ix sb'eylb'ejn̈ej eb' israel smasnil smaysch'olnilal sb'o Jeroboam. 23Yuj cha, 'ix yi'n 'el Jehová eb' israel chi 'a yojltac, 'icha wal 'ix yutj yaln eb' schecab'. Yuj cha, 'ix 'ijx can 'at eb' israel 'a chon̈b' Asiria; ata xcan eb' ta'.
'Ochnc pax Samaria chon̈b'al
24A sreyl chon̈b' Asiria 'ix 'i'n cot eb' 'anma 'ayc' 'a Babilonia, 'a Cuta, 'a Ava, 'a Hamat, yet' 'a Sefarvaim, 'ix jaw cajn eb' 'a jun tzo'n̈ chon̈b' 'ay 'a yol yic Samaria sjelc eb' israel. 25Yictax sjaw cajn eb' ta', mant 'a xon 'aj tz'och eb' 'emmquilal 'a Jehová. Yuj cha, 'ix ya'n cot Jehová e no león 'a scal eb', yic tzchin no jaywn̈oc eb'. 26Yuj cha, 'ix 'at ya'noc eb' alxoc 'a win sreyl chon̈b' Asiria 'ixtic: A eb' 'anma 'ix ej 'at cajn 'a chon̈b' Samaria, man̈ yojcoc eb' yoch 'emmquilal 'a sdiosal jun lugar cha, yuj cha, a tz'a'n 'at e no león chi 'a scal eb', yic tzchin no eb', xchi eb'.
27'Ix yaln win sreyl Asiria chi 'ixtic: Checc 'at junc eb' ya'mal 'och sti eb' 'anma 'a sdiosal cha, atn eb' eyijnac coti, yic tzc'och cajn ta', sec a 'oj cuynoc eb' 'anma yoch 'emmquilal 'a sdiosal jun nacion̈ cha, xchi.
28Xlajw cha, 'ix jaw jun 'a eb' ya'mal 'och sti eb' 'anma 'a Dios 'aj Samaria to 'ijxnac 'at cha, ata 'ix can 'a Bet-el, 'ix cuywj 'a tas tz'aj yoch 'emmquilal 'a Jehová. 29Palta junjn nacion̈ 'ix sb'o sdiosal 'a junjn chon̈b' 'aj 'ix can cajan; 'ix 'at ya'nc 'och eb' 'a yojl yet'l yic eb' 'aj Samaria b'ob'il yuj 'a jolmctac witz. 30A eb' 'aj Babilonia sb'o eb' yechl Sucot-benot; eb' 'aj Cuta sb'o eb' yechl Nergal; eb' 'aj Hamat sb'o eb' yechl Asima; 31eb' 'aj Ava sb'o eb' yechl Nib-haz yet' yechl Tartac; ax pax eb' 'aj Sefarvaim 'ix sn̈ustz'a eb' yunnal xajmb'al-l 'a Adramelec yet' 'a Anamelec, atn jun tzo'n̈ chi sdiosal eb'. 32Tzcob' ya'nc pax 'och sb'a eb' 'emmquilal 'a Jehová yalni, ax yit chon̈b' eb', a 'ix ya'ch eb' ya'malc 'och sti 'a sdiosal yic tzya'n eb' xajmb'al 'a jun tzo'n̈ macsej 'a jolmctac witz. 33Yuj cha, wach'xam tzcob' xiw eb' 'a Jehová yalni, palta an̈ja yaln sb'a eb' 'a jun tzo'n̈ diosal cha, a tzyal sb'eyb'al jun tzo'n̈ nacion̈ 'aj xcot eb'.
34Sb'eylb'ejn̈ej eb' 'icha xon sb'eyb'al 'a yaln̈taxi; matz 'och eb' 'emmquilal 'a Jehová, matz yiclj eb' sb'on 'icha yaln sley yet' schecn̈b'il jun 'ix 'ajx sb'eylb'oc eb' yin̈tl Jacob, atn jun 'ix 'ajx sb'ic Israel. 35A yic 'ix sb'on Jehová strato yet' eb', 'ix yaln 'ixtic: Man̈ ex xiw 'a jun tzo'n̈ xo comn dios, man̈ ex 'och 'emmquilal 'a jun tzo'n̈ cha, man̈ eyac' servil yic tzeya'n e xajmb'al 'a 'a. 36Palta a 'ayn Jehová e Diosal in, a 'ayn tzeyal e b'a, yujto an ex wij 'elt 'a Egipto yet' in niwquil poder. Cojxn̈ej 'ayn tzex 'och 'emmquilal, tzeya'n e xajmb'al. 37An̈jtona', tzeyiclj pax smasnil in checnb'il, in ley, in cuynb'il to tz'ib'b'il can wuj 'ayex; palta man̈ eyal e b'a 'a jun tzo'n̈ comn dios. 38Matz 'at cab' 'a satc'ojlal in trato in b'ojnac eyet'oc, 39palta cojn 'ayn an Jehová e Diosal in, an̈j 'ayn tzeyal e b'a. 'Ixta to b'i'an ax ex in coln 'el 'a yol sc'ab' eb' 'ajc'ojl yajch 'ayex, xchi Dios.
40-41Palta a jun tzo'n̈ 'anma cha, ma'ix schaj xon eb' yab'i'; a yic eb' to 'ix wach' 'atcn eb' 'a scal yichm b'eyb'al; wach'xam tzcob' yaln sb'a eb' 'a Jehová yalni, palta an̈ja yaln sb'a eb' 'a jun tzo'n̈ sdiosal cha. 'Ixta pax eb' yin̈tl eb', 'ix sb'eylb'ej eb' 'icha sb'eyb'al eb' smam yichm eb' cha, an̈jan̈ej to sb'eylb'an eb'.
Currently Selected:
2 R 17: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
