2 Cr 5
5
1A yic xlajw sb'o smasnil munljel xyac' Salomón b'o yuj yatut Jehová, 'ix 'ijx 'at smasnil jun tzo'n̈ yamc'ab' chi 'a 'aj tzmolx 'a yatut Jehová cha, atn jun tzo'n̈ to nab'a oro, nab'a plata, yet' jun tzo'n̈ xo tas yic Jehová yaji, to siyb'il can yuj David, atn smam.
'Ic'b'il cot scaxail trato 'a yatut Dios
(1 R 8.1-11)
2-4Xlajw cha, 'a yic sc'ul q'uin̈ yic yucl 'uj#2 Cr 5.2-4 Yic yucl 'uj, tzyal 'el'chi, tz'el yich 'a spacl uj septiembre tzc'och 'a spacl 'uj octubre. 'a jun ab'il cha, xya'n Salomón syam sb'a smasnil eb' yichm wincal chon̈b' Israel 'a Jerusalén, atn smasnil eb' yajl yaj 'a scal junjn 'in̈tal, yet' smasnil eb' niwn yel'ch 'a scal junjn macn̈ eb' israel cha. 'Ix syam sb'a eb' yic tz'ijx cot te scaxail strato Jehová 'a Sión, atn Schon̈b' David. 5A eb' levita ya'mal 'och sti eb' 'anma 'a Dios, a eb' 'ix 'i'n cot te caxa cha. Ax jun tzo'n̈ xo eb' levita, 'ix 'i'n cot jun Mantiado 'aj tzqui chaj qui b'a yet' Dios, yet' pax smasnil syamc'ab'il jun scajnub' Dios 'ay 'a yojl jun Mantiado cha. 6A rey Salomón yet' smasnil eb' yit israelal 'ix syam sb'a cha, b'ab'l scot eb' 'a yojltac te caxa cha, xlaj ya'nc eb' xajmb'al, atn no calnelu yet' no mam wacax. Caw niwn no xyac' eb', man̈xtzac b'ischj no'. 7Xlajw cha, 'ix 'at ya'nc 'och eb' ya'mal 'och sti eb' 'anma te caxa chi 'a yet'ul, 'a jun Lugar to cojn Dios 'ay yico', 'a yaln̈ sc'axl jun tzo'n̈ yechl querubín 'a yol yatut Dios cha. 8Jen̈n 'at sc'axl jun tzo'n̈ yechl querubín 'a yib'n̈ jun lugar 'aj 'ay te caxa cha, yet' 'a yib'n̈ eb' te scan̈nub'al. 9A eb' te scan̈nub'al cha, caw niwc yoc te', checl 'el-l te 'a jun Lugar to a Dios 'ay yico', wach'xam man̈ checloc te 'a spatquil 'elta, palta 'ix cann̈j te 'ixta'. 10A 'a yojl te caxa cha, cojxn chapachn̈ q'uen q'uen ya'jnac can 'ejm Moisés 'a yojl te 'a Horeb, cojxn chi 'ay 'ejmi, atn eb' q'uen 'aj tz'ib'b'il can 'och strato Jehová ya'jnac can yet' eb' israel, yictax yelt eb' 'a Egipto.
11'Ix 'elt eb' ya'mal 'och sti eb' 'anma chi 'a yol scajnub' Dios, yujto smasnil eb', tox 'ix sacb'tzej sb'a eb', wach'xam man̈ stzol-loc xyutj eb' yi'n 'elt smacul. 12Ax smasnil eb' levita 'aych 'a yib'n̈ to tzb'itni, 'icha Asaf, Hemán yet' Jedutún, eb' yunnal eb', yet' pax eb' yican eb', lin̈n 'och eb' 'a stz'ey yet'l xajmb'al 'a stojlal 'aj tzq'uel c'u. A te lino 'aych spichloc eb'. Yamb'il címbalo, salterio, yet' pax arpa yuj eb'. 'Ay pax 120 eb' ya'mal 'och sti eb' 'anma tz'utz'n trompeta yet' eb'.
13Xlajw cha, junn̈j xyutj eb' yutz'n strompeta cha, junn̈j xyutj eb' sjaj sb'itni, junn̈j xyutj pax eb' yaln wach' paxti', yuj yaln eb' yuj diosal 'a Jehová. 'Ix 'utz'x trompeta, 'ix yucx platillo, yet' jun tzo'n̈ xo yamc'ab', yic tz'och b'it 'a Dios. Ya' sb'a wan sb'itn eb', 'ix yaln eb' 'ixtic: Calc wach' paxti 'a Jehová, yujto yel xo wach' snab'en, yujto 'ay schamc'ojlal 'a jun 'ejmn̈ej, xchi eb' 'a sb'it. A 'a yic jun rato cha, 'ix macchj 'el yol yatut Jehová chi yuj jun 'asun. 14Yuj jun 'asn cha, man̈x 'ic stac' yoch eb' ya'mal 'och sti eb' 'anma yiln yopiso ta', yujto xmacchj 'el yojl chi yuj stzictznil Jehová.
Currently Selected:
2 Cr 5: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
