2 R 15
15
'Ochnc Azarías sreyloc Judá
(2 Cr 26.3-5,16-23)
1A yic 27 ab'il xo yoch Jeroboam reyl 'a chon̈b' Israel, 'ix schan 'el yich Azarías yunnal Amasías ya'n reyl 'a Judá. 2A yic schan 'el yich yopiso cha, waclajn̈e ab'il sq'uinal; 52 ab'il 'ix yac' reyl 'a Jerusalén, ax snun Jecolías sb'i, 'aj Jerusalén 'ix.
3A tas 'ix 'el sb'on Azarías cha, wach' 'a sat Jehová, 'icha tas 'ix 'el sb'on smam atn Amasías. 4Palta b'i'an, ma'ix yij 'el jun tzo'n̈ macsej 'ay yet'l 'a lum jolmctac witz, an̈ja to ya'n eb' 'anma xajmb'al, tzn̈usn tz'a eb' incienso ta'. 5'Ix ya'ch Jehová jun yab'il lepra 'a win rey cha. 'Aychn̈ej 'a 'a masnto 'ix chami. Yuj cha, man̈xtoc 'ix can win rey 'a sdespacho, chucx n̈al 'aj 'ix cani. Ax jun yunnal tzcuch Jotam, a x'ochcn yilmalc sdespacho winac, tzya'n pax yajlil 'a yib'n̈ jun nacion̈ cha.
6Ax jantc to yab'xil Azarías yet' smasnil tas 'ix 'el sb'oni, ata tz'ib'b'il can 'a ch'an̈ libro 'aj tz'ib'b'il yab'xil eb' sreyl Judá. 7A yic 'ix cham Azarías, ata 'ix mucx 'a 'aj mucn eb' smam yichm 'a Schon̈b' David. Xlajw cha, ax win Jotam cha, a win 'ix wach' 'ochcn reyl sjeloc.
'Ochnc Zacarías sreyloc Israel
8A yic 30 ab'il xo yoch Azarías reyl 'a Judá, 'ix schan 'el yich Zacarías yunnal Jeroboam ya'n reyl 'a chon̈b' Israel. Waque 'uj 'ix yac' reyl 'a chon̈b' Samaria. 9Caw maysch'olnil 'ix 'el sb'on 'a sat Jehová, 'ix sb'eylb'ej smasnil smul Jeroboam yunnal Nabat, atn jun xjucb'tzan eb' yit israelal 'a maysch'olnil, yic 'ix 'och smul eb'.
10Ax Salum, yunnal Jabes, a 'ix 'och 'ajc'ojlal 'a Zacarías cha, 'ix yac' owl yet'oc, 'ix smiln cham 'a sat eb' chon̈ab', ax x'ochcn reyl sjeloc.
11Ax jantc to yab'xil Zacarías, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl chon̈b' Israel. 12'Ixtnta 'ix 'aj yel'ch tas 'ix yal Jehová 'a win rey Jehú, yic 'ix yalni, to a eb' yin̈tl 'oj 'em wocn 'a sdespacho ya'n reyl 'a chon̈b' Israel, masnto 'a schan̈ macn̈il yin̈til.
'Ochnc Salum sreyloc Israel
13A Salum yunnal Jabes, 'ix schaj 'el yich ya'n reyal, yic 39 ab'il xo yoch Uzías reyl 'a Judá. Jun 'uj 'ix yac' reyl 'a chon̈b' Samaria. 14Ax Menahem, yunnal Gadi, 'ix cot 'a Tirsa 'ix c'och 'a chon̈b' Samaria, yic tz'at ya'nc owl yet' Salum cha, 'ix smiln chamoc, ax x'ochcn reyl sjeloc.
15Ax jantc to yab'xil Salum yet' yic 'ix 'och 'ajc'ojlal 'a Zacarías, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl chon̈b' Israel.
16A yic jun tiempoal cha, 'ix cot Menahem yet' eb' soldado 'a Tirsa 'ix schan 'el yich ya'n satxoc el eb' chon̈b' 'ay 'a yol yic Tifsa, yujto ma'ix chax 'och win yuj eb' 'a yol schon̈b' cha. Yuj cha, 'ix yelc'n 'at eb' soldado win chi smasnil tas 'ay 'a yol smacb'en jun chon̈b' cha. An̈jtona eb' 'ix 'ix 'ayx tz'i'ni, 'ix tecx 'elt yol sc'ojl eb' 'ix yuj ewinac.
'Ochnc Menahem sreyloc Israel
17A yic 39 ab'il xo yoch Azarías reyl 'a Judá, 'ix schan 'el Menahem, yunnal Gadi ya'n reyl 'a yib'n̈ chon̈b' Israel, lajn̈e ab'il 'ix yac' reyl 'a chon̈b' Samaria. 18Caw maysch'olnil 'ix 'el sb'on 'a sat Jehová, yujto ma'ix yactj can sb'eylb'an smasnil smul Jeroboam yunnal Nabat, atn jun xjucb'tzan eb' yit israelal 'a maysch'olnil yic 'ix 'och smul eb'.
A 'a yol stiempoal cha, 19ata 'ix jaw win Pul sreyl Asiria yet' eb' soldado yac' owl yet' Israel. Yuj cha, 'ix yac' Menahem 750 quintal q'uen tumn plata 'a win Pul cha yic tz'och win yet'oc, sec wach' te'n yaj 'a yopiso. 20'Ix ya'ch Menahem jun tojlb'al chi 'a yib'n̈ eb' yit chon̈ab'. A eb' rico jab'xoj man̈ chab'oc libra q'uen tumn plata tzyac' junjn eb' sec wach' tz'ajx jun tojlb'al chi 'a sreyl chon̈b' Asiria. 'Ixta 'ix 'aj smeltzj win sreyl Asiria yet' eb' soldado 'a slu'um, man̈xtoc 'ix 'och wan 'a yol yic Israel.
21Ax jantcto yab'xil Menahem yet' smasnil tas 'ix 'el sb'oni, ata tz'ib'b'il can 'a ch'an̈ libro yic yab'xil eb' sreyl chon̈b' Israel. 22'Ix cham Menahem, ata 'ix mucx 'a 'aj mucn eb' smam yicham, ax jun yunnal tzcuch Pekaía, a 'ix 'ochcn reyl sjeloc.
'Ochnc Pekaía sreyloc Israel
23A yic 50 ab'il xo yoch Azarías reyl 'a Judá, 'ix schan 'el Pekaía yunnal Menahem ya'n reyl 'a yib'n̈ chon̈b' Israel, chab' ab'il 'ix yac' reyl 'a chon̈b' Samaria. 24Caw maysch'olnil 'ix 'el sb'on 'a sat Jehová, ma'ix yactj can sb'eylb'an smasnil smul Jeroboam, win yunnal Nabat, atn win xjucb'tzan eb' yit israelal 'a maysch'olnil yic 'ix 'och smul eb'. 25Palta a win Peka yunnal Remalías, capitan̈ yaj win yuj Pekaía cha, 'ix 'och 'ajc'ojlal 'a 'a. 'Ix ya'ch sb'a 50 winc 'aj Galaad yet'oc, 'ix smiln cham eb' win Pekaía chi 'a sdespacho 'a chon̈b' Samaria, xlajw cha, ax x'ochcn reyl sjeloc.
26Ax jantcto yab'xil Pekaía yet' smasnil tas 'ix 'el sb'oni, ata tz'ib'b'il can 'a ch'an̈ libro yic yab'xil eb' sreyl chon̈b' Israel.
'Ochnc Peka sreyloc Israel
27A yic 52 ab'il xo yoch Azarías reyl 'a Judá, 'ix schan 'el yich Peka yunnal Remalías ya'n reyl 'a chon̈b' Israel. Junc'l ab'il 'ix yac' reyl 'a chon̈ Samaria. 28Palta caw maysch'olnil 'ix 'el sb'on 'a sat Jehová, ma'ix yactj can sb'eylb'an smasnil stu b'eyb'al Jeroboam yunnal Nabat, atn win xjucb'tzan eb' yit israelal 'a maysch'olnil.
29A 'a yol stiempoal Peka win sreyl Israel, ata 'ix jaw win Tiglat-pileser sreyl Asiria yet' eb' soldado, xyac' eb' owl yet' eb' Israel. 'Ix yac' ganar eb' 'aj Asiria jun tzo'n̈ chon̈b' tic: Atn Ijón, Abel-bet-maacá, Janoa, Cedes, Hazor, Galaad, Galilea, yet' smasnil smacb'en Neftalí; 'ix 'ijx 'at eb' 'anma 'aj jun tzo'n̈ chon̈b' tic 'a chon̈b' Asiria. 30'A yic junc'l ab'il xo yoch Jotam yunnal Uzías reyl 'a Judá, ax win Oseas, yunnal Ela, 'ix 'och 'ajc'ojlal 'a Peka cha, a 'ix smiln chamoc, ax x'ochcn reyl sjeloc.
31Ax jantc to yab'xil Peka yet' smasnil tas 'ix 'el sb'oni, ata tzib'b'il can 'a ch'an̈ libro yic yab'xil eb' sreyl chon̈b' Israel.
'Ochnc Jotam sreyloc Judá
(2 Cr 27.1-9)
32A yic chab' xo ab'il yoch Peka, yunnal Remalías reyl 'a chon̈b' Israel, 'ix schan 'el Jotam yunnal Uzías ya'n reyl 'a Judá. 33A Jotam 25 ab'il sq'uinal yic schan 'el yich ya'n reyal; waclajn̈e ab'il 'ix yac' reyl 'a Jerusalén, a snun Jerusa sb'i, yisl win Sadoc.
34Caw wach' 'ix 'el sb'on Jotam 'a sat Jehová, 'icha wal sb'eyb'al smam, atn Uzías. 35'Ix sb'on spuertail yatut Jehová, atn jun puerta 'ay 'a cha'an̈. Palta b'i'an, ma'ix yij 'el jun tzo'n̈ macsej 'a yet'l 'a jolmctac witz, an̈ja to ya'n eb' 'anma xajmb'al, tzn̈usntz'a eb' incienso ta'.
36Ax jantcto yab'xil Jotam yet' smasnil tas 'ix 'el sb'oni, ata tz'ib'b'il can 'a ch'an̈ libro yic yab'xil eb' sreyl Judá.
37A yic jun tiempoal cha, 'ix schan 'el Jehová yich schecn cot Rezin sreyl chon̈b' Siria yet' win Peka, yunnal Remalías yic tzya'n eb' owl yet' Judá. 38A yic 'ix cham Jotam, ata 'ix mucx 'a Schon̈b' David 'aj mucn eb' smam yicham. Xlajw cha, ax jun yunnal tzcuch Acaz, a 'ix 'ochcn reyl sjeloc.
Currently Selected:
2 R 15: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
