2 Co 2
2
1Yuj cha, xin nani, to man̈x 'oj in c'ochx 'ayx 'a scal cusc'ojlal. 2Toto tz'at wa'ch e cusc'ojlal, ¿macht wal junc 'oj stac' ya'n sniwnal in c'ojl an tic? Yuj cha, tzin nib'j matz 'at wa'ch e cusc'ojlal, yujto cojxn ex 'oj stac' eya'n sniwnal in c'ojol. 3'Ixta wutjnac waln 'at 'ayx 'a junx in carta, yujto in nib'jnac, ma'in 'at wa'ch e cusc'ojlal. Smoj to ax tzeyac' in tzaljc'ojlal. Xwa'ch yipc in c'ojol, toto tzjaw in tzaljc'ojlal, ax sjaw pax e tzaljc'ojlal jun xo. 4A yic in tz'ib'n 'at jun carta chi 'ayex, caw in 'och 'il eyu'uj. Caw wab'jnac syail, caw 'o'nc in paxi. Palta man̈ yujoc wa'n 'och e cusc'ojlal in tz'ib'n 'ati. In tz'ib'jnac 'ati, sec tzeyojquej 'eli, to caw niwn in chamc'ojlal 'ayex.
'Ac'b'il niwnc'ojlal win 'ochnc smul
5'Ay ton jun mach 'a'jnac 'och qui cusc'ojlalec. Man̈ cojnoc in cusnc in yu'uj. Ya'jnac 'och pax jab' e cusc'ojlal jun xo. Jab' xin chi, yujto tzin nib'j matz caw wach' 'och 'a yib'an̈. 6A jun yailal eya'jnac 'och 'a yib'an̈, yic eya'n cuenta, colb'il cab'i'. 7Al ticnec, yel xo wach' tzeyac' niwnc'ojlal 'a 'a. Tzeya'n pax sniwnal sc'ojol, sec wach' ma'oj somchjc 'el snab'en yuj cusc'ojlal. 8Yuj cha, tzin tew 'at 'ayex, ch'oxc pax e chamc'ojlal 'a 'a. 9In tz'ib'jnac 'at 'ayx yuj jun tic 'a jun 'el, yic wa'n ex prowal. Yujto in nib'j wojcoc 'eli, toto yel tzeyiclj tas tzwala. 10Al ticnec, a mach 'oj eyac' niwnc'ojlal yuj junc tas, eyu'uj 'oj wac' pax niwnc'ojlal 'a 'a. Wach'xam man̈oc 'ayn tz'och smul, palta 'a sat Cristo, ax wa'n niwnc'ojlal. 11'Ixta tzwutej, sec matz on̈ ya'c ganar win Satanás, yujto cojc xoni, tas snab'en win 'ayn̈ec.
'Ochnc somc'ojlal Pablo 'a Troas
12A yic in c'och 'a chon̈b' Troas, waln 'el yab'xil Cristo, caw coln in munlj 'a yic Cajlil ta'. 13Palta x'och jab' in somc'ojlal, yujto ma'ix 'ilchj cu'tac Tito wuj ta'. Yuj cha, waln can in b'a 'a eb', in cotx ta', in jaw 'a Macedonia tic.
A yopiso yab'xil Cristo
14Palta calc yuj diosal 'a Dios, yujto smasnil tiempo on̈ yac' 'och tza'n yuj Cristo Jesús, yic tzcheclj 'eli to a 'ix a'n ganar. Cujec tzpucb't yab'xil 'a junjn lugar, 'icha tzpucb't sjab' junc incienso. 15'Icha sjab' junc incienso tzyac' Cristo 'a Dios, caw su'q'ui sjab', 'ixta 'on̈ec, yic tz'ec' caln 'el yab'xil 'a scal eb' wan scolchji, yet' 'a scal eb' wanto satq'ui. 16A yic tzcalnec 'a eb' wan satq'ui, lajn yab'xil 'icha sjab' junc tas tzon̈ cham yu'uj, yujto 'oj cham eb' 'a jun 'ejmn̈ej yu'uj. Ax yic tzcalnec 'a eb' wan scolchji, lajn yab'xil 'icha junc caw su'q'ui sjab' 'a sat eb', yujto wan schan eb' sq'uinl 'a jun 'ejmn̈ej yu'uj. Yuj cha, may wal junc mach 'oj techjoc yaln 'el jun 'ab'x tic 'a yol yico'. 17An̈ tic on̈, man̈ yujoc ca'n ganar 'a spatc spaxti Dios, tz'ec' calnc 'el on̈, 'icha tzyutj sb'a nan̈l xo eb'. Tz'ec' cob' sb'al alnc 'el eb'. Palta an̈ xo tic on̈, caw yelc'ojlal tz'ec' cal-l on̈, yujto 'ac'b'il copiso yuj Dios on̈. Tz'ec' cal-l on̈, sec tzalj Dios quet' 'on̈, yujto schecb' on̈ Cristo on̈.
Currently Selected:
2 Co 2: CSS
Highlight
Share
Copy

Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.